អន្តរជាតិ
នយោបាយអន្តរជាតិ
កូរ៉េខាងត្បូង នឹងដាក់ខែលការពារ THAAD នៅភាគខាងត្បូងប្រទេស
× នៅចុងក្រោយ កូរ៉េខាងត្បូង បានបង្ហាញទីតាំងនៃប្រព័ន្ធការពារអាកាស THAAD របស់អាមេរិកហើយ។ ប្រព័ន្ធការពារមីស៊ីលទំនើបនេះ ត្រូវពង្រាយនៅតំបន់ភាគខាងត្បូងរបស់កូរ៉េខាងត្បូង ដែលនៅទីនោះ ប្រព័ន្ធការពារនេះ មានសមត្ថភាពការពារទឹកដីភាគច្រើនរបស់កូរ៉េខាងត្បូង ពីការវាយប្រហារពីសំណាក់មីស៊ីលរបស់កូរ៉េខាងជើង។
នៅថ្ងៃទី១៣ ខែកក្កដា ក្រសួងកាពារជាតិកូរ៉េខាងត្បួង បានប្រកាសថា ប្រព័ន្ធការពារមីស៊ីល THAAD នឹងត្រូវដាក់នៅតំបន់ Seongju ស្ថិតនៅភាគខាងត្បូងប្រទេស។ ក្នុងសេចក្ដីប្រកាសព័ត៌មានមួយ អនុរដ្ឋមន្ត្រីការពារជាតិកូរ៉េខាងត្បូងលោក Yoo Jeh Seung និយាយថា ទីតាំងនៃខែលការពារនេះ នឹងជួយពង្រឹងសមត្ថភាពរបស់យោធា ក៏ដូចជាសុវត្ថិភាពប្រជាជនក្នុងស្រុកផងដែរ។
អនុរដ្ឋមន្ត្រីការពារជាតិរូបនេះ បន្តថា ប្រព័ន្ធការពារមីស៊ីលនេះ អាចការពារប្រជាជនបានដល់ទៅពីរភាគបី នៃប្រជាជនទាំងអស់របស់កូរ៉េខាងត្បូង ពីការវាយប្រហារនុយក្លេអ៊ែរ របស់កូរ៉េខាងជើង ក៏ដូចជាការគំរាមពីមីស៊ីលដទៃទៀត។ ជាងនេះទៅទៀត សេចក្ដីប្រកាសព័ត៌មានខាងលើ បញ្ជាក់ដែរថា ប្រព័ន្ធការពារទំនើបនេះ នឹងជួយពង្រឹងកងទ័ព ក៏ដូចជា ការត្រៀមខ្លួនក្នុងការការពារហេដ្ឋារចនាសម្ព័ន្ធរបស់ប្រទេស រួមមានរោងចក្រថាមពលនុយក្លេអ៊ែរ និងកន្លែងស្តុកប្រេងជាដើម។
សូមរម្លឹកថា ក្រុងសេអ៊ូល និងក្រុងវ៉ាស៊ីនតោន បានឯកភាពគ្នាពង្រាយប្រព័ន្ធការពារមីស៊ីល តាំងពីថ្ងៃទី៨ ខែកក្កដាមក។ ប៉ុន្តែភ្លាមៗ កូរ៉េខាងត្បូង មិនទាន់អាចកំណត់ទីតាំងដែលត្រូវពង្រាយបាន ទើបពេលនេះ ក្រសួងការពារជាតិកូរ៉េខាងត្បូង បញ្ជាក់ថា នឹងដាក់ពង្រាយនៅ Seongju។
យោងតាមទូរទស្សន៍ CNN ប្រព័ន្ធការពារនេះ មានសមត្ថភាពបាញ់ទម្លាក់មីស៊ីលបាលីស្ទិករយៈចម្ងាយខ្លី និងមធ្យម ក្នុងកម្រិតលឿនបំផុត ហើយត្រូវបានប្រើដោយកងទ័ពអាមេរិក សម្រាប់ការពារមូលដ្ឋានរបស់ខ្លួន ជាយូរឆ្នាំមកហើយ។ មួយវិញទៀត កូរ៉េខាងត្បូង ក៏តែងអះអាងថា ការពង្រាយប្រព័ន្ធការពារមីស៊ីលនេះ គឺដើម្បីតែការពារប៉ុណ្ណោះ និងប្រើសម្រាប់តែទប់ទល់នឹងមីស៊ីលរបស់កូរ៉េខាងជើងតែមួយគត់ មិនមែនភាគីទីបីណាទេ។
យ៉ាងណាក្ដី បើទោះជាមានករអះអាងខាងលើក្ដី ចិន និងរុស្សី មិនសប្បាយចិត្ត ដែលអាមេរិក ត្រូវពង្រាយប្រព័ន្ធការពារនេះនៅកូរ៉េខាងត្បូងឡើយ។ រដ្ឋមន្ត្រីការបរទេសចិន លោក វ៉ាង យី និយាយថា ការពង្រាយនេះ មិនសមហេតុផលទេ។ ចំណែកកូរ៉េខាងជើងវិញ បន្ទាប់ពីដឹងថា អាមេរិក និងកូរ៉េខាងត្បូង យល់ព្រមពង្រាយប្រព័ន្ធការពារមីស៊ីលហើយ ក៏បានប្រកាសថា នឹងធ្វើសកម្មភាពវាយបកចំពោះការពង្រាយប្រព័ន្ធការពារនេះ ដោយគ្មានត្រាប្រណី។
ក្នុងសេចក្ដីថ្លែងការណ៍ នៅថ្ងៃទី១១ ខែកក្កដា យោធាកូរ៉េខាងជើងនិយាយថា ខ្លួននឹងតបតវិញ នៅពេលដែលពេលវេលាជាក់លាក់ និងទីកន្លែងនៃឧបករណ៍បម្រើការឈ្លានពានរបស់អាមេរិក ត្រូវបានពង្រាយនៅកូរ៉េខាងត្បូង។ នៅពេលនេះ ទីកន្លែងនៃប្រព័ន្ធការពារ ត្រូវបានបញ្ចេញហើយ គេនឹងចាំមើលថា ក្រុងព្យុងយ៉ាង នឹងឆ្លើយតបដោយគ្មានប្រណី ដូចការអះអាងរបស់ខ្លួន ឬយ៉ាងណា៕
Tag:
កូរ៉េខាងត្បូង
អាមេរិក
THAAD
© រក្សាសិទ្ធិដោយ thmeythmey.com