អន្តរជាតិ
អាមេរិកបន្ថែមទ័ពទៅអ៊ីរ៉ាក់ ដើម្បីជួយរំដោះក្រុង Mosul ពីក្រុមរដ្ឋឥស្លាម
× សហរដ្ឋអាមេរិក បាននិងកំពុងបង្កើនប្រតិបត្តិការយោធារបស់ខ្លួន ប្រឆាំងនឹងក្រុមជ្រុលនិយមរដ្ឋឥស្លាមនៅក្នុងប្រទេសអ៊ីរ៉ាក់ ដោយនឹងបញ្ជូនទ័ពជាច្រើនបន្ថែមទៀតទៅកាន់ប្រទេសនេះ។ អាមេរិក នឹងបង្កើនសកម្មភាពរបស់ខ្លួន ក្នុងគោលដៅជួយកងទ័ពអ៊ីរ៉ាក់ ដែលកំពុងរៀបចំបើកយុទ្ធនាការរំដោះទីក្រុង Mosul នៅពេលខាងមុខ។
សូមស្ដាប់ព័ត៌មានលម្អិត៖
រដ្ឋមន្ត្រីការពារជាតិអាមេរិក លោក Ash Carter ប្រកាសថា កងទ័ពជាច្រើនរយនាក់ នឹងត្រូវបញ្ជូនទៅកាន់អ៊ីរ៉ាក់ ដើម្បីបង្កើនយុទ្ធនាការកម្ទេចក្រុមជ្រុលនិយមរដ្ឋឥស្លាម។ លោក Carter ប្រកាសដូចនេះ នៅថ្ងៃទី១១ ខែកក្កដា ក្នុងដំណើរទៅកាន់រដ្ឋធានី បាក់ដាដ ។ នៅអ៊ីរ៉ាក់ រដ្ឋមន្ត្រីការពារជាតិអាមេរិក បានជួបជាមួយមេបញ្ជាការកងទ័ពអាមេរិក និងជួបនាយករដ្ឋមន្ត្រី លោក Haider al-Abadi ក៏ដូចជាសមភាគី លោក Khaled al-Obeidi ផងដែរ។
បើតាមទីភ្នាក់ងារព័ត៌មាន Reuters កងទ័ពបន្ថែម៥៦០នាក់ នឹងពង្រាយនៅមូលដ្ឋានអាកាស Qayara ដែលកងកម្លាំងអ៊ីរ៉ាក់ ទើបដណ្ដើមបានពីក្រុមជ្រុលនិយម។ មូលដ្ឋាននេះ នឹងត្រូវប្រើជាទីតាំង សម្រាប់យុទ្ធនាការប្រយុទ្ធរំដោះទីក្រុង Mosul ពីការគ្រប់គ្រងរបស់សកម្មជនរដ្ឋឥស្លាម។
ថ្លែងទៅកាន់កងទ័ពអាមេរិក រដ្ឋមន្ត្រីការពារជាតិរូបនេះ និយាយថា ជាមួយនឹងកងទ័ពសហរដ្ឋអាមេរិក ដែលលោកបញ្ជាក់ពេលនេះ អាមេរិក នឹងមានសមត្ថភាពកាន់តែខ្លាំង ក៏ដូចជា ជាកម្លាំងគាំទ្រសំខាន់សម្រាប់កងទ័ពអ៊ីរ៉ាក់ ក្នុងការប្រយុទ្ធគ្នាខាងមុខ។ លោកបន្តថា កងកម្លាំងបន្ថែម ត្រៀមខ្លួនរួចរាល់ហើយ ហើយពួកគេ អាចនឹងមកដល់តែក្នុងរយៈពេលប៉ុន្មានថ្ងៃ ឬសប្ដាហ៍ខាងមុខ តែមិនដល់រាប់ខែទេ។
នៅមុនទៅដល់អ៊ីរ៉ាក់បន្តិច លោក Carter ប្រាប់អ្នករាយការណ៍ព័ត៌មានថា អាមេរិក នឹងកែប្រែមូលដ្ឋាននេះ ទៅជាមជ្ឈមណ្ឌលភស្តុភារទ័ព។ ចំណែកលោកឧត្តមសេនីយ៍ Sean MacFarland ដែលជាមេបញ្ជាការសម្ព័ន្ធមិត្តប្រឆាំងនឹងក្រុមរដ្ឋឥស្លាម នៅស៊ីរី និងអ៊ីរ៉ាក់ បញ្ជាក់ដែរថា កងកម្លាំងបន្ថែម នឹងជួយពង្រីកមូលដ្ឋានអាកាស Qayara ដើម្បីជួយទ្រទ្រង់ កងកម្លាំងអ៊ីរ៉ាក់ ដែលនឹងបើកប្រតិបត្តិការរំដោះទីក្រុង Mosul។
សូមបញ្ជាក់ដែរថា បន្ទាប់ពីរំដោះទីក្រុង Fallujah បានមក នាយករដ្ឋមន្ត្រីអ៊ីរ៉ាក់ បានប្រកាសឲ្យកងកម្លាំងរបស់ខ្លួន ត្រៀមកម្លាំងសម្រាប់ប្រតិបត្តិការមួយទៀត គឺរំដោះទីក្រុង Mosul ដែលជាទីក្រុងធំជាងគេទីពីររបស់អ៊ីរ៉ាក់។ យ៉ាងណាក្ដី ទាំងអាមេរិក ទ័ពសម្ព័ន្ធមិត្ត និងមន្ត្រីចារកម្មផ្សេងទៀតព្រមានថា ក្រៅពីកងកម្លាំងពិសេសប្រឆាំងភេរវកម្ម កងទ័ពអ៊ីរ៉ាក់ នៅមិនទាន់ត្រៀមខ្លួនប្រយុទ្ធនឹងសកម្មជនរដ្ឋឥស្លាមនៅ Mosul ទេ ប្រសិនបើគ្មានការគាំទ្រពីសកម្មជនឃឺដ និងក្រុមស៊ីអ៊ីតទេនោះ៕
Tag:
អាមេរិក
អ៊ីរ៉ាក់
ក្រុមរដ្ឋឥស្លាម
© រក្សាសិទ្ធិដោយ thmeythmey.com