កម្លាំងនៃការគិតរបស់ពួកយើងម្នាក់ៗ ត្រូវបានគេទទួលស្គាល់ជាច្រើនសតវត្សមកហើយ ។ ក្នុងពេល បច្ចុប្បន្ននេះ យើងបានឈានដល់ដំណាក់កាលមួយដែល អះអាងថា ទស្សនះនៃការគិតជាវិជ្ជមាន ត្រូវបាន ផ្សារភ្ជាប់ទៅនឹងមនុស្សជាតិ ប៉ុន្តែ យើងនៅមិនទាន់ អនុវត្តវាបានទាំងស្រុង និង សម្រេចបាននូវអ្វីដែលយើងអាចធ្វើបាន នៅឡើយទេ។ យើងក៏ត្រូវតែ ចាត់វិធានការណ៍ ក្នុងការកណត់អោយបានថា ការសម្តែងចេញនូវ ភាពជាវិជ្ជមាន គឺមិនត្រឹមតែអាចផ្លាស់ប្តូរ ចំពោះតែ ជីវិតរស់នៅផ្ទាល់ខ្លួនរបស់ពួក យើងម្នាក់ៗនោះទេ ប៉ុន្តែវាក៏បានជះឥទ្ធិពលផងដែរ ទៅកាន់ពិភពលោក និង សង្គមដែលយើងកំពុង តែរស់នៅ ។ ហើយជាដំណាក់កាលដំបូងបំផុតនោះ គឺយើងត្រូវ ធ្វើការចាប់ផ្តើម បង្រៀនកូនៗរបស់ពួក យើង អំពីអត្ថប្រយោជន៍ របស់ការគិតជាវិជ្ជមាន។ ទាំងនេះ គឺជា វិធីប៉ុន្មានយ៉ាង ដែលអាចជួយប្រាប់ អ្នកបានពីយុទ្ធសាស្ត្រ ក្នុងការបណ្តុះនូវគំនិតជាវិជ្ជមាន នៅក្នុងខ្លួនរបស់កូនៗអ្នក ។
១. សើចអោយបានច្រើន
អ្នកត្រូវតែប្រាប់ និង បង្ហាញកូនៗរបស់អ្នក អោយបានដឹងថា គ្មានថ្នាំអ្វីដែលល្អប្រសើរជាង សំណើច នោះទេ។ ប្រសិនបើអ្នកជាមនុស្ស រញុំាំរញ៉ូវច្រើន ហើយកូនៗរបស់អ្នក តែងតែខ្លាចអ្នក និង តែងតែ មានការប្រុងប្រយ័ត្នជានិច្ច នៅពេលដែលអ្នកនៅជិតពូកគេ នោះអ្នកនឹងផ្តល់ផលអាក្រក់ច្រើន ចំពោះ ពួកគេ។ វាប្រាកដហើយថា អ្នកត្រូវតែបង្រៀនពួកគេនូវ ការបែងចែករវាងចំណុចល្អ និង អាក្រក់នៅ ក្នុងជីវិត ប៉ុន្តែមិនមែនដោយការប្រើវិធីគម្រាមកំហែងពួកគេ ដូចជាអ្នកទោសនោះទេ។ អ្នកត្រូវតែសើច អោយបានច្រើន និង ធ្វើអោយជីវិតក្រុមគ្រូសារអ្នក ស្រស់បំព្រង។ ធ្វើដូចនេះកូនៗរបស់អ្នក នឹង បើកចិត្ត ទូលាយចំពោះអ្នក និង ចែករំលែកនូវរាល់បញ្ហាផ្សេងៗរបស់ពួកគេ មកកាន់អ្នក។ ពួកគេនឹង មិនលាក់ អាថ៌កំបាំង ដែលអាចនឹងធ្វើអោយអ្នកបារម្ភពីគេនោះទេ។ សំណើច អាចដោះស្រាយបញ្ហា ដែលកូន របស់អ្នកចាំបាច់ត្រូវ រៀនពីវា ។
២. ត្រូវមានភាពសាទរនឹងអ្វីដែលសម្រេចបាន
អ្នកត្រូវតែបង្ហាញនូវ ភាពរីករាយទៅនឹងអ្វីដែលអ្នកត្រូវធ្វើ បើទោះជាអ្នកត្រូវ ធ្វើវាក្រោមសម្ពាធអ្វី មួយក៏ដោយ។ កូនរបស់អ្នក ត្រូវតែរៀនចងចាំថា ការងារដែលធ្វើជាមួយនឹងភាពសាទរ គឺនឹងត្រូវ សម្រេចបានជោគជ័យល្អ ។ ចំណុចផ្សេងៗម្យ៉ាងទៀត គឺថា អ្នកត្រូវបង្រៀនពួកគេ ដោយមិនត្រូវអោយ រអ៊ូរទាំនឹង កិច្ចការដែលពួកគេត្រូវធ្វើជាបន្ត ដោយសារតែវានឹងមិនបាន ផលចំណេញវិញអ្វីនោះទេ ក្រៅតែពីរំខានពេលវេលា និង បំផ្លាញការតាំងចិត្ត និង ភាពអំណត់របស់យើងម្នាក់ៗ ។ ផ្ទុយមកវិញ ពួកគេត្រូវចងចាំថា ការងារត្រូវតែធ្វើ ជាមួយនឹងការតាំងចិត្ត សាទរ ដើម្បីអោយពួកគេ ទទួលបានជោគ ជ័យ និង ភាពរីករាយមកវិញ ។
៣. ត្រូវចេះមានសុជីវធម៌
កូនៗរបស់អ្នក នឹងធ្វើតាមនូវអ្វីដែលអ្នកបានធ្វើ តាមរយៈ ការអង្កេតរបស់ពួកគេ មកលើអ្នក។ ដូច្នេះ ខ្លួនអ្នកត្រូវតែ មានការប្រុងប្រយ័ត្នខ្ពស់ អំពីអកប្បកិរិយាផ្ទាល់ខ្លួនរបស់អ្នក ជាមួយនឹងមនុស្សដែលនៅ ជុំវិញខ្លួន។ ត្រូវមានសុជីវធម៌ ជាមួយនឹងអ្នករាល់គ្នា និង សម្តែងនូវការគោរព មិនថា ក្នុងចិត្តអ្នក ចូលចិត្ត ឬ មិន ចូលចិត្តពួកគេក៏ដោយ ។ ការគួរសម គឺជាមេរៀនដ៏សំខាន់ មួយដែលកូនៗរបស់អ្នក ត្រូវតែត្រង ត្រាប់តាម នៅក្នុងវ័យក្មេងខ្ចីរបស់ពួកគេ តាមដែលវានឹងស្តែងចេញជារៀងរហូត នូវរបៀបនៃការរស់នៅ និង បែបបទនៃការរីកធំធាត់របស់ពួកគេ ។
៤. ផ្តោតទៅលើលក្ខណៈឬកពារ ជាវិជ្ជមានរបស់បុគ្គលម្នាក់ៗ
វាគ្មានអ្វីដែលគួរអោយ សង្ស័យនោះទេថា នៅក្នុងជីវិតអ្នក មានមនុស្សដែលអ្នកស្អប់ ឬ មិនពេញចិត្ត ប៉ុន្តែអ្នកមិនត្រូវ សម្តែងចេញនូវ ភាពស្អប់ខ្ពើមទាំងនេះ ចំពោះមុខកូនៗរបស់អ្នកនោះទេ ។ អ្នកត្រូវ បង្រៀនពួកគេ អោយចេះនូវការគោរព និងផ្តោតទៅលើបុគ្គលិកលក្ខណៈជាវិជ្ជមាន របស់មនុស្សម្នាក់ៗ មិនថា ពួកគេមានចំណុចមិនសមរម្យផ្សេងទៀតនោះឡើយ។ វានឹងជួយបង្រៀនពួកគេ អោយចេះ ផ្តល់តម្លៃចំពោះ បុគ្គលម្នាក់ៗ និង ទស្សនះជាវិជ្ជមាននៅក្នុងជីវិតរស់នៅប្រចាំថ្ងៃ របស់ពួកគេ ។
៥. បង្ហាញនូវក្តីស្រលាញ់ចំពោះមនុស្សរាល់គ្នា
ត្រូវបង្ហាញនូវ សេចក្តីស្រលាញ់រាប់អាន អោយបានច្រើន។ បញ្ចេញនូវទំហំនៃការស្រលាញ់របស់អ្នក ចំពោះក្រុមគ្រូសារ និង មិត្តភក្តិ ហើយដូចនេះ កូនៗរបស់អ្នក នឹងចាប់យកនូវ បុគ្គលិកលក្ខណៈនិស្ស័យ នេះពីអ្នក និង រៀនស្រលាញ់មនុស្សជុំវិញខ្លួន ដោយគ្មានលក្ខខណ្ឌ។ កូនរបស់អ្នក ត្រូវតែដឹងថា គ្មាន កម្លាំងថាមពលណា ដែលខ្លាំងអស្ចារ្យ ដូចជាក្តីស្រលាញ់ពិតប្រាកដនោះទេ ហើយនៅពេលដែលអ្នក ចេះផ្តល់ក្តីស្រលាញ់ វានឹងត្រលប់មករកអ្នកវិញ កាន់តែច្រើន ។ ចុងក្រោយនោះគឺថា ក្តីស្រលាញ់ គឺជា វិធីដ៏ប្រសើរ ក្នុងការបណ្តុះនូវភាពជាវិជ្ជមាន នៅក្នុងខ្លួនរបស់កូនៗអ្នក ។
ដោយការអនុវត្តតាមនូវ វិធីដ៏មានប្រសិទ្ធិភាពខាងលើនេះ នោះអ្នកនឹងអាចជួយកូនៗរបស់អ្នក អោយ រីកធំធាត់ លូតលាស់បានល្អ និង ទទួលបាននូវសុភមង្គលពិតប្រាកដ ជាមួយនឹងទស្សនះវិជ្ជមាន ជារៀងរហូតបាន នៅក្នុងជីវិតរបស់ពួកគេ៕