អន្តរជាតិ
ស្វីស ៖ ចិញ្ចឹមត្រីកន្ទុយបីតែមួយក្បាល ជារឿងខុសច្បាប់
× មនុស្សភាគច្រើនចូលចិត្តចិញ្ចឹមសត្វទុកធ្វើជាមិត្តនៅក្នុងផ្ទះរបស់ខ្លួន។ អ្នកខ្លះចិញ្ចឹមសត្វឆ្កែ សត្វឆ្មា រីឯខ្លះទៀតចូលចិត្តត្រីក្រឹម។ ជួនកាល ចំណូលចិត្តរបស់អ្នកក្លាយជាទង្វើដ៏ឃោរឃៅចំពោះមិត្តសម្លាញ់សត្វ ដោយអ្នកពុំបានដឹងខ្លួនឡើយ។ នៅប្រទេសស្វីស សត្វចិញ្ចឹមទាំងឡាយត្រូវបានទទួលការការពារយ៉ាងល្អ។ ជាក់ស្តែង ការចិញ្ចឹមត្រីកន្ទុយបីតែមួយក្បាលដាក់ក្នុងកែវ ឬអាង ត្រូវបានចាត់ទុកជារឿងខុសច្បាប់ចាប់តាំងពីឆ្នាំ ២០០៨ មក។ តើហេតុអ្វីទៅ ?
ត្រីគឺជាពពួកសត្វដែលពូកែអផ្សុក ដោយហេតុថា ជីវិតតាមបែបធម្មជាតិរបស់ពួកវា គឺពួកវាតែងហែលក្នុងទឹកជាហ្វូងៗ។ ហេតុនេះ ត្រីត្រូវការដៃគូដោយមិនអាចខ្វះបាន។ រដ្ឋាភិបាលស្វីសបានកំណត់ថា ការបង្ខាំងត្រីពពួកនេះឲ្យរស់នៅក្នុងភាពឯកា គឺជាទង្វើដ៏ព្រៃផ្សៃ។ មិនត្រឹមតែត្រីកន្ទុយបីប៉ុណ្ណោះទេ សត្វចិញ្ចឹមផ្សេងទៀតដូចជា កណ្តុរប្រែង និងសេក ក៏ស្ថិតក្នុងការការពារដោយច្បាប់នេះផងដែរ។
ចំណែកសត្វឆ្កែវិញ អ្នកដែលចង់ចិញ្ចឹមមិត្តសម្លាញ់ឆ្កែ ត្រូវតែឆ្លងកាត់វគ្គបណ្តុះបណ្តាលជាមុនសិន នេះបើតាមគេហទំព័រ techly.com ។ រីឯសត្វឆ្មាវិញ បើសិនជាអ្នកចិញ្ចឹមវាតែមួយក្បាល អ្នកត្រូវតែឲ្យវាចេញដើរហើរខាងក្រៅបាន។ បើពុំដូច្នោះទេ អ្នកត្រូវតែចិញ្ចឹមឆ្មាពីរក្បាល៕
ប្រភព៖ Mirror
© រក្សាសិទ្ធិដោយ thmeythmey.com