កូរ៉េខាងត្បូង ពិចារណាទីតាំងថ្មីដំឡើងខែលការពារមីស៊ីលអាមេរិក ក្រោយរងការរិះគន់ខ្លាំងពីប្រជាជន

អន្តរជាតិ

កូរ៉េខាងត្បូង ពិចារណាទីតាំងថ្មីដំឡើងខែលការពារមីស៊ីលអាមេរិក ក្រោយរងការរិះគន់ខ្លាំងពីប្រជាជន

04, Aug 2016 , 5:23 pm

រូបភាព

ដោយ:

រដ្ឋាភិបាលក្រុងសេអ៊ូល កំពុងតែពិចារណាក្នុងការប្តូរទីតាំងថ្មីសម្រាប់ដំឡើងប្រព័ន្ធការពារមីស៊ីល THAAD របស់អាមេរិកក្នុងទឹកដីខ្លួន។ លទ្ធភាពនៃការផ្លាស់ប្តូរនេះ ត្រូវបានធ្វើឡើង បន្ទាប់ពីរងនូវការរិះគន់ និងប្រឆាំងជាខ្លាំងពីសំណាក់ប្រជាជនកូរ៉េខាងត្បូងដែលរស់នៅក្នុងតំបន់ដែលបានកំណត់ពីមុន។

លោកស្រីប្រធានាធិបតីកូរ៉េខាងត្បូង Park Geun-hye បានថ្លែងថា រដ្ឋាភិបាលរបស់លោកស្រី អាចនឹងពិចារណាក្នុងការពង្រាយប្រព័ន្ធការពារមីស៊ីល THAAD នៅទីតាំងថ្មី ក្នុងខេត្ត Seongju ដែលនៅមានចម្ងាយត្រឹម២៩៦គីឡូម៉ែតភាគខាងត្បូងនៃក្រុងសេអ៊ូលប៉ុណ្ណោះ។ នេះបើយោងតាមការចុះផ្សាយរបស់ភ្នាក់ងារព័ត៌មានកូរ៉េខាងត្បូង Yonhap នៅថ្ងៃទី០៤ ខែសីហានេះ។

សេចក្តីថ្លែងការណ៍របស់លោកស្រីប្រធានាធិបតីរូបនេះ ក៏ស្របជាមួយនឹងការប្រកាសរបស់ក្រសួងការពារជាតិកូរ៉េខាងត្បូង ដែលស្ថាប័នទទួលបន្ទុកលើកិច្ចការនេះ ដោយបានអះអាង នៅថ្ងៃទី០៤ ខែសីហានេះថា ក្រសួងនឹងពិចារណាទីតាំងថ្មីនៅក្នុងខេត្ត Seongju សម្រាប់ការដំឡើង THAAD ប្រសិនបើ រដ្ឋបាលថ្នាក់ខេត្ត ស្នើពីលទ្ធភាពនៃការសិក្សាថ្មីមួយទៀតនោះ។

សូមរម្លឹកផងដែរថា រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូល នៅថ្ងៃទី០៨ ខែកក្កដាកន្លងទៅ បានព្រមព្រៀងជាផ្លូវការក្នុងការដំឡើងប្រព័ន្ធការពារមីស៊ីលរបស់អាមេរិកនៅក្នុងទីកដីកូរ៉េខាងត្បូង។ ក្រោយមក នៅថ្ងៃទី១៣ ខែកក្កដាដដែលនោះ ក្រសួងការពារជាតិកូរ៉េខាងត្បូង ក៏បានប្រកាសទីតាំងជាផ្លូវការដើម្បីដំឡើងប្រព័ន្ធការពារមីស៊ីលធុនធ្ងន់នោះ ដោយនឹងដាក់នៅក្នុងខេត្តសឹងជឺ (Seongju) ដែលស្ថិតនៅភាគខាងត្បូងប្រទេស។

ក្រោយការប្រកាសនេះ មានប្រជាជនកូរ៉េខាងត្បូងរាប់ពាន់ បានផ្ទុះបាតុកម្មប្រឆាំងនឹងការដំឡើងនោះ។ នៅថ្ងៃទី១៦ ខែកក្កដាកន្លងទៅ ប្រជាជនកូរ៉េខាងត្បូងជាង៣០០០នាក់ បានផ្ទុះបាតុកម្ម និងឡោមព័ទ្ធឡានក្រុងរបស់លោកនាយករដ្ឋមន្ត្រី Hwang Kyo-ahn នៅខេត្ត Seongju ភាគខាងត្បូងនៃប្រទេសកូរ៉េខាងត្បូង ដោយពួកគេ បានសន្យាថា នឹងធ្វើឲ្យកិច្ចព្រមព្រៀងនៃការដំឡើងខែលការពារមីស៊ីល(THAAD) ត្រូវលុបចោលផងដែរ៕