អន្តរជាតិ
លោក មហាធៀ សហការជាមួយបក្សប្រឆាំងដើម្បីផ្ដួលលោក ណាជីប
× លោក មហាធៀ មូហាម៉ាដ (Mahathir Mohamad) ដែលមានទំនាស់ជាមូយនាយករដ្ឋមន្ត្រីបច្ចុប្បន្ន លោក ណាជីប រ៉ាហ្សាក់ (Najib Razak) បានបង្កើតបក្សថ្មីមួយ ដើម្បីប្រជែងជាមួយសម្ព័ន្ធភាព Barisan Nasional របស់លោក Razak ក្នុងការបោះឆ្នោតអាណត្តិក្រោយ។ បក្សថ្មីនេះ ក៏នឹងមានវត្តមានអ្នកដែលធ្លាប់ប្រឆាំងនឹងរូបលោកផងដែរ។
អតីតនាយករដ្ឋមន្ត្រីម៉ាឡេស៊ី លោក មហាធៀ បានសម្រេចបង្កើតគណបក្សនយោបាយមួយ ជាមួយនឹងក្រុមប្រឆាំង ដើម្បីប្រជែងនឹងលោកនាយករដ្ឋមន្ត្រី ណាជីប រ៉ាហ្សាក់ និងសម្ព័ន្ធភាព Barisan Nasional ដែលលោក មហាធៀ ខ្លួនឯងធ្លាប់គ្រប់គ្រងអស់ពេលជាងម្ភៃឆ្នាំមកនោះ។ លោក មហាធៀ និងលោក ណាជីប ដែលធ្លាប់ស្និទ្ធស្នាលនឹងគ្នា បែរជាមើលមុខគ្នាមិនត្រូវ ដោយសាររឿងអាស្រូវពុករលួយ។
បើតាមសារព័ត៌មាន Asia Correspondent បក្សថ្មី ដែលគ្រោងបង្កើតនេះ នឹងមានវត្តលោក មហាធៀ ក៏ដូចជាអតីតគូប្រជែងជាច្រើនរបស់លោក មហាធៀ ដែលធ្លាប់ជាសត្រូវនយោបាយនឹងគ្នា។ ពួកគេ នឹងទុកបញ្ហាខុសគ្នាដោយឡែក និងរួមគ្នាដើម្បីបណ្ដេញលោកនាយករដ្ឋមន្ត្រី ណាជីប ពីតំណែង ដ្បិតលោក ណាជីប កំពុងរុំព័ទ្ធដោយបញ្ហាពុករលួយ។
ហើយគណបក្សថ្មី ដែលមិនទាន់មានឈ្មោះ នឹងចូលរួមជាមួយប្លុកប្រឆាំងរបស់បក្សយុត្តិធម៌ប្រជាជន (PKR) បក្សសកម្មភាពប្រជាធិបតេយ្យ (DAP) និងបក្ស Amanah។
អតីតនាយករដ្ឋមន្ត្រី មហាធៀ និយាយថា៖ «យើងឯកភាពគ្នា ទុកការខ្វែងគំនិតដោយឡែក និងងាកមកធ្វើការជាមួយគ្នា ជាសម្ព័ន្ធភាពវិញ។ យើងនឹងទុកការតស៊ូនយោបាយសិន និងផ្ដោតលើជ័យជម្នះការបោះឆ្នោតអាណត្តិក្រោយ»។ យ៉ាងណាមិញ រដ្ឋបុរសវ័យ៩១ឆ្នាំ នេះមិនប្រាកដថា នឹងចូលរួមការបោះឆ្នោត ដែលគ្រោងនឹងធ្វើក្នុងឆ្នាំ២០១៨នោះទេ។
ខ្ញុំជាស្ថាបនិកគណបក្សថ្មី ប៉ុន្តែមិនមែនមានន័យថា លោកក្លាយជាប្រធានបក្ស ឬនាយករដ្ឋមន្ត្រីនោះទេ។ នេះជាការបញ្ជាក់របស់លោក មហាធៀ មហាម៉ាដ ក្នុងសន្និសីទកាសែត ដែលចេញផ្សាយដោយសារព័ត៌មាន Asia Correspondent នៅថ្ងៃទី១៥ ខែកក្កដា។
សូមរម្លឹកថា កាលពីខែមុន លោក មហាធៀ មូហាម៉ាដ បានរិះគន់គណបក្សរបស់លោក ណាជីប ថា បានទិញសន្លឹកឆ្នោត បន្ទាប់ពីគណបក្សនេះ ទទួលជោគជ័យក្នុងការបោះឆ្នោតបំពេញបន្ថែមចំនួនពីរលើកកន្លងមក។ ជ័យជម្នះទាំងពីរលើកនេះ បានជួយពង្រឹងកម្លាំងរបស់នាយករដ្ឋមន្ត្រី ណាជីប រ៉ាហ្សាក់ បើទោះជាលោក រងការចោទប្រកាន់ជុំវិញអំពើពុករលួយ៕
© រក្សាសិទ្ធិដោយ thmeythmey.com