ពិន័យពី ៥ ទៅ ២០ លានរៀល បើជនណារារាំងពលរដ្ឋមានសិទ្ធិបោះឆ្នោត មិនឲ្យចុះឈ្មោះបោះឆ្នោត

ជាតិ

នយោបាយជាតិ

ពិន័យពី ៥ ទៅ ២០ លានរៀល បើជនណារារាំងពលរដ្ឋមានសិទ្ធិបោះឆ្នោត មិនឲ្យចុះឈ្មោះបោះឆ្នោត

05, Aug 2016 , 8:49 am

រូបភាព

ដោយ:

ច្បាប់បោះឆ្នោតជ្រើសរើសក្រុមប្រឹក្សាឃុំ សង្កាត់ ថ្មី ដែលបានចូលជាធរមានកាលពីចុងឆ្នាំ ២០១៥ ត្រង់មាត្រា ១៧១ បានអនុញ្ញាតឲ្យគណៈកម្មាធិការជាតិរៀបចំកាបោះឆ្នោត ពិន័យប្រាក់ ៥ ទៅ ២០ លានរៀល ដោយពុំទាន់គិតដល់ទោសទណ្ឌផ្សេងទៀត ចំពោះជនណាដែលប្រព្រឹត្តគ្រប់មធ្យោបាយទុច្ចរិតខាងក្រោម៖

ទី ១ ការសកម្មភាព រារាំងប្រជាពលរដ្ឋដែលមានសិទ្ធិបោះឆ្នោត មិនឲ្យទៅចុះឈ្មោះបោះឆ្នោត ឬរារាំងមិនឲ្យចុះឈ្មោះប្រជាពលរដ្ឋ ដែលមានសិទ្ធិបោះឆ្នោតក្នុងបញ្ជីបោះឆ្នោត និងសៀវភៅបញ្ជីបោះឆ្នោត។ ចំណុចទី ១ នេះ ក្រៅពីពិន័យជាប្រាក់ហើយ មាត្រា ១៧១ ដដែលនេះ ក៏ឲ្យគណៈកម្មាធិការជាតិរៀបចំការបោះឆ្នោត លុបឈ្មោះជនដែលប្រព្រឹត្តចេញពីបញ្ជីឈ្មោះបោះឆ្នោត ឬលុបបេក្ខភាពរបស់សាមីខ្លួនផងដែរ។

ទី ២ ការធ្វើសកម្មភាព ទិញសន្លឹកឆ្នោតដោយសម្ភារ ឬដោយប្រាក់កាស ធ្វើឲ្យខូចរបៀបរៀបរយក្នុងពេលបោះឆ្នោត បង្កការរំខានមិនឲ្យរាប់សន្លឹកឆ្នោតបាន បង្កការរំខានមិនឲ្យដំណើរការបោះឆ្នោតបាន ធ្វើឲ្យមានការភាន់ច្រឡំនាំឲ្យបាត់ទំនុកចិត្តលើការបោះឆ្នោត។

ទី ៣ ការធ្វើសកម្មភាព បង្កការអុកឡុក ឬរារាំងសកម្មភាពជាប្រក្រតី ក្នុងទីកន្លែងសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅអំឡុងពេលនៃការពិនិត្យបញ្ជី និងចុះឈ្មោះបោះឆ្នោត។

ទី ៤ ការបញ្ជាឲ្យអ្នកគាំទ្រ ឬអ្នកបោះឆ្នោត ប្រព្រឹត្តអំពើរំលោភបំពាន អំពើគំរាមកំហែង អំពើហិង្សាទៅលើបេក្ខជន ឬទៅលើគណបក្សនយោបានដទៃ។

ទី ៥ ការធ្វើសកម្មភាព រារាំងប្រជាពលរដ្ឋដែលមានសិទ្ធិបោះឆ្នោត មិនឲ្យទៅបោះឆ្នោត ។

ទី ៦ ការរារាំងបេក្ខជន ឬអ្នកគាំទ្រគណបក្សនយោបាយមិនឲ្យឃោសនាបោះឆ្នោត តាមការកំណត់។

ទី ៧ ការធ្វើឲ្យបាត់ទំនុកចិត្តលើការសម្ងាត់នៃការបោះឆ្នោត៕