បាក់ឌុប៖ អ្នកចូលរួមសង្កេតការណ៍ជាង៦ពាន់នាក់ កើនឡើងជាងឆ្នាំមុន

ជាតិ

បាក់ឌុប៖ អ្នកចូលរួមសង្កេតការណ៍ជាង៦ពាន់នាក់ កើនឡើងជាងឆ្នាំមុន

16, Jul 2016 , 9:30 am

រូបភាព

ដោយ: ញឹក ស្រីល័ក្ខ (Nhek Sreyleak)

សម័យប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា នឹងប្រព្រឹត្តឡើងនៅថ្ងៃ២២ ខែសីហា ឆ្នាំ២០១៦នេះ។ អ្នកស្ម័គ្រចិត្តសង្កេតការណ៍អង្គភាពប្រឆាំងអំពើពុករលួយ (ACU) នឹងឃ្លាំមើលពីដំណើរការប្រឡងដូចឆ្នាំមុនដែរ ដើម្បីរាយការណ៍ ទប់ស្កាត់អំពើពុករលួយក្នុងពេលប្រឡង។ អ្នកស្ម័គ្រចិត្ត សង្កេតការណ៍ឆ្នាំ២០១៦នេះ មានចំនួន ៦១៧១នាក់ កើនឡើងទ្វេដង បើប្រៀបធៀបនឹងសម័យប្រឡង២០១៤ និង២០១៥។

អង្គភាពប្រឆាំងអំពើពុករលួយ បានប្រកាសឈប់ទទួលពាក្យស្នើសុំចូលរួមសង្កេតការណ៍ការប្រឡងសញ្ញាបត្រមធ្យមសិក្សាទុតិយភូមិ ដែលអង្គការសង្គមស៊ីវិល បុគ្គលឯកជន សិស្សនិស្សិត មានបំណងស្ម័គ្រចូលរួមធ្វើជាអ្នកសង្កេតការណ៍ការប្រឡងបាក់ឌុប។ ក្រោយពីបានផ្អាកការទទួលចុះឈ្មោះមួយសប្ដាហ៍កន្លងទៅ អង្គភាពប្រឆាំងអំពើពុករលួយ បានទទួលអ្នកចុះឈ្មោះស្ម័គ្រសង្កេតការណ៍រហូតដល់ ៦១៧១ នាក់ បើប្រៀបធៀបចំនួនអ្នកសង្កេតការណ៍ស្ម័គ្រចិត្តទៅនឹងចំនួនបន្ទប់ប្រឡង មានចំនួនលើស ២៣៩០ នាក់ ដែលជាចំនួនលើសពីតម្រូវការ។

ក្រសួងអប់រំ យុវជន និងកីឡា បានសហការជាមួយអង្គភាពប្រឆាំងអំពើពុករលួយ បើកអោយមានអ្នកសង្កេតការណ៍សង្គមស៊ីវិល និងសិស្សនិស្សិត លើកទី១ នៅសម័យប្រឡងបាក់ឌុបឆ្នាំ២០១៤ មានចំនួនជាង៣ពាន់នាក់ លើកទី២ សម័យប្រឡងឆ្នាំ២០១៥ មានចំនួនជាង៥ពាន់នាក់ និងក្នុងឆ្នាំ២០១៦នេះ កើនឡើងខ្ពស់រហូតដល់ជាង៦ពាន់នាក់។

សូមបញ្ជាក់ថា សម័យប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម្រាប់ឆ្នាំសិក្សា២០១៥-២០១៦ នឹងចាប់ផ្តើមនៅថ្ងៃទី ២២-២៣ ខែសីហា ឆ្នាំ២០១៦ ។ ដោយមានបេក្ខជនប្រឡងប្រមាណជាង៨ម៉ឺននាក់ ទាំងថ្នាក់វិទ្យាសាស្ត្រ និងវិទ្យាសាស្ត្រសង្គម ចែកចេញជា ១៥៧ មណ្ឌល និងចំនួន ៣,៧៨១ បន្ទប់ប្រឡង នៅទូទាំងរាជធានី-ខេត្ត៕