កូរ៉េខាងជើង គំរាមអាមេរិកនិងកូរ៉េខាងត្បូង លើការពង្រាយខែលការពារមីស៊ីល

អន្តរជាតិ

នយោបាយអន្តរជាតិ

កូរ៉េខាងជើង គំរាមអាមេរិកនិងកូរ៉េខាងត្បូង លើការពង្រាយខែលការពារមីស៊ីល

11, Jul 2016 , 11:06 am

រូបភាព

ដោយ: តន ចាន់រិទ្ធារ៉ា

ក្រោយចរចាគ្នាអស់ពេលយូរល្មមរួចមក អាមេរិកនិង កូរ៉េខាងត្បូងបានឯកភាពគ្នាលើគម្រោងពង្រាយប្រព័ន្ធការពារមីស៊ីលទំនើបរបស់អាមេរិក THAAD ទៅកាន់កូរ៉េខាងត្បូងដើម្បីទប់ទល់ការគំរាមកំហែងរបស់កូរ៉េខាងជើង។ ភ្លាមៗបន្ទាប់ពីការឯកភាពគ្នាលើការពង្រាយប្រព័ន្ធការពារមីស៊ីលនេះ យោធាកូរ៉េខាងជើង ក៏ប្រកាសថា ខ្លួននឹងធ្វើការឆ្លើយតបខ្លាំងៗវិញមិនខាន។

ផែនការពង្រាយខែលការពារមីស៊ីល (THAAD) រវាងក្រុងវ៉ាស៊ីនតោន និងក្រុងសេអ៊ូល ត្រូវបានអនុម័តនៅថ្ងៃទី៩ ខែកក្កដា។ កូរ៉េខាងជើងដែលដឹងខ្លួនថា ខែលការពារនេះ ដាក់តម្រង់មកខ្លួននោះ មិនសប្បាយចិត្តនោះទេ និងបានប្រកាសថា នឹងធ្វើសកម្មភាពវាយបកចំពោះការពង្រាយប្រព័ន្ធការពារនេះ ដោយគ្មានត្រាប្រណី។

ក្នុងសេចក្ដីថ្លែងការណ៍ នៅថ្ងៃទី១១ ខែកក្កដា យោធាកូរ៉េខាងជើងនិយាយថា ខ្លួន នឹងចាត់វិធានការឆ្លើយតប នៅពេលដែលពេលវេលាជាក់លាក់ និងទីកន្លែងនៃឧបករណ៍បម្រើការឈ្លានពានរបស់អាមេរិក ត្រូវបានពង្រាយនៅកូរ៉េខាងត្បូង។ សេចក្ដីថ្លែងការណ៍ ដែលចេញផ្សាយដោយទីភ្នាក់ងារព័ត៌មានរដ្ឋកូរ៉េខាងជើង (KCNA) បន្តថា វាជាឆន្ទះមិនងាករេរបស់កងទ័ពកូរ៉េខាងជើង ក្នុងការសងសឹកដោយគ្មានមេត្តា។

លើសពីនោះ បើតាមទីភ្នាក់ងារព័ត៌មាន Reuters កូរ៉េខាងជើង ក៏ព្រមានធ្វើឲ្យកូរ៉េខាងត្បូង ក្លាយជាសមុទ្រភ្លើង និងជាគំនរផេះផង់ ប្រសិនបើមានបញ្ជាឲ្យវាយប្រហារ។ ជាញឹកញយ កូរ៉េខាងជើង តែងគំរាមវាយប្រហារកូរ៉េខាងត្បូង និងផលប្រយោជន៍អាមេរិក នៅក្នុងទ្វីប អាស៊ី ក៏ដូចជាតំបន់ប៉ាស៊ីហ្វិកផងដែរ។

ងាកមកការពង្រាយខែលការពារវិញ ទីតាំងនៃទីតាំង និងពេលវេលា នៅមិនទាន់បានកំណត់ទេ។ មន្ត្រីក្រសួងការពារជាតិកូរ៉េខាងត្បូងនិយាយថា ការជ្រើសរើសទីតាំងសម្រាប់ប្រព័ន្ធការពារ អាចនឹងសម្រេចនៅពេលប៉ុន្មានសប្ដាហ៍ខាងមុខនេះ ហើយក្រុងសេអ៊ូល និងក្រុងវ៉ាស៊ីនតោន កំពុងតែញាប់ដៃ ដើម្បីដំណើការប្រព័ន្ធការពារនេះ នៅត្រឹមចុងឆ្នាំ២០១៧ខាងមុខ។

កូរ៉េខាងត្បូង និងអាមេរិក បញ្ជាក់ថា ការពង្រាយប្រព័ន្ធការពារនេះ គឺដើម្បីការពារទាហានសហរដ្ឋអាមេរិក នៅកូរ៉េខាងត្បូង។ ក្រោយបញ្ចប់សង្គ្រាមកូរ៉េឧបទ្វីបកូរ៉េ អាមេរិក នៅបានរក្សាកងទ័ពរបស់ខ្លួនចំនួនជិតបីម៉ឺននាក់ ដើម្បីជួយក្រុងសេអ៊ូល ពីការវាយប្រហារណាមួយ។ ជាមួយគ្នានេះ ទាំងអាមេរិក និងកូរ៉េខាងត្បូង អះអាងថា ប្រព័ន្ធការពារមីស៊ីលនេះ សំដៅតែការវាយប្រហារនុយក្លេអ៊ែរដោយកូរ៉េខាងជើងមួយប៉ុណ្ណោះ និងមិនសំដៅលើប្រទេសទីបីណាទេ។

ចិន និងរុស្សី សុទ្ធតែព្រួយបារម្ភចំពោះការពង្រាយខែលការពារនេះ ខណៈកន្លងមក ក៏តែងប្រឆាំងដាច់ខាត នឹងការពង្រាយនេះ។ ទាំងក្រុងប៉េកាំង និងក្រុងមូស្គូ ចាត់ទុក ការពង្រាយនេះ ជាការគំរាមកំហែងដល់ផលប្រយោជន៍ និងសន្តិសុខរបស់ខ្លួន ក៏ដូចជាប៉ះពាល់ដល់ស្ថិរភាពតំបន់ទាំងមូលផងដែរ៕