ចក្រភពអង់គ្លេសត្រូវការពេលវេលា មុននឹងចរចាចាកចេញពីអឺរ៉ុប

អន្តរជាតិ

នយោបាយអន្តរជាតិ

ចក្រភពអង់គ្លេសត្រូវការពេលវេលា មុននឹងចរចាចាកចេញពីអឺរ៉ុប

15, Jul 2016 , 9:19 am

រូបភាព

ដោយ: តន ចាន់រិទ្ធារ៉ា

បន្ទាប់ពីមានការទាមទារពីមេដឹកនាំអឺរ៉ុបឲ្យអង់គ្លេសចរចាចាកចេញឲ្យបានឆាប់ នាយករដ្ឋមន្ត្រីថ្មីរបស់ចក្រភពអង់គ្លេស បានបញ្ជាក់វិញថា ចក្រភពអង់គ្លេសត្រូវការពេលវេលាសិន មុននឹងចាប់ផ្ដើមការចរចាជាមួយសហភាពអឺរ៉ុប។ ចក្រភពអង់គ្លេស ដែលចាកចេញពីអឺរ៉ុប តាមរយៈប្រជាមតិថ្ងៃទី២៣ ខែមិថុនា ជួបប្រទះបញ្ហាជាច្រើន ជាពិសេសឱនភាពរូបិយវត្ថុ ដែលប៉ះពាល់ខ្លាំងសេដ្ឋកិច្ច។

ភ្លាមៗបន្ទាប់ពីចូលកាន់តំណែងជានាយករដ្ឋមន្ត្រីថ្មីរបស់ចក្រភពអង់គ្លេស ការងារដំបូងរបស់លោកស្រី Theresa May គឺបញ្ជាក់ពីជំហររបស់លោកស្រី ទៅកាន់មេដឹកនាំបារាំង និងអាល្លឺម៉ង់ ជុំវិញដំណើការចរចាចាកចេញពីអឺរ៉ុប។ នាយករដ្ឋមន្ត្រីស្ត្រីរូបនេះ បញ្ជាក់ថា ការចរចានឹងមិនទាន់ចាប់ផ្ដើមបាននោះទេ។

បើតាមសារព័ត៌មាន Reuters លោកស្រីនាយករដ្ឋមន្ត្រី បានប្រាប់ប្រធានាធិបតីបារាំង ហ្វ្រង់ស្វ័រ ហូឡង់ និងអធិការបតីអាល្លឺម៉ង់ Angela Merkel ថា រដ្ឋាភិបាលលោកស្រី ត្រូវការពេលវេលាសិន មុននឹងពិភាក្សាការចាកចេញពីសហភាពអឺរ៉ុប របស់ចក្រភពអង់គ្លេស។ ចំណែកអ្នកនាំពាក្យលោកស្រី និយាយដែរថា ក្នុងការសន្ទនាតាមទូរសព្ទនោះ លោកស្រី May ក៏បានបញ្ជាក់ពីការប្ដេជ្ញាចិត្ត គោរពតាមឆន្ទះប្រជាជនអង់គ្លេស ដែលជ្រើសរើសការចាកចេញពីអឺរ៉ុប។

អ្នកនាំពាក្យដដែល បន្តថា នៅថ្ងៃទី១៣ ខែកក្កដា ពោលគឺថ្ងៃចូលកាន់តំណែង លោកស្រី May បានពន្យល់ទៅមេដឹកនាំប្រទេសសហភាពអឺរ៉ុបទាំងពីរ ថា យើងត្រូវការពេលវេលា ដែលចាំបាច់សម្រាប់រៀបចំដំណើការចរចា។ ហើយលោកស្រី May ក៏បានបញ្ជាក់ក្ដីសង្ឃឹមថា ដំណើការចរចា នឹងធ្វើទៅជាមួយគំនិតស្ថាបនា ប្រកបដោយស្មារតីវិជ្ជមាន។

តាមពិតទៅ មេដឹកនាំអឺរ៉ុបទាមទារឲ្យរដ្ឋាភិបាលអង់គ្លេស សម្រេចចិត្តរឿងចរចាចាកចេញពីអឺរ៉ុប តាំងពីប្រជាមតិមកម្លេះ។ ប៉ុន្តែថ្នាក់ដឹកនាំរបស់ចក្រភពអង់គ្លេស ចេះតែពន្យារពេលរហូតមក ដល់ពេលដែលលោកខេមេរ៉ូនចាកចេញពីតំណែង។ បន្ទាប់ពីដឹងថា លោកស្រី Theresa May នឹងក្លាយជានាយករដ្ឋមន្ត្រីនោះ មេដឹកនាំអឺរ៉ុប ជាពិសេសអាល្លឺម៉ង់ ក៏តឿនឲ្យអង់គ្លេស បញ្ជាក់ពេលវេលាច្បាស់លាស់ដែរ។

នៅថ្ងៃទី១២ ខែកក្កដា អធិការបតីអាល្លឺម៉ង់ លោកស្រី Merkel បានប្រាប់អ្នកសារព័ត៌មានថា ការងាររបស់នាយករដ្ឋមន្ត្រីថ្មី គឺត្រូវសម្រេចឲ្យច្បាស់លាស់ពីទំនាក់ទំនងរវាងចក្រភពអង់គ្លេស និងសហភាពអឺរ៉ុប។ ចំណែករដ្ឋមន្ត្រីហិរញ្ញវត្ថុអាល្លឺម៉ង់ លោក Wolfgang Schaeuble និយាយដែរថា ភាពច្បាស់លាស់ គឺជារឿងចាំបាច់ ដើម្បីបញ្ចប់មន្ទិល ដែលកើតចេញពីការចាកចេញរបស់ចក្រភពអង់គ្លេស នៅក្រោយការធ្វើប្រជាមតិ៕