ក្រុមមេធាវីស្នើឲ្យតុលាការ ទម្លាក់ការចោទប្រកាន់លើឯកឧត្តម កឹម សុខា

ជាតិ

ក្រុមមេធាវីស្នើឲ្យតុលាការ ទម្លាក់ការចោទប្រកាន់លើឯកឧត្តម កឹម សុខា

08, Jul 2016 , 12:47 pm

រូបភាព

ដោយ: ម៉ៅ សុផា

ភ្នំពេញ៖ នៅរសៀល ថ្ងៃទី៨ ខែកក្កដានេះ សហមេធាវី នឹងដាក់លិខិតទៅកាន់អយ្យការអមសាលាដំបូងរាជធានីភ្នំពេញ ដើម្បីស្នើឲ្យព្រះរាជអាជ្ញា លើកលែងការចោទប្រកាន់លើឯកឧត្តម កឹម សុខា អនុប្រធានគណបក្សសង្គ្រោះជាតិ។ ឯកឧត្តម កឹម សុខា ត្រូវបានចោទពីបទ «បដិសេធក្នុងការចូលខ្លួន» ដែលតុលាការចាត់ទុក ជាបទល្មើសព្រហ្មទណ្ឌជាក់ស្តែង។

ការដាក់លិខិតទៅកាន់អង្គការអយ្យការនៅថ្ងៃនេះ គឺដើម្បីស្នើឲ្យព្រះរាជអាជ្ញា តម្កល់សំណុំរឿងរបស់ឯកឧត្តម កឹម សុខា ទុកឥតចាត់ការ។ សំណុំរឿងរបស់ឯកឧត្តម កឹម សុខា មិនអាចត្រូវបានបញ្ជូនទៅជំនុំជម្រះនោះទេ ហើយអនុប្រធានបក្សប្រឆាំងរូបនេះ ថែមទាំងអាចរួចផុតពីក្តីក្តាំងនៅតុលាការផងដែរ ប្រសិនបើព្រះរាជអាជ្ញា ធ្វើតាមសំណើរបស់ក្រុមមេធាវី។ នេះបើតាមការអះអាងរបស់លោក ហែម សុជាតិ មេធាវី១រូប ក្នុងចំណោមមេធាវីទាំង៥រូបរបស់ឯកឧត្តម កឹម សុខា។

ថ្លែងប្រាប់សារព័ត៌មានថ្មីៗ លោក ហែម សុជាតិ បានលើកឡើងថា ប្រសិនបើរាជអាជ្ញា ច្រានចោលសំណើរបស់មេធាវី នោះព្រះរាជអាជ្ញា នឹងធ្វើសេចក្តីសន្និដ្ឋានស្ថាពរលើសំណុំរឿងឯកឧត្តម កឹម សុខា ហើយបញ្ជូនទៅកាន់ចៅក្រមស៊ើបសួរសាជាថ្មី។ លោក បន្ថែមទៀតថា សេចក្តីសន្និដ្ឋានស្ថាពររបស់ព្រះរាជអាជ្ញា មាន២ប្រភេទ គឺទី១. សេចក្តីសន្និដ្ឋានជំនុំជម្រះ និងទី២ សេចក្តីសន្និដ្ឋានទុកឥតចាត់ការ។

មេធាវីរូបនេះ ពន្យល់ថា ចៅក្រមស៊ើបសួរនឹងបញ្ជូនសំណុំរឿងឯកឧត្តម កឹម សុខា ទៅជំនុំជម្រះជាមិនខាន បើព្រះរាជអាជ្ញា ធ្វើសេចក្តីសន្និដ្ឋានឲ្យជំនុំជម្រះ។ ប៉ុន្តែចៅក្រមស៊ើបសួរ មិនបញ្ជូនសំណុំរឿងទៅជំនុំជម្រះឡើយ ប្រសិនបើព្រះរាជអាជ្ញាធ្វើសេចក្តីសន្និដ្ឋានទុកឥតចាត់ការ។

សូមបញ្ជាក់ថា កាលពីថ្ងៃទី៥ ខែកក្កដា ឆ្នាំ២០១៦ ចៅក្រមស៊ើបសួរនៃសាលាដំបូងរាជធានីភ្នំពេញ បានបញ្ចប់នីតិវិធីស៊ើបសួរ លើរឿងក្តីរបស់ឯកឧត្តម កឹម សុខា។ ក្រោយបិទការសាកសួរ សំណុំរឿងរបស់ឯកឧត្តម កឹម សុខា ត្រូវបានបញ្ជូនទៅកាន់ស្ថាប័នអយ្យការវិញ ដើម្បីឲ្យព្រះរាជអាជ្ញា ធ្វើសេចក្តីសន្និដ្ឋានស្ថាពរ។ នៅពេលព្រះរាជអាជ្ញា ធ្វើសេចក្តីសនិ្នដ្ឋានស្ថាពររួចរាល់ សំណុំរឿងនឹងត្រូវបញ្ជូនទៅឲ្យចៅក្រមស៊ើបសួរវិញ៕