បើទោះជាមានការរិះគន់ពីសហគមន៍អន្តរជាតិក៏ដោយ រដ្ឋាភិបាលឥណ្ឌូណេស៊ី មានផែនការប្រហារជីវិតអ្នកទោស ១៦នាក់ ដែលកំពុងតែតែរង់ចាំការអនុវត្តទោសនេះ។ មន្ត្រីឥណ្ឌូណេស៊ី និយាយនៅថ្ងៃទី១៤ ខែមិថុនា ថា ការប្រហារជីវិត នឹងធ្វើបន្ទាប់ពីការបញ្ចប់ពិធីបុណ្យរ៉ាម៉ាដន ដែលនឹងបញ្ចប់នៅខែកក្កដា។
អ្នកនាំពាក្យការិយាល័យរដ្ឋអាជ្ញា លោក Mohammad Rum ថ្លែងប្រាប់សារព័តមាន AFP ថា អ្នកទោស ១៦នាក់ នឹងត្រូវប្រហារជីវិតភ្លាម នៅក្រោយពិធីបុណ្យរ៉ាម៉ាដន ប៉ុន្តែលោក មិនបានបញ្ជាក់ថ្ងៃខែ ច្បាស់លាស់នោះទេ។ ប៉ុន្តែ យោងតាមថ្ងៃខែរបស់ឥស្លាម ពិធីបុណ្យរ៉ាម៉ាដន នឹងបញ្ចប់នៅថ្ងៃទី៦ និងទី៧ ខែកក្កដាខាងមុខ។
អ្នកនាំពាក្យរូបនេះ ក៏មិនបានបញ្ជាក់ពីអ្នកទោស ដែលនឹងត្រូវប្រហារជីវិតទេ។ ប៉ុន្តែ ពួកគេ ទំនងជាអ្នកពាក់ព័ន្ធ នឹងថ្នាំញៀន ខណៈដែលឥណ្ឌូណេស៊ី កំពុងតែបោសសម្អាតក្រុមរត់ពន្ធថ្នាំញៀន ហើយក្នុងឆ្នាំ២០១៥ ប្រទេសនេះ ប្រហារជីវិតអ្នកទោសគ្រឿងញៀនចំនួន១៤នាក់ ដែលភាគច្រើនជាជនបរទេស។
សូមរម្លឹកថា ឥណ្ឌូណេស៊ី បានផ្អាកការប្រហារជីវិត តាំងពីខែមេសា ឆ្នាំ២០១៥ ដោយអះអាងថា ខ្លួនផ្អាកទោសប្រហារជីវិត ព្រោះចង់ផ្ដោតលើការដោះស្រាយវិបត្តិសេដ្ឋកិច្ច ដែលមានកំណើនយឺត។ ជាមួយនឹងការចាប់ផ្ដើមឡើងវិញនេះ លោក Rum បកស្រាយថា យើងមិនអាចធ្វើរឿងនេះលឿនបានទេ ព្រោះរដ្ឋាភិបាល កំពុងតែស្រោចស្រង់សេដ្ឋកិច្ច ប៉ុន្តែឥឡូនេះ យើង អាចធ្វើសកម្មភាពបានខ្លះៗ បន្ទាប់ពីបុណ្យរ៉ាម៉ាដន។
អ្នកនាំពាក្យដដែលបន្តថា អ្នកទោសទាំងអស់ ទំនងជាត្រូវប្រហារជីវិតដោយការបាញ់ នៅឯគុកលើកោះ Nusakambangan ជាទីដែល ការប្រហារជីវិត តែងធ្វើនៅទីនោះ។ មានអ្នកទោសជាច្រើន កំពុងរង់ចាំការប្រហារជីវិត នៅឥណ្ឌូណេស៊ី រួមទាំងជនជាតិបារាំងឈ្មោះ Serge Atlaoui និងស្ត្រីជនជាតិហ្វីលីពីន Mary Jane Veloso ដែលមិនបានប្រហារជីវិត។ ចំណែកស្ត្រជនជាតិអង់គ្លេស Lindsay Sandiford កំពុងតែរង់ចាំការប្រហារជីវិតលើកោះបាលី បន្ទាប់ពីត្រូវបានចាប់ខ្លួន ជាមួយនឹងកញ្ចប់កូកាអ៊ីនយ៉ាងធំ។
ឥណ្ឌូណេស៊ី ចេញយុទ្ធនាការខ្លាំងក្លាប្រឆាំង នឹងគ្រឿងញៀន ជាពិសេស ចាប់តាំងពីលោក ចូកូ វីដូដូ (Joko Widodo) ចូលកាន់តំណែងក្នុងឆ្នាំ២០១៤។ លោក វីដូដូ និយាយថា ឥណ្ឌូណេស៊ី ប្រឈមមុខនឹងស្ថានភាពអាសន្ន ដោយសារការកើនឡើងការប្រើប្រាស់ថ្នាំណាកូទីន ហើយអ្នកជួញដូរ គួរតែពិន័យឲ្យធ្ងន់ធ្ងរ។
កាលពីឆ្នាំ២០១៥ ការប្រហារជីវិត ធ្វើឡើចំនួនពីរដង។ ការប្រហារជីវិតជុំទីពីរ ដែលធ្វើនៅខែមេសា មានជនជាតិអូស្ត្រាលីពីរនាក់ ប្រេស៊ីលម្នាក់ និងនីហ្សេរីយ៉ាបួននាក់ ដែលរឿងនេះ បង្កជាជម្លោះការទូតយ៉ាងខ្លាំង។ អូស្ត្រាលី បានកោះហៅអគ្គរដ្ឋទូតរបស់ខ្លួន ចូលស្រុកវិញ បន្ទាប់ពីឥណ្ឌូណេស៊ីប្រហារជីវិតជនជាតិខ្លួនពីរនាក់ គឺ Andrew Chan និង Myuran Sukumaran ដែលជាង្នករត់ពន្ធគ្រឿងញៀន៕
Following the executions of the Australian drug smugglers, , Canberra temporarily recalled its ambassador from Jakarta.