ជាតិ
ព័ត៍មានសុខភាព
×![]()
ភ្នំពេញ៖ ការទទួលទាន ម្រុម អាចផ្ដល់អត្ថប្រយោជន៍មួយចំនួនចំពោះសុខភាពរបស់ប្រជាពលរដ្ឋ ដោយសាររុក្ខជាតិនេះមានជីវជាតិខ្ពស់ និងសារជាតិម្យ៉ាងអាចជម្រះជាតិពុល ឬក៏បញ្ចុះជាតិស្ករ នៅក្នុងឈាមសម្រាប់អ្នកកើតជំងឺទឹកនោមផ្អែម។ ប៉ុន្តែប្រជាពលរដ្ឋដែលនិយមប្រើប្រាស់ម្រុម មិនគួរច្រឡំថា ម្រុមគឺជាឱសថសម្រាប់ព្យាបាលជំងឺនោះទេ។
ថ្លែងប្រាប់ក្នុងបទសម្ភាសន៍ជាមួយវីអូអេដែលចុះផ្សាយកាលពីថ្ងៃទី១៧ ខែមិថុនាកន្លងទៅ លោកវេជ្ជបណ្ឌិត តាំង តេកហុង មិនបានបដិសេធចំពោះការយកម្រុមមកធ្វើជាថ្នាំនោះទេ ប៉ុន្តែលោកឲ្យពលរដ្ឋខ្មែរគួរកុំយកម្រុមនេះមកធ្វើជាថ្នាំ តែត្រូវយកម្រុមមកធ្វើជាអាហារជំនួយ ដើម្បីរក្សាសុខភាពទើបជាការប្រសើរ។
លោកវេជ្ជបណ្ឌិតខ្មែរអាមេរិកាំងរូបនេះ ដែលរស់នៅ Jacksonville រដ្ឋ Florida បានបញ្ជាក់ថា៖ «នៅក្នុងវិជ្ជាពេទ្យដែលគេបានស្រាវជ្រាវ ចំពោះម្រុមហ្នឹង វាមានការរកឃើញថា កន្លែងខ្លះត្រឹមត្រូវ ប៉ុន្តែភាគច្រើនដែលគេនិយមប្រើអះអាងថា ជានេះ ជានោះ គឺមិនទាន់មានក្បួនពេទ្យណាមួយ ធ្វើការស្រាវជ្រាវបានច្បាស់លាស់ ដើម្បីបញ្ជាក់ថា ម្រុមហ្នឹងអាចប្រើបានជាថ្នាំពិតប្រាកដនោះទេ។ ខ្ញុំសូមបញ្ជាក់មួយទៀតថា ការដែលប្រើគ្រាប់ម្រុមជាថ្នាំហ្នឹង វាមានបញ្ហាមួយទៀត គឺបញ្ហានៅត្រង់ថា យើងមិនដឹងកម្រិតនៅក្នុងការប្រើប្រាស់ ព្រោះកម្លាំងនៅក្នុងម្ស៉ៅដែលយើងយកមកនោះវាមិនដូចគ្នាទាំងអស់នោះទេ ហើយវាមិនបានធ្វើទៅតាមវិធីពេទ្យត្រឹមត្រូវ»។
លោក វេជ្ជបណ្ឌិត តាំង តេកហុង បានឲ្យតម្លៃទៅលើម្រុមថាជា អាហារ ជាបន្លែ គឺប៉ុន្តែមិនមែនជាឱសថសម្រាប់ព្យាបាលជំងឺ ដូចដែលពលរដ្ឋកុំពុងតែប្រើប្រាស់ម្រុមជាថ្នាំសម្រាប់ព្យាបាលជំងឺនោះទេ។ នៅក្នុងបទសម្ភាសន៍ជាមួយវីអូអេ លោកវិជ្ជបណ្ឌិត តាំង តេងហុង ក៏បានបញ្ជាក់យ៉ាងដូច្នេះថា៖ «ម្រុមគឺជារុក្ខជាតិដែលមានជីវជាតិខ្ពស់ ជាពិសេស គឺជីវជាតិប្រូតេអ៊ីនច្រើន មានជាតិប្រេងដែលជួយច្រើន មានជាតិវីតាមីនច្រើនយ៉ាង មានជាតិរ៉ែ កាលស្យូម និងជាពិសេសគឺជាតិដែក ដែលខ្ញុំឲ្យតម្លៃខ្ពស់ចំពោះការយកម្រុមមកធ្វើជាអាហារ»។
គួរបញ្ជាក់ថា នៅកម្ពុជាបច្ចុប្បន្ននេះ ម្រុមគឺមានការនិយមខ្លាំងណាស់ក្នុងការប្រើប្រាស់សម្រាប់ធ្វើជាថ្នាំសម្រាប់ព្យាបាលជំងឺផ្សេងៗ។ ប៉ុន្តែពលរដ្ឋខ្មែរ គួរតែប្រុងប្រយ័ត្នបន្ថែមទៀត ចំពោះការប្រើប្រាស់ផលិតផលនេះ ប្រសិនបើមិនមានការបញ្ជាក់ច្បាស់លាស់ពីខាងវេជ្ជសាស្ត្រ ពីព្រោះវាអាចបង្កគ្រោះថ្នាក់ដល់សុខភាពអ្នកប្រើប្រាស់បាន៕
Tag:
ម្រុម
សុខភាព
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ថ្ងៃ
