អន្តរជាតិ
ហុងគ្រី ធ្វើប្រជាមតិលើផែនការបែងចែកជនភៀសខ្លួនរបស់អឺរ៉ុប
× ប្រធានាធិបតីហុងគ្រី បានប្រកាសធ្វើប្រជាមតិមួយលើផែនការរបស់សហភាពអឺរ៉ុប ក្នុងការបែងចែកចំនួនជនភៀសខ្លួនទៅកាន់បណ្ដាប្រទេសជាសមាជិកនីមួយៗ។ នេះជាជំហានថ្មីមួយទៀត របស់រដ្ឋាភិបាលហុងគ្រី បន្ថែមលើគោលនយោបាយរឹតត្បិតដែលមានស្រាប់ក្នុងការទប់ស្កាត់លំហូរជនភៀសខ្លួន រត់មកពីតំបន់ជម្លោះនៅមជ្ឈិមបូព៌ា ជាពិសេសស៊ីរី និងអ៊ីរ៉ាក់។
ហុងគ្រី នឹងធ្វើប្រជាមតិមួយនៅខែតុលា ដើម្បីសម្រេចលើគោលនយោបាយរបស់អឺរ៉ុប ដែលចង់បញ្ជូនជនភៀសខ្លួន និងជនអន្តោប្រវេសន៍ នៅក្នុងចំណោមរដ្ឋជាសមាជិករបស់ខ្លួន។ រដ្ឋាភិបាលហុងគ្រីរបស់លោកនាយករដ្ឋមន្ត្រី Viktor Orban តែងប្រឆាំងនឹងផែនការជនភៀសខ្លួនរបស់សហភាពអឺរ៉ុប ហើយក្នុងគោលដៅទប់ស្កាត់លំហូរជនភៀស រដ្ឋាភិបាលរបស់លោក Orban បានកសាងរបងតាមព្រំដែន និងអនុម័តច្បាប់តឹងរឹងទៀតផង។
ក្នុងសេចក្ដីថ្លែងការណ៍នៅថ្ងៃទី៥ ខែកក្កដា ប្រធានាធិបតីហុងគ្រី លោក Janos Ader ប្រកាសថា ក្នុងនាមជាប្រធានាធិបតីសាធារណរដ្ឋហុងគ្រី លោកសម្រេចថា ប្រជាមតិនឹងធ្វើនៅថ្ងៃទី២ ខែតុលា។ អ្នកបោះឆ្នោតទាំងអស់ នឹងត្រូវសួរថា៖ តើអ្នកចង់ឲ្យសហភាពអឺរ៉ុបមានសិទ្ធិផ្ទេរជនជាតិមិនមែនហុគ្រី មកកាន់ហុងគ្រី ដោយមិនចាំចាច់មានការអនុញ្ញាតពីសភាហុងគ្រីឬទេ?
បើតាមទូរទស្សន៍ Al Jazeera សេចក្ដីថ្លែងការណ៍នៅថ្ងៃទី៥ ខែកក្កដា ជាជំហានចុងក្រោយ របស់លោកនាយករដ្ឋមន្ត្រី Orban ដែលពីដើម មកមិនដែល គាំទ្រ សហភាពអឺរ៉ុប លើផែន ការជនភៀសខ្លួននោះទេ។ រដ្ឋាភិបាលរបស់លោក បានបោះឆ្នោតប្រឆាំង នឹងផែនការ របស់អឺរ៉ុប ដែលចង់បែងចែកជនភៀសខ្លួន១៦ម៉ឺននាក់ ទៅឲ្យរដ្ឋជាសមាជិកទាំង២៨ តាម រយៈកូតាកំណត់មួយ។
ក្រៅពីហុងគ្រី រូម៉ានី សាធារណរដ្ឋឆែក និងស្លូវ៉ាគី ក៏បានបដិសេធនឹងផែនការកូតាកំណត់នេះដែរ ប៉ុន្តែផែនការនេះ ត្រូវបានអនុម័តតាមសំឡេងភាគច្រើន ក្នុងការបោះឆ្នោតខែកញ្ញា ឆ្នាំ២០១៥។ លើសពីនេះ ហុងគ្រី និងស្លូវ៉ាគី ក៏បានដាក់ពាក្យបណ្ដឹងនៅអឺរ៉ុប ប្រឆាំងនឹងផែនការនេះ ដែលសំដៅកាត់បន្ថយសម្ពាធលើក្រិក និងអ៊ីតាលី ដែលជាច្រកចូលសំខាន់នៃលំហូរជនភៀសខ្លួន មកកាន់ទឹកដីអឺរ៉ុប។
បន្ថែមលើនេះ រដ្ឋាភិបាលក្រុងប៊ុយដាប៉ែស និយាយថា ផែនការរបស់អឺរ៉ុប បានរំលោភបំពានអធិបតេយ្យជាតិរបស់ខ្លួន ហើយក្រុមភេរវជន អាចនឹងចូលប្រទេសនានា ក្នុងនាមជាជនភៀសខ្លួន។ នាយករដ្ឋមន្ត្រី Orban បញ្ជាក់ថា សហភាពអឺរ៉ុប គ្មានសិទ្ធិដើម្បីគូសវាសអត្តសញ្ញាណវប្បធម៌ និងសាសនានៅក្នុងអឺរ៉ុបទេ។ ជាមួយគ្នានេះ បើតាមទិន្នន័យរបស់សហភាពអឺរ៉ុប ជនភៀសខ្លួនប្រមាណជិតបីពាន់នាក់ ត្រូវបានផ្លាស់ប្ដូរទីតាំង ប៉ុន្តែហុងគ្រី មិនបានទទួលណាម្នាក់ទេ៕
Tag:
ហុងគ្រី
ប្រជាមតិ
អឺរ៉ុប
© រក្សាសិទ្ធិដោយ thmeythmey.com