ជាតិ
នយោបាយជាតិ
សម្តេច ហេង សំរិន មិនពេញចិត្ត ហើយឲ្យមេធាវីប្តឹងឧទ្ធរណ៍ទារឯ.ឧ សម រង្ស៊ី ឲ្យបាន៣០០ លានរៀល លោក គី តិច មេធាវីរបស់សម្តេច ហេង សំរិន និងសម្តេច ហ៊ុន សែន
× កាលពីព្រឹកមិញនេះ មេធាវីការពារក្តីរបស់សម្តេច ហេង សំរិន លោក គី តិច បានដាក់ពាក្យបណ្តឹងទៅសាលាឧទ្ធរណ៍ ដើម្បីប្រឆាំងនឹងសាលក្រមរបស់តុលាការរាជធានីភ្នំពេញដែលឲ្យឯកឧត្តម សម រង្ស៊ី បង់ប្រាក់ជំងឺចិត្តជូនសម្តេច ហេង សំរិន តែ ១៥០ លានរៀលនោះ។
លោក គី តិច បានអះអាងថា សម្តេច ហេង សំរិន មិនពេញចិត្តនឹងសំណងជំងឺចិត្ត ដែលតុលាការដំបូងសម្រេចឲ្យឯកឧត្តម សម រង្ស៊ី បង់តែ ១៥០ លានរៀលជូនសម្តេចនោះទេ។លោក បន្ថែមថា សម្តេច ហេង សំរិន ជាមន្រ្តីថ្នាក់ខ្ពស់របស់កម្ពុជា មិនអាចទទួលយកនូវសំណងជំងឺចិត្តត្រឹមតែ ១៥០ លានរៀលទេ ទើបសម្តេច ហេង សំរិន ឲ្យលោកប្តឹងជំទាស់ការសម្រេចនេះទៅឧទ្ធរណ៍ ទាមទារឲ្យឯកឧត្តម សម រង្ស៊ី សងជំងឺចិត្តឲ្យបាន ៣០០ លានរៀល។
សាលាដំបូងរាជធានីភ្នំពេញ បានសម្រេចពិន័យឯកឧត្តម សម រង្ស៊ី ឲ្យបង់ថវិកាចំនួន១០លានរៀលជូនរដ្ឋ និងសងសំណងជំងឺចិត្តចំនួន ១៥០លានរៀលប៉ុណ្ណោះជូន សម្តេច ហេង សំរិន ពីបទបរិហារកេរ្តិ៍ជាសាធារណៈ តាមមាត្រា ៣០៥ នៃក្រមព្រហ្មទណ្ឌ ។ តែបើតាមពាក្យបណ្ដឹងលោក គី តិច មេធាវីតំណាងរបស់សម្តេច ហេង សំរិន ដែលបានប្ដឹងឯកឧត្តម សម រង្ស៊ី ទៅសាលាដំបូងនោះបានប្តឹងទារជំងឺចិត្ត ៣០០ លានរៀល។
សូមបញ្ជាក់ថា លោក គី តិច ថ្លែងប្រាប់អ្នកកាសែតបែបនេះ ក្រោយពីរូបលោកចូលបំភ្លឺនៅតុលាការដំបូងរឿងបណ្តឹងរបស់សម្តេច ហ៊ុន សែន ប្តឹងឯកឧត្តម សម រង្ស៊ី និងអ្នកស្រី ថាក់ ឡានី សមាជិកព្រឹទ្ធសភារបស់គណបក្សសម រង្ស៊ី ជុំវិញករណីរបស់លោក កែម ឡី។ លោក គី តិច បានចោទឯកឧត្តម សម រង្ស៊ី និងអ្នកស្រី ថាក់ ឡានី ថា បានរៀបចំគម្រោងទុកជាមុន ដើម្បីចោទសម្តេច ហ៊ុន សែន ថា ជាអ្នកសម្លាប់លោក កែម ឡី។ © រក្សាសិទ្ធិដោយ thmeythmey.com