អន្តរជាតិ
ប្រធានាធិបតីចិន ទទួលបានទាំងបាតុកម្មប្រឆាំងនិងការស្វាគមន៍ ក្នុងដំណើរទៅប៉ូឡូញ
× មានទាំងអ្នកប្រឆាំង មានទាំងអ្នកស្វាគមន៍ ចំពោះប្រធានាធិបតីចិន លោក ស៊ី ជិនពីង ខណៈដែលលោកទៅដល់ប៉ូឡូញ នៅថ្ងៃទី១៩ ខែមិថុនា។ ដំណើរទស្សនកិច្ចនេះ ទំនងជាផ្ដោតលើការពង្រឹងទំនាក់ទំនងប្រទេសទាំងពីរ ការផ្លាស់ប្ដូរពាណិជ្ជកម្ម និងការវិនិយោគផងដែរ។
ប្រធានាធិបតីចិន លោក ស៊ី ជិនពីង បានចាប់ផ្ដើមទស្សនកិច្ចផ្លូវការបីថ្ងៃ ទៅកាន់ប៉ូឡូញ ដែលស្ថិតក្នុងតំបន់អឺរ៉ុបប៉ែកខាងកើត។ អ្វីដែលគួរឲ្យចាប់អារម្មណ៍នោះ នៅតាមដងផ្លូងពីព្រលានយន្តហោះ ឆ្ពោះទៅកាន់ក្រុងវ៉ាសូវី គេសង្កេតឃើញមានក្រុមបាតុករជាច្រើន បានកាន់បដា ប្រឆាំងនឹងប្រធានាធិបតីរូបនេះ ខណៈអ្នកគាំទ្ររូបលោក ឈររង់ចាំនៅឯសណ្ឋាគារ។
ក្រុមអ្នកប្រឆាំង បានទាមទារឲ្យរដ្ឋាភិបាលក្រុងប៉េកាំង បញ្ឈប់ការរឹតត្បិតលើក្រុមសាសនា Falung Gong ខណៈដែលសាសនានេះ ត្រូវបានហាមឃាត់គោរព ក្នុងប្រទេសចិន។ មនុស្សជាច្រើន ដែលដើរតាមសាសនានេះ ត្រូវបានរដ្ឋាភិបាលកុម្មុយនីស្ត ចាប់ខ្លួន និងដាក់ទោស ជាបន្តបន្ទាប់។
ងាកមកលោក ស៊ី ជិនពីង វិញ ក្នុងដំណើរបីថ្ងៃ ដែលចាប់ផ្ដើមពីថ្ងៃទី១៩ ប្រធានាធិបតីចិន នឹងជួបជាមួយប្រធានាធិបតីប៉ូឡូញ លោក Andrzej Duda និងនាយករដ្ឋមន្ត្រី លោកស្រី Beata Szydlo។ ប្រធានបទផ្លាស់ប្ដូរពាណិជ្ជកម្ម និងការវិនិយោគ នឹងគ្របដណ្ដប់លើក្នុងដំណើរទស្សនកិច្ចនេះ។ ជាមួយគ្នានេះដែរ កិច្ចព្រមព្រៀងជាច្រើន រំពឹងថា នឹងត្រូវបានចុះហត្ថលេខា ដោយរួមទាំងការលុបបំបាត់ពន្ធបន្ថែម (VAT) រវាងប្រទេសទាំងពីរ ព្រមទាំងជំរុញការនាំចេញផលិតផលប៉ូឡូញ ចូលទីផ្សារចិនផងដែរ។
ក្រៅពីនេះ ប្រធានាធិបតីចិន រួមជាមួយសមភាគីប៉ូឡូញ នឹងចូលរួមក្នុងវេទិកាផ្លូវសូត្រ ២០១៦ ដែលជាវេទិកាទាក់ទាញអ្នកវិនិយោគចិន និងអឺរ៉ុប។ បើតាមទីភ្នាក់ងារព័ត៌មាន AFP ក្រុងវ៉ាសូវី ចង់បង្កើនពាណិជ្ជកម្មជាមួយចិន តាមរយៈការភ្ជាប់រថភ្លើងរវាងទីក្រុង Lodz ភាគកណ្ដាលប៉ូឡូញ និងទីក្រុង Chengdu ដើម្បីនាំចេញទំនិញកាន់តែច្រើនបន្ថែមទៅទីផ្សារចិន។
លោក ស៊ី និងលោក Duda នឹងរង់ចាំទទួលរថភ្លើងដឹកទំនិញពីចិន មកកាន់រដ្ឋធានីវ៉ាសូវី បន្ទាប់ធ្វើដំណើររយៈពេល១៣ថ្ងៃ ពីខេត្ត Sichuan។ ខ្សែរថភ្លើងនេះ បានភ្ជាប់ចិន និងប៉ូឡូញ ក្នុងឆ្នាំ២០១៣ និងជួយកាត់បន្ថយការដឹកជញ្ជូនតាមសមុទ្រ ដែលត្រូវចំណាយពេល៤០ ទៅ៥០ថ្ងៃ។ ខ្សែរថភ្លើងនេះទៀតសោត ជាផ្នែកនៃគំនិតផ្ដួចផ្ដើមផ្លូវសូត្រថ្មី ដែលភ្ជាប់ការធ្វើដំណើរទាំងផ្លូវសមុទ្រ និងផ្លូវគោក រវាងអាស៊ី និងអឺរ៉ុប៕
Tag:
ចិន
ស៊ីជិនពីង
ប៉ូឡូញ
© រក្សាសិទ្ធិដោយ thmeythmey.com