អន្តរជាតិ
ប៊ុលហ្គារី មិនឯកភាពឲ្យកងនាវាណាតូមានមូលដ្ឋានអចិន្ត្រៃយ៍នៅសមុទ្រខ្មៅទេ ប្រមុខរដ្ឋាភិបាលប៊ុលហ្គារី លោក Boyko Borissov
× នាយករដ្ឋមន្ត្រីប៊ុលហ្គារី បានប្រកាន់ជំហរដាច់ណាត់របស់ប៊ុលហ្គារី ប្រឆាំងនឹងសំណើដែលចង់ឲ្យកងនាវាណាតូ តាំងនៅសមុទ្រខ្មៅជាអចិន្ត្រៃយ៍ ដើម្បីទប់ទល់នឹងកងទ័ពរុស្សី ក្នុងតំបន់នេះ ដោយអះអាងថា ការតាំងមូលដ្ឋាននេះ នឹងបង្កើនកម្ដៅជម្លោះ ហើយថែមទាំងប៉ះពាល់ដល់វិស័យទេសចរណ៍ នៅក្នុងសមុទ្រនេះទៀតផង។
ប្រមុខរដ្ឋាភិបាលប៊ុលហ្គារី លោក Boyko Borissov បានបដិសេធសំណើរបស់ប្រធានាធិបតីរូម៉ានី លោក Klaus Iohannis ដែលចង់ឲ្យតួកគី ប៊ុលហ្គារី អ៊ុយក្រែន និងរូម៉ានីផ្ទាល់ រួមគ្នាស្នើទៅកិច្ចប្រជុំកំពូលណាតូ នៅប៉ូឡូញ ដើម្បីឲ្យណាតូ មានមូលដ្ឋានយូរអង្វែង ក្នុងសមុទ្រខ្មៅ។ លោក Boyko Borissov បញ្ជាក់ថា សំណើនេះ នឹងនាំឲ្យសមុទ្រខ្មៅ ក្លាយជាតំបន់សង្គ្រាម ហើយអ្វីដែលលោក ចង់ឃើញនោះ គឺនាវាទេសចរណ៍ កប៉ាល់កំសាន្ត ជាជាងនាវាចម្បាំង។
ការបដិសេធនេះ ធ្វើឡើងបន្ទាប់ពីប្រធានាធិបតីរូម៉ានី Klaus Iohannis លើកជាសំណើឲ្យប្រទេសទាំងបួនរូមដៃគ្នា ស្នើទៅណាតូ ខណៈលោក ទស្សនកិច្ចនៅប៊ុលហ្គារី កាលពីថ្ងៃទី១៥ ដល់ទី១៦ ខែមិថុនា។ បើតាមសារព័ត៌មាន Bloomberg គោលដៅនៃការសំចតកងនាវាណាតូ គឺដើម្បីឆ្លើយតបការឈ្លានពានរបស់រុស្សី នៅភាគខាងកើតអ៊ុយក្រែន ក៏ដូចជាពង្រាយទ័ពប្រទេសនេះផងដែរ។
ការលេបយកតំបន់គ្រីមេ ក្នុងឆ្នាំ២០១៤ និងជម្លោះភាគខាងកើតអ៊ុយក្រែន ក្បែរព្រំដែនប្រទេសជាសមាជិកណាតូ ជាមូលហេតុសំខាន់ ដែលនាំឲ្យអាមេរិកចល័តទ័ព នៅក្នុងតំបន់អឺរ៉ុបប៉ែកខាងកើត និងការលេចជារូបរាងផែនការពង្រាយកងកម្លាំងបន្ថែមជាដើម។ ជាមួយគ្នានោះ ដើម្បីការពារប្រទេសអតីតសហភាពសូវៀតខ្លះ ពីការវាយប្រហាររបស់រុស្សី សម្ព័ន្ធណាតូ កាលពីសប្ដាហ៍មុន សម្រេចចិត្តពង្រាយទ័ពប្រមាណបួនពាន់នាក់ ទៅកាន់ប៉ូឡូញ និងរដ្ឋនៅតំបន់បាល់កង់ចំនួនបីផ្សេងទៀត ដែលមានព្រំដែនជាប់រុស្សី។
យ៉ាងណាមិញ នាយករដ្ឋមន្ត្រីប៊ុលហ្គារី លោក Boyko Borissov បានប្រាប់អ្នករាយការណ៍ព័តមាន នៅថ្ងៃទី១៦ ខែមិថុនា ថា ការបញ្ជូននាវាចម្បាំង ដើម្បីប្រឆាំងនឹងនាវារុស្សី លើសពីអ្វីដែលលោកអាចអនុញ្ញាតបាន។ ចំណែក ការពង្រាយកប៉ាល់ចម្បាំង ឬនាវាដឹកយន្តហោះនៅទីក្រុង Bourgas ឬ Varna នៅរដូវដែលសម្បូរទេសចរបែបនេះ ក៏មិនអាចទទួលយកបានដែរ។ លោកបន្តទៀតថា ប៊ុលហ្គារី នឹងមិនក្លាយជាផ្នែកនៃកងនាវាសមុទ្រខ្មៅ ដែលរៀបចំដើម្បីសំដៅលើរុស្សី នោះទេ។
សូមរម្លឹកដែរថា ក្រៅពីការបដិសេធរបស់ប៊ុលហ្គារី ការតាំងមូលដ្ឋានអចិន្ត្រៃយ៍ណាមួយ ក្នុងតំបន់សមុទ្រខ្មៅក៏ពិបាកកើតឡើងដែរ។ បើយោងតាមអនុសញ្ញា Montreux ឆ្នាំ១៩៣៦ ប្រទេសដែលគ្មានឆ្នេរជាប់សមុទ្រខ្មៅ មិនអាចចតនាវាចម្បាំងក្នុងតំបន់នេះ លើសរយៈពេល២១ថ្ងៃនោះទេ។ តួកគី រូម៉ានី និងប៊ុលហ្គារី សុទ្ធតែមានឆ្នេរជាប់សមុទ្រខ្មៅ ខណៈដែលរុស្សីមានមូលដ្ឋានកងនាវាចរណ៍របស់ខ្លួន នៅតំបន់គ្រីមេរួចស្រេច៕
Tag:
ប៊ុលហ្គារី
ណាតូ
រូម៉ានី
សមុទ្រខ្មៅ
© រក្សាសិទ្ធិដោយ thmeythmey.com