អន្តរជាតិ
×![]()
ដោយ: តន ចាន់រិទ្ធារ៉ា
មន្ត្រីជាន់ខ្ពស់របស់ក្រុមចលនាឃឺដ លើកឡើងថា អ៊ីរ៉ាក់គួរតែបែងចែក តំបន់គ្រប់គ្រង នៅក្រោយការចាកចេញរបស់ក្រុមរដ្ឋឥស្លាម។ ការលើកឡើងនេះ ធ្វើឡើង ខណៈដែលក្រុមសកម្មជនរដ្ឋឥស្លាម បានបាត់បង់ទឹកដីរបស់ខ្លួនជាច្រើន នៅក្រោយប្រតិបត្តិការរំដោះ ទាំងក្នុងទឹកដីអ៊ីរ៉ាក់ និងស៊ីរី។ 
ដើម្បីចៀសវាងជម្លោះជនជាតិនៅអ៊ីរ៉ាក់ មន្ត្រីជាន់ខ្ពស់នេះរដ្ឋាភិបាលតំបន់ឃឺដ នៅថ្ងៃទី១៦ ខែមិថុនា និយាយ ថា បន្ទាប់ពីកម្ចាត់ក្រុមជ្រុលនិយមបានហើយ ប្រទេសអ៊ីរ៉ាក់ គួរតែបំបែក ទៅជាតំបន់ត្រួតត្រាចំនួនបីផ្សេងគ្នា។ តំបន់ទាំងបីនោះ នឹងគ្រប់គ្រងដោយ ក្រុមស៊ីអ៊ីត មូស្លីមស៊ូនី និងក្រុមចលនាឃឺដ ដែលនេះ អាចលុបបំបាត់អំពើហិង្សាជនជាតិបាន។
នៅរយៈពេលចុងក្រោយនេះ កងកម្លាំងអ៊ីរ៉ាក់ បានបោសសម្អាតក្រុមជ្រុលនិយមរដ្ឋឥស្លាម ចេញពីទីក្រុងជាច្រើន ដែលក្រុមនេះធ្លាប់ត្រួតត្រា ចាប់តាំងពីឆ្នាំ២០១៤មក។ នៅពេលនេះ កងទ័ពអ៊ីរ៉ាក់ កំពុងសម្រុកទៅកាន់ទីក្រុងMosul ដែលជាទីក្រុងធំជាងគេ ក្រោមការគ្រប់គ្រងរបស់សកម្មជនរដ្ឋឥស្លាម ហើយប្រសិនបើទីក្រុងនេះដួលរលំ វាក៏មានន័យថា ក្រុមជ្រុលនិយមមួយនេះ ឈានមកដល់ទីបញ្ចប់ដែរហើយ។
យ៉ាងណាមិញ ទីបញ្ចប់របស់ក្រុមរដ្ឋឥស្លាម មិនមែនមានន័យថា អំពើហិង្សានៅអ៊ីរ៉ាក់ ចប់ដែរនោះទេ។ អ៊ីរ៉ាក់ នៅតែបែកជាក្រុមតូចៗ ហើយក្រុមនីមួយៗ បន្តប្រយុទ្ធគ្នា ខណៈដែលការបែងចែកអំណាច មិនបាននាំសន្តិភាព ដល់ប្រទេសមួយនេះទេ។
ទាក់ទិននឹងបញ្ហានេះ លោក Masrour Barzani ប្រធានក្រុមប្រឹក្សាសន្តិសុខ នៃរដ្ឋាភិបាលតំបន់ឃឺដ និយាយថា កម្រិតនៃការមិនទុកគ្នានៃក្រុមផ្សេងៗ គឺមិនអាចឲ្យពួកគេនៅក្រោមដំបូលតែមួយនោះទេ។ ក្នុងកិច្ចសម្ភាសន៍ជាមួយ Reuters នៅថ្ងៃទី១៥ ខែមិថុនា លោក Barzani និយាយដែរថា ប្រព័ន្ធគ្រប់គ្រងបែបសហព័ន្ធ (Federation) មិនមានប្រសិទ្ធភាពទេ ដូច្នេះវាមានតែ ប្រព័ន្ធគ្រប់គ្រងបែបសម្ព័ន្ធភាព (Confederation) ឬក៏បំបែកជារដ្ឋឯករាជ្យតែម្ដង។ លោកបន្តថា ៖«ប្រសិនបើមានរដ្ឋជាលក្ខណៈសម្ព័ន្ធភាព ចំនួនបីដាច់ពីគ្នា ក្រុមទាំងបី ក៏មានរដ្ឋធានីបីដែរ ដូចនេះ ពួកគេស្មើគ្នា មិនមានអ្នកណាធំជាងឡើយ»។
តាមពិតទៅ ក្រុមចលនាឃឺដ កំពុងតែអនុវត្តនយោបាយរបស់ខ្លួន សម្រាប់គោលដៅប្រកាសឯករាជ្យ ពីអ៊ីរ៉ាក់។ ក្រុមនេះ កំពុងគ្រប់គ្រងតំបន់ភាគខាងជើងអ៊ីរ៉ាក់ ហើយថែមទាំងមានកងទ័ពខ្លួនឯងទៀតផង។ ហើយកងទ័ពនេះ ក៏ចូលរួមក្នុងប្រតិបត្តិការប្រយុទ្ធប្រឆាំង នឹងក្រុមជ្រុលនិយមរដ្ឋឥស្លាមផងដែរ។
យ៉ាងណាក្ដី សំណើរបស់លោក Masrour Barzani ទំនងជាមិនអាចកើតឡើងនោះទេ។ ក្រុមស៊ូនី បញ្ជាក់ថា ផែនការរបស់មេដឹកនាំឃឺដ ពិតជាពិបាកអនុវត្តណាស់។ នេះក៏ដោយសារតែ ក្រុមជនស៊ូនី រស់នៅរប៉ាត់រប៉ាយពីគ្នា និងភាគច្រើនរស់នៅតំបន់របស់ក្រុមស៊ីអ៊ីត ដែលនេះ ធ្វើឲ្យបញ្ហាកាន់តែស្មុគស្មាញ៕
Tag:
ក្រុមរដ្ឋឥស្លាម
អ៊ីរ៉ាក់
ឃឺដ
ស៊ូនី
© រក្សាសិទ្ធិដោយ thmeythmey.com
