អន្តរជាតិ
រដ្ឋមន្ត្រីមហាផ្ទៃសិង្ហបុរី៖ រដ្ឋាភិបាលមានកាត្វកិច្ចការពារប្រជាជន ដោយមិនរើងអើង
× ការបាញ់ប្រហារនៅក្លឹបកំសាន្ត ក្នុងទីក្រុង Orlando ធ្វើឲ្យពិភពលោក តក់ស្លុតយ៉ាងខ្លាំង។ រដ្ឋាភិបាលប្រទេសជុំវិញពិភពលោក បានដាក់វិធានការការពារប្រជាជនរបស់ខ្លួន ពីការវាយប្រហារណាមួយផងដែរ។ នៅឯសិង្ហបុរីឯណោះវិញ រដ្ឋាភិបាលប្រទេសនេះ ប្រកាសថា ខ្លួននឹងការពារប្រជាជនរបស់ខ្លួន ដោយគ្មានការរើសអើងអ្វីទាំងអស់។
រដ្ឋមន្ត្រីមហាផ្ទៃ និងច្បាប់សិង្ហបុរី លោក K Shanmugam នៅថ្ងៃទី១៤ ខែមិថុនា និយាយថា រដ្ឋាភិបាលសិង្ហបុរី មានកាត្វកិច្ចការពារប្រជាជន ពីការគំរាមវាយប្រហារ និងអំពើហិង្សាទាំងឡាយ ដោយមិនគិតពីជាតិសាសន៍ សាសនា និងភេទអ្វីទាំងអស់។ លោក K Shanmugam លើកឡើងដូចនេះ បន្ទាប់ពីការបាញ់រះលើក្លឹបអ្នកស្រលាញ់ភេទដូចគ្នា នៅទីក្រុង Orlando ដែលបណ្ដាលឲ្យមនុស្ស៥០នាក់ បាត់បង់ជីវិត។
ទាក់ទិននឹងការបាញ់ប្រហារនៅ Orlando រដ្ឋមន្ត្រីរូបនេះ និយាយទៀតថា អំឡុងពេលដែលមូលហេតុ នៃការបាញ់ប្រហារ នៅមិនទាន់ដឹងនោះ វាបានបង្ហាញថា សហគមន៍អ្នកស្រលាញ់ភេទដូចគ្នា ជាគោលដៅនៃការបាញ់នេះ។ លោក ក៏ចាត់ទុកហេតុការណ៍នេះ ជារឿងមិនអាចទទួលយកបាន ដោយលោក អះអាងថា អំពើហិង្សា ប្រឆាំងនឹងក្រុមមនុស្សណាមួយ គឺមិនទទួលយកបានទេ។
«នៅទីនេះ (សិង្ហបុរី) រដ្ឋាភិបាលនឹងចាត់វិធានការណ៍ភ្លាមៗ និងដាច់ណាត់ ប្រសិនបើមានការគំរាមកំហែង លើបុគ្គល ឬក្រុមណាមួយ។ កាត្វកិច្ចរបស់រដ្ឋាភិបាល គឺការពារប្រជាជនទាំងអស់។ ពូជសាសន៍ សាសនា និងភេទ មិនពាក់ព័ន្ធ នឹងកាត្វកិច្ចរដ្ឋាភិបាលទេ»។ នេះជាការលើកឡើងរបស់លោក K Shanmugam ដែលត្រូវបានផ្សាយដោយសារព័ត៌មាន Today។
ជាមួយគ្នានោះដែរ រដ្ឋមន្ត្រីរូបនេះ ក៏ប្រាប់ឲ្យដឹងដែរថា គ្រោះថ្នាក់នៃការវាយប្រហារពីក្រុមជ្រុលនិយម ធ្លាប់កើតមាននៅសិង្ហបុរី។ ប៉ុន្តែ ចំពោះរូបលោក ដំណោះស្រាយនៃបញ្ហានេះ គឺការអប់រំ ដោយអប់រំប្រជាជន ឲ្យយល់ និងប្រឆាំង សកម្មភាពណាដែលនាំដល់ការក្លាយខ្លួន ជាមនុស្សជ្រុលនិយម។
នៅក្នុងយុទ្ធនាការប្រឆាំងនឹងអំពើហិង្សានិយម លោក លោក K Shanmugam សង្កត់ធ្ងន់ថា ការងារនេះ ត្រូវមានការចូលរួមពីគ្រប់ភាគីទាំងអស់ ដ្បិតរដ្ឋាភិបាល មិនអាចសម្រចការងារនេះ តែម្នាក់ឯងទេ។ លោកបន្តទៀតថា ប្រជាជនត្រូវត្រៀមលក្ខណៈឲ្យស្រេចបាច់ ទាំងអស់គ្នា ដើម្បីជួយលើបញ្ហានេះ។ យ៉ាងណាមិញ រដ្ឋមន្ត្រីមហាផ្ទៃរូបនេះ បញ្ជាក់ដែរថា វិធានការទាំងអស់របស់រដ្ឋាភិបាល មិនអាចធានាថា ប្រជាជនសិង្ហបុរី រួចខ្លួនពីការវាយប្រហារណាមួយនោះទេ៕
Tag:
សិង្ហបុរី
ភេរវកម្ម
© រក្សាសិទ្ធិដោយ thmeythmey.com