អន្តរជាតិ
នយោបាយអន្តរជាតិ
ក្រោយសុំទោសរុស្ស៊ី តួកគីអាចឲ្យរុស្ស៊ីប្រើមូលដ្ឋានទ័ព Incirlik វាយក្រុម IS
×![]()
ដោយ: តន ចាន់រិទ្ធារ៉ា
យោងតាមសម្តីរដ្ឋមន្ត្រីការបរទេសតួកគីលោក Mevlut Cavusoglu រដ្ឋាភិបាលក្រុង អង់ការ៉ា អាចនឹងអនុញ្ញាតឲ្យកងទ័ពជើងអាកាសរុស្ស៊ីប្រើប្រាស់មូលដ្ឋានយោធា Incirlik។ ការលើកឡើងពីលទ្ធភាពនៃការអនុញ្ញាតឲ្យរុស្ស៊ីប្រើប្រាស់មូលដ្ឋានទ័ពខ្លួននេះកើតមានឡើងប៉ុន្មានថ្ងៃប៉ុណ្ណោះក្រោយតួកគីសុំទោសរុស្ស៊ី និងមានការព្រមព្រៀងគ្នាស្តារចំណងការទូតឡើងវិញ។
រដ្ឋមន្ត្រីការបរទេសតួកគីលោក Mevlut Cavusoglu បានចេញសេចក្តីថ្លែងការណ៍មួយដោយលើកឡើងថា តួកគីប្រហែលជាអាចផ្តល់ភ្លើងបៃតងដល់រុស្ស៊ីដើម្បីប្រើប្រាស់មូលដ្ឋានទ័ពអាកាសតួកគី Incirlik ដើម្បីតាមកម្ចាត់ក្រុមភេរវជនរដ្ឋឥស្លាមឬក្រុមដែស្ហ។
យោងសារព័ត៌មានរុស្ស៊ី Sputnik លោករដ្ឋមន្ត្រីតួកគីបានបញ្ជាក់ថា៖« យើងនឹងសហការជាមួយបណ្តាប្រទេសទាំងអស់ដែលកំពុងប្រយុទ្ធប្រឆាំងក្រុមរដ្ឋឥស្លាមឬក្រុមដែស្ហ។ ហើយរដ្ឋាភិបាលក្រុងអង់ការ៉ានឹង បើកមូលដ្ឋានទ័ពអាកាស Incirlik ឲ្យអ្នកគ្រប់គ្នាដែលចង់ចូលរួមប្រយុទ្ធកម្ចាត់ក្រុមភេរវជននេះ។ ដូច្នេះមានរឿងអី្វដែលថាយើងមិនអាចសហការជាមួយរុស្ស៊ីទៅ?»។
សេចក្តីថ្លែងការណ៍ដដែលនោះបានសង្កត់ធ្ងន់ថា តួកគីត្រៀមលក្ខណៈរួចជាស្រេចហើយដើម្បីសហការជាមួយភាគីពាក់ព័ន្ធដើម្បីកម្ចាត់សត្រូវរួមគ្នានៅពេលខាងមុខ។
សេចក្តីថ្លែងការណ៍របស់ប្រមុខការទូតតួកគីនេះ ត្រូវបានចេញផ្សាយប៉ុន្មានថ្ងៃប៉ុណ្ណោះក្រោយជំនួបពិភាក្សាទ្វេភាគីមួយត្រូវបានរៀបចំឡើងរវាងរដ្ឋមន្ត្រីការបរទេសតួកគី និងសមភាគីរុស្ស៊ីលោក Sergei Lavrov។ កិច្ចពិភាក្សានេះផ្តោតសំខាន់លើការលុបចោលទណ្ឌកម្មប្រឆាំងតួកគី និងស្តារចំណងការទូតឡើងវិញ ក្រោយប្រធានាធីបតីតួកគីសម្រេចសុំទោសរុស្ស៊ីចំពោះការបាញ់យន្តហោះរុស្ស៊ីទម្លាក់កាលពីចុងឆ្នាំមុននោះ។
ត្រលប់មកវិញ បច្ចុប្បន្ននេះកងទ័ពរុស្ស៊ី កំពុងប្រើប្រាស់មូលដ្ឋានទ័ពអាកាសស៊ីរី នៅខេតត្ត Latakia ហើយមូលដ្ឋានទ័ពអាកាស Incirlik នៅមិនឆ្ងាយពីព្រំដែនស៊ីរីឡើយ។ ដូច្នេះបើសិនមានការអនុញ្ញាតមែននោះ វានឹងជួយសម្រួលដល់អន្តរាគមន៍និងការវាយប្រហាររបស់រុស្ស៊ីប្រឆាំងក្រុមភេរវជនរដ្ឋឥស្លាមឬក្រុមដែស្ហ។ ប៉ុន្តែគេមិនទាន់អាចវាយតម្លៃបាននៅឡើយទេថា តើរុស្ស៊ីនិងតួកគីនឹងចាប់ផ្តើមពិភាក្សាលើការដាក់ទ័ពនិងប្រើប្រាស់មូលដ្ឋានទ័ពនេះនៅពេលណាជាក់លាក់នោះ៕
Tag:
ដែស្ហ
Mevlut Cavusoglu
Sergei Lavrov
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ថ្ងៃ
