ជាតិ
សេដ្ឋកិច្ច
ក្រសួងកសិកម្ម ប្រកាសឲ្យកសិករទប់ស្កាត់ «ដង្កូវហ្វូង» ក្នុងស្រែចម្ការរបស់ខ្លួន លោក វេង សាខុន រដ្ឋមន្ត្រីក្រសួងកសិកម្ម
× ភ្នំពេញ៖ ក្រសួងកសិកម្ម ប្រកាសថា ដំណាំស្រូវ ក្នុងខេត្តចំនួន៥ កំពុងរងការបំផ្លាញដោយសត្វដង្ហូវហ្វូង។ ក្រសួងកសិកម្មតាមរយៈសេចក្តីជូនដំណឹងរបស់ខ្លួន ឲ្យដឹងថា ដោយសារតែភាពរាំងស្ងួតអូសបន្លាយយូរ បណ្តាលឲ្យពពួកសត្វដង្កូវហ្វូងនេះ កកើតនិងរាលដាលយ៉ាងឆាប់រហ័ស ដែលចាំបាច់ត្រូវតែទប់ស្កាត់ជាបន្ទាន់។
ក្រសួងកសិកម្ម ប្រកាសឲ្យកសិករទប់ស្កាត់ចំពោះពពួកសត្វដង្កូវហ្វូង ដែលជាសត្វល្អិតចង្រៃបំផ្លាញដំណាំស្រូវ នៅដើមរដូវវស្សានេះ។ ដង្កូវហ្វូងនេះ កំពុងផ្ទុះឡើងក្នុងខេត្តកំពង់ចាម, ព្រៃវែង, ត្បូងឃ្មុំ, ព្រះវិហារ និងខេត្តឧត្តរមានជ័យ ដែលបំផ្លាញដំណាំស្រូវក្នុងទីតាំងទាំងនោះ។ នេះបើយោងតាមសេចក្តីជូនដំណឹងស្តីពីការត្រៀមអន្តរាគមន៍កំចាត់ដង្កូវហ្វូងលើដំណាំស្រូវរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៤ខែមិថុនា។ សេចក្តីជូនដំណឹងនេះឲ្យដឹងទៀតថា គ្រោះរាំងស្ងួតដែលអូសបន្លាយឆ្នាំនេះ បណ្តាលឲ្យពពួកដង្កូវហ្វូង កកើតនិងរាលដាលយ៉ាងឆាប់រហ័ស ក្រោយពីមានភ្លៀងធ្លាក់ដើមរដូវមក។
តាមរយៈសេចក្តីជូនដំណឹងរបស់ខ្លួន ក្រសួងកសិកម្ម បញ្ជាក់ថា ដង្កូវហ្វូងនេះ មិនត្រឹមតែបំផ្លាញដំណាំស្រូវប៉ុណ្ណោះទេ តែដំណាំពោត សណ្ដែត ស្ពៃ ជាដើមក៏វាបំផ្លាញដែរ។
នៅក្នុងសេចក្តីជូនដំណឹងមួយនេះ ក្រសួងកសិកម្ម រុក្ខាប្រមាញ់ និងនេសាទ ណែនាំពីវិធីទប់ស្កាត់សត្វដង្កូវហ្វូងនេះ។ វិធីទី១៖កំចាត់មេអំបៅដង្កូវហ្វូង ក្រសួងណែនាំឲ្យ ធ្វើអន្ទាក់ជូរអែមគឺ គេត្រូវដាក់ទឹក១ភាគ ស្រាស១ភាគ ស្កររងូរ៤ភាគ ទឹកខ្មេះ៤ភាគ លាយបញ្ចូលគ្នាឲ្យសព្វ បន្ទាប់មកលាយថ្នាំ Fipronil ចំនួន២មីលីលីត្រ ក្នុងសូលុយស្យុង១លីត្រ។ ក្រសួងប្រាប់ទៀតថា យកសូលុយស្យុងខាងលើដាក់ក្នុងចានជ័រស្ដើង ឬជ្រលក់នឹងសំឡីជក់ទឹក រួចចងព្យួរតាមចម្ការនៅពេលយប់ ដើម្បីឲ្យមេអំបៅមកជញ្ជក់ ដែលនឹងធ្វើឲ្យវាងាប់។
ចំណែកវិធីទី២៖កំចាត់ដង្កូវហ្វូង ក្រសួងណែនាំថា ចំពោះស្រែដែលគ្មានទឹក កសិករត្រូវជីកចង្អូរនៅតាមព្រំស្រែ ឬចម្ការដែលជាប់ជាមួយព្រៃ ឬចម្ការចេក ឬមានស្មៅចង្រៃដុះច្រើននៅតាមព្រុំ (ចង្អូរមានមុខលើទំហំ៣០សង់ទីម៉ែត្រ រួចរាយផេះពីលើ ឬបាញ់ថ្នាំបើមានដង្កូវចូលច្រើន)។ ក្រៅពីវិធីនេះ ក្រសួងណែនាំវិធី១ផ្សេងទៀត គឺកសិករត្រូវប្រើឈើស្រស់ ឬវត្ថុធាតុដទៃដែលអាចធ្វើជាម្លប់ យកទៅរាយក្នុងស្រែ ឬចម្ការ ក្នុងគម្លាតពី៤ទៅ៥ម៉ែត្រ ហើយពេលវេលាត្រូវដាក់គឺចាប់ពីម៉ោង៧និង៣០នាទីព្រឹក ដល់ម៉ោង៣រសៀល ក្នុងករណីមេឃស្រឡះ មានថ្ងៃក្តៅខ្លាំង។ បន្ទាប់មករាល់ពី២ទៅ៣ម៉ោងម្តង កសិករអាចយកដង្កូវកំទេចចោលបាន។
ចំពោះស្រែដែលមានទឹក ឬនៅជិតប្រភពទឹក ក្រសួងប្រាប់ដល់កសិករឲ្យបញ្ចូលទឹកទៅក្នុងសំណាប ឬសន្ទូងអោយលិចចុងស្រូវ រួចប្រើស្បៃមុងអូសប្រមូលដង្កូវយកទៅកំទេចចោល។
ដោយឡែកវិធីទី៣៖កំទេចប្រភពដង្កូវហ្វូងនៅជុំវិញស្រែ ក្រសួងណែនាំថា កសិករត្រូវសំអាតស្មៅចង្រៃ និងប្រមូលកំទេចកំទីដែលជាជំរក និងប្រភពដង្កូវហ្វូង យកទៅកំទេចចោល។ ក្រសួងកសិកម្ម បញ្ជាក់ថា ជម្រើសចុងក្រោយកសិករអាចបាញ់ថ្នាំកសិកម្មកំចាត់ដង្កូវហ្វូងដែលលាក់ខ្លួនក្នុងស្មៅចង្រៃ គុម្ពចេក ឬដំណាំឈើហូបផ្លែផ្សេងទៀតនៅជុំវិញចម្ការ។
បើតាមសេចក្តីជូនដំណឹងដដែលនេះបញ្ជាក់ទៀតថា ក្នុងករណីធ្ងន់ធ្ងរ កសិករអាចរាយការណ៍មកអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ ដោយផ្ទាល់ ឬតាមរយៈលេខទូរសព្ទ ០១២ ៣៣៦ ៩៣៤ ឬ ០១២ ៣៣៥ ៩៥៦ ៕
© រក្សាសិទ្ធិដោយ thmeythmey.com