អន្តរជាតិ
នយោបាយអន្តរជាតិ
លោក Kalla៖ ឥណ្ឌូណេស៊ី មិនអនុញ្ញាតឲ្យពលរដ្ឋខ្លួន ត្រូវកាត់ទោសនៅសិង្ហបុរីទេ
× បញ្ហាផ្សែងដែលចេញភ្លើងឆេះព្រៃ បានលេចឡើងជាថ្មី បន្ទាប់ពីសិង្ហបុរី ប្រុងចាប់ខ្លួនជនជាតិឥណ្ឌូណេស៊ី ដែលសង្ស័យថា ស្ថិតនៅពីក្រោយភ្លើងឆេះព្រៃ កាលពីឆ្នាំ២០១៥។ យ៉ាងណាមិញ អនុប្រធានាធិបតីឥណ្ឌូណេស៊ី ក៏ប្រកាសដែរថា ឥណ្ឌូណេស៊ី នឹងមិនអនុញ្ញាតឲ្យពលរដ្ឋខ្លួន ត្រូវបានកាត់ទោសនៅក្រោមច្បាប់របស់សិង្ហបុរីនោះទេ។
អនុប្រធានាធិបតីឥណ្ឌូណេស៊ី លោក Jusuf Kalla បានចេញមកការពារជនជាតិឥណ្ឌូណេស៊ី ដែលត្រូវទទួលខុសត្រូវលើ ភ្លើងឆេះបង្កជាផ្សែងអ័ព្ទ នៅទូទាំងតំបន់ និងកំពុងស្វែងរកចាប់ខ្លួន ដោយអាជ្ញាធរសិង្ហបុរី។ លោកនិយាយថា រដ្ឋាភិបាលឥណ្ឌូណេស៊ី នឹងមិនបញ្ជូនជនជាតិខ្លួន ទៅឲ្យសិង្ហបុរី កាត់ទោសតាមច្បាប់របស់ខ្លួនទេ។
ថ្លែងប្រាប់សារព័ត៌មានក្នុងស្រុក Detiknews នៅថ្ងៃទី១៣ ខែមិថុនា អនុប្រធានាធិបតី Kalla អះអាងថា៖«ប្រសិនបើមានកំហុសនៅសិង្ហបុរី សិង្ហបុរីអាចកាត់ទោសបាន។ ប៉ុន្តែភ្លើងឆេះ នៅក្នុងឥណ្ឌូណេស៊ី ដូច្នេះ នេះជាបញ្ហារបស់យើង (ឥណ្ឌូណេស៊ី)។»
ការលើកឡើងរបស់អនុប្រធានាធិបតីឥណ្ឌូណេស៊ី ធ្វើឡើងបន្ទាប់ពី ទីភ្នាក់ងារបរិស្ថានជាតិសិង្ហបុរី និយាយថា ខ្លួនទទួលបានដីកា ពីតុលាការ ដើម្បីស្វែងរកអ្នកចាត់ការក្រុមហ៊ុន ជាជនជាតិឥណ្ឌូណេស៊ីម្នាក់ ដែលមិនបានចូលមកផ្ដល់សម្ភាស ខណៈរូបគេ នៅសិង្ហបុរី។ អ្នកចាត់ការរូបនោះ ត្រូវសង្ស័យថា ជាប់ពាក់ព័ន្ធនឹងភ្លើងឆេះព្រៃ ដែលបង្កជាផ្សែងអ័ព្ទ បំពុលដល់សិង្ហបុរី។ ប៉ុន្តែ រដ្ឋាភិបាលឥណ្ឌូណេស៊ី បានទាត់ចោលការប៉ុនប៉ងចាប់ខ្លួននេះ តាមរយៈស្ថានទូតរបស់ខ្លួន ប្រចាំសិង្ហបុរី។
នៅក្នុងឆ្នាំ២០១៤ សិង្ហបុរី បានអនុម័តច្បាប់ស្ដីពី ផ្សែងពុលឆ្លងព្រំដែន ដែលនឹងត្រួតពិនិត្យ លើក្រុមហ៊ុនណា ដែលបង្កជាភ្លើងឆេះ ឬក៏អនុញ្ញាតឲ្យក្រុមហ៊ុនសម្បទានរបស់ខ្លួន ដុតព្រៃ ព្រមទាំងក្រុមហ៊ុនពាក់ព័ន្ធ នឹងផ្សែងអ័ព្ទ ដែលប៉ះពាល់យ៉ាងខ្លាំងដល់សិង្ហបុរី ក៏ដូចជាផ្នែកជាច្រើនក្នុងតំបន់។ វិស័យទេសចរណ៍ និងឧស្សាហកម្មហោះហើរ សុទ្ធតែរងផលវិបាក នៃផ្សែងអ័ព្ទ ដែលហុយចេញពី ភ្លើងឆេះព្រៃ និងដី នៅឥណ្ឌូណេស៊ី។
ក្រសួងការរបរទេសសិង្ហបុរី បកស្រាយថា ច្បាប់នេះ គឺស្របនឹងច្បាប់អន្តរជាតិ ដែលអនុញ្ញាតឲ្យប្រទេសមួយ ចាត់វិធានការចាំបាច់ ដើម្បីការពារខ្លួន ពីសកម្មភាពខាងក្រៅ ហើយច្បាប់នវ ក៏មិនប៉ះពាល់ដល់អធិបតេយ្យភាព ប្រទេសណាមួយដែរ។ ចំណែកឯ លោក Masagos Zulkifli រដ្ឋមន្ត្រីបរិស្ថាន និងធនធានទឹក សិង្ហបុរី ក៏បញ្ជាក់ដែរថា រដ្ឋាភិបាលសិង្ហបុរី នឹងធ្វើអ្វីគ្រប់បែបយ៉ាង ដើម្បីអនុវត្តច្បាប់ថ្មីនេះ៕
Tag:
សិង្ហបុរី
ឥណ្ឌូណេស៊ី
Jusuf Kalla
© រក្សាសិទ្ធិដោយ thmeythmey.com