ជាតិ
ការដំឡើងថ្លៃសំបុត្រទស្សនាអង្គរធ្វើឲ្យសមាគមទេសចរណ៍កោះប្រជុំបន្ទាន់
× សៀមរាប៖ រដ្ឋាភិបាលកម្ពុជា តាមរយៈគ្រឹះស្ថានអង្គរ បានចេញសេចក្តីជូនដំណឹង ស្តីពីការចាប់ផ្តើមរៀបចំតម្លៃលក់សំបុត្រទស្សនារមណីយដ្ឋានអង្គរថ្មី។ រដ្ឋាភិបាលកម្ពុជា បានសម្រេចដំឡើងថ្លៃទស្សនារមណីយដ្ឋានអង្គរទ្វេដង បើធៀបនឹងតម្លៃចាស់។ ការណ៍នេះ ធ្វើឲ្យមានមតិលើកឡើងស្រដៀងៗគ្នាថាមានតម្លៃថ្លៃ ចំណែកសមាគមទីភ្នាក់ងារទេសចរណ៍កម្ពុជានោះវិញ កំពុងរៀបចំកិច្ចប្រជុំមួយនៅរសៀលថ្ងៃទី៥ សីហានេះ។
គ្រឹះស្ថានអង្គរ ដែលជាស្ថាប័នគ្រប់គ្រងចំណូលពីការលក់សំបុត្រទស្សនារមណីយដ្ឋានអង្គរ បានចេញសេចក្តីជូនដំណឹងមួយនៅថ្ងៃទី៥ សីហា។ ក្នុងសេចក្តីជូនដំណឹងនោះ បានរៀបរាប់ជុំវិញព័ត៌មាន នៃការផ្លាស់ប្តូរតម្លៃសំបុត្រ ឫប័ណ្ណទស្សនាអង្គរ។ សេចក្តីជូនដំណឹងបានសរសេរថា ប័ណ្ណទស្សនាសម្រាប់១ថ្ងៃ ដំឡើងពី២០ដុល្លារ ទៅ៣៧ដុល្លារ សម្រាប់៣ថ្ងៃ ដំឡើងពី៤០ទៅ ៦២ដុល្លារ និងសម្រាប់៧ថ្ងៃ ដំឡើងពី៦០ដុល្លារ ទៅ៧២ដុល្លារ។
ការអនុវត្តតម្លៃថ្មីនេះ បើយោងតាមសេចក្តីជូនដំណឹងខាងដើម នឹងចាប់ផ្តើមអនុវត្តន៍ចាប់ពីថ្ងៃទី១ ខែកុម្ភៈ ឆ្នាំ២០១៧តទៅ ហើយក្នុងតម្លៃបន្ថែមនោះ គឺ២ដុល្លារ ត្រូវបង់ចូលក្នុងមូលនិធិមន្ទីរពេទ្យគន្ធបុប្ផា។
សារព័ត៌មានថ្មីៗ មិនអាចសុំការបំភ្លឺពីអ្នកនាំពាក្យក្រសួងសេដ្ឋកិច្ចបានទេ ទាំងលោក លី សែ នាយកប្រតិបត្តិគ្រឹះស្ថានអង្គរ។ ប៉ុន្តែគេនៅចាំថា រដ្ឋមន្ត្រីលោក អូន ព័ន្ធមុនីរ័ត្ន ធ្លាប់បាននិយាយថា រដ្ឋាភិបាលមានគោលការណ៍ដំឡើងថ្លៃប័ណ្ណនេះយូរហើយ។ ក្នុងពិធីបើកសម្ភោធជាផ្លូវការគ្រឹះស្ថានអង្គរ កាលពីថ្ងៃទី១ មិនា ឆ្នាំ២០១៦ នៅក្នុងខេត្តសៀមរាប លោក អូន ព័ន្ធមុនីរ័ត្ន បាននិយាយថា តម្លៃបច្ចុប្បន្ន (២០ដុល្លារ) គឺមិនស័ក្តសមនឹងតម្លៃនៃសម្បត្តិវប្បធម៌របស់ប្រាង្គប្រាសាទខ្មែរឡើយ។
ការដំឡើងតម្លៃប័ណ្ណទស្សនានេះ ក៏មានប្រតិកម្មពីសំណាក់សមាគមមគ្គុទ្ទេសក៍ទេសចរណ៍ផងដែរ។ លោក រស់ សណ្តាន ប្រធានសមាគមមគ្គុទ្ទេសក៍ទេសចរណ៍ជនជាតិខ្មែរនិយាយភាសារុស្ស៊ី បង្ហាញអារម្មណ៍ថា វាហាក់ដូចជាថ្លៃបន្តិចសម្រាប់ការយល់ឃើញរបស់លោក។ លោកពន្យល់ថា ក្នុងស្ថានភាព ដែលពិភពលោក កំពុងមានវិបត្តិសេដ្ឋកិច្ច រដ្ឋាភិបាលមិនគួរដំឡើងថ្លៃនោះទេ។ លោកបន្ថែមថា៖« ទាំងវិបត្តិសេដ្ឋកិច្ចពិភពលោក វិបត្តិនយោបាយ ខ្ញុំថាគោលការណ៍នេះវាមិនស៊ីគ្នាសោះ។ ដល់ពេលគេកំពុងតែធ្លាក់ យើងបែរជាដំឡើងថ្លៃ វាមិនស៊ីគ្នា។ វាល្អហើយ បើយើងចង់លើកតម្លៃបេតិកភណ្ឌជាតិយើងនោះ»។
ប្រធានសមាគមទីភ្នាក់ងារទេសចរណ៍កម្ពុជាប្រចាំខេត្តសៀមរាប លោក ផាវ ព្រឿន មិនទាន់អាចសុំការបំភ្លឺបានទេ ប៉ុន្តែលោកបញ្ជាក់ខ្លីនៅរសៀលនេះថា សមាគមរបស់លោក កំពុងបើកកិច្ចប្រជុំមួយជាបន្ទាន់ ជុំវិញការកំណត់គោលការណ៍ថ្មីរបស់រដ្ឋាភិបាលនៅពេលនេះ។
ទាំងទីភ្នាក់ងារទេសចរណ៍ ទាំងសមាគមមគ្គុទ្ទេសក៍ទេសចរណ៍ក្នុងខេត្តសៀមរាប ធ្លាប់បានសម្តែងការបារម្ភជុំវិញការធ្លាក់ភ្ញៀវទេសរបរទេស ខណៈដែលក្រសួងទេសចរណ៍អះអាងថា បន្តកើនឡើងរៀងរាល់ឆ្នាំ។ ការដំឡើងថ្លៃពន្ធនៅតាមសណ្ឋាគារ ប៊ូទិក ផ្ទះសំណាក់ ទីភ្នាក់ងារទេសចរណ៍ ជាមូលហេតុមួយដែលធ្វើឲ្យកញ្ចប់ទេសចរណ៍ក្នុងស្រុកបង្កើនតម្លៃលក់ដល់ភ្ញៀវទេសចរ ខណៈដែលទេសចរទាំងនោះ អាចនឹងងាកទៅកម្សាន្តនៅបណ្តាប្រទេសផ្សេងទៀត មាននៅវៀតណាម ថៃ និងមីយ៉ាន់ម៉ាជាដើម។
ក្រៅពីករណីខាងលើនេះ ក្នុងនោះការដំឡើងតម្លៃ វីសា (VISA) នៅតាមព្រលានយន្តហោះ ក៏ជាដើមហេតុ ធ្វើឲ្យប៉ះពាល់ដល់វិស័យទេសចរណ៍ផងដែរ។ ការដំឡើងតម្លៃវីសា ចាប់ពី២០ដុល្លារទៅ៣០ដុល្លារ។ បញ្ហាទារលុយពីភ្ញៀវរបស់ប៉ូលិសអន្តោប្រវេសន៍នៅព្រលានយន្តហោះអន្តរជាតិខេត្តសៀមរាប ក៏ជារឿងមួយបន្ថែមទៀតដែរ ដែលករណីនេះធ្លាប់កើតញឹកញាប់ទៅទេសចរជនជាតិចិន និងកូរ៉េ ប៉ុន្តែគេមិនឃើញមានដំណោះស្រាយបែបណានោះទេ៕
© រក្សាសិទ្ធិដោយ thmeythmey.com