អន្តរជាតិ
ចក្រភពអង់គ្លេស៖ លោកស្រី May ជានាយករដ្ឋមន្ត្រី លោក Johnson ជារដ្ឋមន្ត្រីការបរទេស
× បន្ទាប់ពីស្ថានភាពមិនច្បាស់លាស់បន្តអស់ពេលបីសប្ដាហ៍ក្រោយការធ្វើប្រជាមតិមក នយោបាយក្នុងស្រុករបស់ចក្រភពអង់គ្លេស ហាក់ធូរស្រាលបន្តិច ខណៈដែលប្រទេសរកឃើញអ្នកដឹកនាំថ្មីរួចមក។ លោកស្រី Theresa May បានក្លាយនាយករដ្ឋមន្ត្រីថ្មី ជំនួស លោក ដេវីដ ខេមេរ៉ូន ដែលបានប្រកាសលាលែង ហើយលោកស្រី ធ្វើឲ្យគេភ្ញាក់ផ្អើលខ្លាំង ដោយបានតែងតាំងអ្នកគាំទ្រឲ្យអង់គ្លេសចាកចេញពីអឺរ៉ុប ធ្វើជាប្រមុខការទូតទៅវិញ។
លោកស្រី Theresa May ដែលជាអតីតរដ្ឋមន្ត្រីមហាផ្ទៃក្នុងរដ្ឋាភិបាលរបស់លោក ដេវីដ ខេមេរ៉ូន ក្លាយជានាយករដ្ឋមន្ត្រីស្ត្រីទីពីររបស់ចក្រភពអង់គ្លេសហើយ បន្ទាប់ពីទទួលបានការតែងតាំងពីម្ចាស់ក្សត្រីយ៍ Elizabeth នៅថ្ងៃទី១៣ ខែកក្កដា។ លោកស្រី នឹងត្រូវដឹកនាំចក្រភពអង់គ្លេស នៅក្នុងកាលៈទេសៈលំបាកមួយ គឺត្រូវដឹកនាំការចរចាចាកចេញពីអឺរ៉ុប និងស្រោចស្រង់សេដ្ឋកិច្ច ដែលធ្លាក់ចុះដោយសារការធ្វើប្រជាមតិ។
ថ្លែងពីនិវេសនដ្ឋាននាយករដ្ឋមន្ត្រីនៅ 10 Downing Street នាយករដ្ឋមន្ត្រីថ្មីរួបនេះ និយាយថា នេះគឺជាបេសកកម្មរបស់លោកស្រី ក្នុងការកសាងចក្រភពអង់គ្លេសដ៏ល្អមួយ។ ហើយលោកស្រី ក៏សន្យាដែរថា រដ្ឋាភិបាលដែលលោកស្រីដឹកនាំ គឺសម្រាប់ប្រជាជនទាំងអស់ មិនមែនបុគ្គលពិសេសណាមួយឡើយ។ លោកស្រី បន្តថា លោកស្រី នឹងធ្វើអ្វីគ្រប់យ៉ាង ដើម្បីឲ្យប្រជាជន មានសិទ្ធិកាន់តែច្រើន សម្រាប់ត្រួតត្រាជីវិតពួកគេ។
កាលពីយុទ្ធនាការសម្រាប់ប្រជាមតិ លោកស្រី May ក៏ដួចជាលោក ខេមេរ៉ូន ដែរ គឺជាអ្នកដែលគាំទ្រឲ្យអង់គ្លេសបន្តជាសមាជិករបស់សហភាពអឺរ៉ុប។ ប៉ុន្តែការព្យាយាម មិនបានជោគជ័យ ហើយលោក ខេមេរ៉ូន ក៏ប្រកាសលាលែង ដែលបើកផ្លូវដល់ការរើសនាយករដ្ឋមន្ត្រីថ្មី។ តាមពិតទៅ នាយករដ្ឋមន្ត្រីថ្មី ត្រូវប្រកាសខែកញ្ញាឯណោះទេ ប៉ុន្តែដោយសារតែ លោកស្រី May ក្លាយជាបេក្ខភាពតែមួយគត់ ទើបការបោះឆ្នោតផ្ទៃក្នុងបក្សអភិរក្ស មានដំណើការលឿនបែបនេះ។
ជាមួយគ្នានេះដែរ លោកស្រី ក៏បានប្រកាសសមាសភាពសមាជិកគណៈរដ្ឋមន្ត្រីថ្មី ដែលត្រូវផ្លាស់ប្ដូរផងដែរ។ នាយករដ្ឋមន្ត្រីស្ត្រីរូបនេះ បានធ្វើឲ្យគេឯងភ្ញាក់ផ្អើលយ៉ាងខ្លាំង ដោយតែងតាំងអតីតអភិបាលក្រុងឡុងដ៍ លោក បូរីស ចនសុន (Boris Johnson) ជារដ្ឋមន្ត្រីការបរទេសថ្មី។ លោក ចនសុន នេះហើយដែលចេញមុខគាំទ្រឲ្យអង់គ្លេសចាកចេញពីអឺរ៉ុប ហើយពេលនេះ លោក នឹងត្រូវប្រឈមមុខជាមួយបញ្ហា ដែលលោកមានចំណែកបង្កើត។
បើតាមសារព័ត៌មាន BBC អតីតរដ្ឋមន្ត្រីការបរទេស Philip Hammond នឹងក្លាយជារដ្ឋមន្ត្រីហិរញ្ញវត្ថុថ្មី ហើយលោកស្រី Amber Rudd នឹងធ្វើជារដ្ឋមន្ត្រីមហាផ្ទៃ ខណៈតំណែងរដ្ឋមន្ត្រីការពារជាតិរបស់លោក Michael Fallon នឹងត្រូវរក្សាដដែល។ ជាមួយគ្នានេះ លោកស្រី Theresa May ក៏បានឲ្យលោក David Davis ទទួលខុសត្រូវលើការងារចរចាចេញសហភាពអឺរ៉ុបដែរ៕
Tag:
Brexit
Theresa May
Boris Johnson
© រក្សាសិទ្ធិដោយ thmeythmey.com