ជាតិ
ក្រសួងគ្រោងរៀបចំមន្ទីរពិសោធន៍ និងដាក់ម៉ាស៊ីនត្រួតពិនិត្យគុណភាពសាច់សត្វនាំចូលពីបរទេស លោក វេង សាខុន រដ្ឋមន្ត្រីក្រសួងកសិកម្ម
× ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ គ្រោងរៀបចំមន្ទីរពិសោធន៍ និងដាក់ម៉ាស៊ីនត្រួតពិនិត្យគុណភាពសាច់សត្វនាំចូលពីបរទេសតាមច្រករបៀងសំខាន់ៗ ដើម្បីត្រួតពិនិត្យគុណភាពសាច់សត្វ និងកាត់បន្ថយផលប៉ះពាល់ដល់សុខភាពអ្នកប្រើប្រាស់។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា AKP។
ទីភ្នាក់ងារសារព័ត៌មានកម្ពុជា បានដកស្រង់សម្ដីរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងពិធីផ្សព្វផ្សាយច្បាប់ស្ដីពី «សុខភាពសត្វ និងផលិតកម្មសត្វ» ថា ដោយសង្កេតឃើញ កន្លងមកមានការចរាចរសាច់សត្វខូចគុណភាព ឬសាច់មានផ្ទុកសារធាតុគីមីនៅកម្ពុជា ជាពិសេសម្ហូបអាហារ ដែលធ្វើឲ្យប៉ះពាល់ ដល់សុខភាពពលរដ្ឋ ក្រសួងបានធ្វើការស្នើសុំថវិការជាតិ ក្នុងការរៀបចំមន្ទីរពិសោធន៍ និងដាក់ម៉ាស៊ីនត្រួតពិនិត្យតាមច្រកព្រំដែន។ ម្យ៉ាងវិញទៀត ដោយសារកន្លងមកនេះ មានការនាំចូលប្រហិតសាច់ ប្រហិតត្រី ដែលមានផ្ទុកសារធាតុគីមី ដើម្បីរក្សាគុណភាពកុំឲ្យស្អុយ និងខូចគុណភាព។
ទន្ទឹមនឹងនេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា៖ នាយកដ្ឋាន បសុព្យាបាលនៃ ក្រសួងកសិកម្ម ដោយមានការគាំទ្រពីសហគមន៍អឺរ៉ុប និងរៀបចំប្រព័ន្ធគ្រប់គ្រង និងដាក់ម៉ាស៊ីនដែលនឹងមកដល់កម្ពុជា នាខែតុលាខាងមុខនេះ។ ដោយឡែក ម៉ាស៊ីនត្រួតពិនិត្យគុណភាពសាច់សត្វនាំចូលពីបរទេសនេះ ក៏អាចត្រួតពិនិត្យគុណភាពសាច់ត្រី ត្រីងៀត ប្រហុក និងផ្អក ដែលមានដាក់សារធាតុគីមីកុំឲ្យមានក្លិនស្អុយ មិនឲ្យមានរុញរោម និងរក្សាគុណភាពបានយូរ ក្នុងផលិតផលកសិកម្មដែលលក់ក្នុងទីផ្សារកម្ពុជា។
លើសពីនេះ កម្ពុជាបាននាំចូលសាច់សត្វ ប្រមាណជាង ១០០ លានដុល្លា ក្នុងមួយឆ្នាំ ក្នុងនោះសាច់ត្រី មានប្រមាណ ៤៥ លានដុល្លាផងដែរ។ គួរបញ្ជាក់ថា កម្ពុជាបាននាំចេញសាច់ត្រី បានត្រឹមតែ ៤០ លានដុល្លា ក្នុងមួយឆ្នាំតែប៉ុណ្ណោះ។ ចំពោះការនាំចេញតិចតួចនេះ បានធ្វើឲ្យកម្ពុជាបាត់បង់ចំណូលសេដ្ឋកិច្ចជាតិ ខណៈដែលប្រជាជនកម្ពុជា កើនឡើងក្នុងឆ្នាំ២០២០ ជាង១៧លាននាក់ បូកបញ្ជូលទាំងភ្ញៀវទេសចរផងនោះ កម្ពុជានឹងត្រូវការសាច់សត្វ ប្រមាណជាង៣១៤ ពាន់តោនក្នុងមួយឆ្នាំ៕
© រក្សាសិទ្ធិដោយ thmeythmey.com