គយនឹងបញ្ជូនសំណុំរឿងភ្លុកដំរីទៅតុលាការ

ជាតិ

សង្គមជាតិ

គយនឹងបញ្ជូនសំណុំរឿងភ្លុកដំរីទៅតុលាការ

05, Aug 2016 , 9:37 pm

រូបភាព

ដោយ:

ភ្នំពេញ៖ មន្ត្រីសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ នឹងបញ្ជូនសំណុំរឿងភ្លុកដំរីនាំចូលខុសច្បាប់ជាង កន្លះតោន ឡើងតុលាការ នៅសប្តាហ៍ក្រោយ។ នេះបើតាមលោក គិន លី ប្រធានសាខាគយ និងរដ្ឋាករប្រចាំកំពង់ផែអន្តរជាតិ ក្រុងព្រះសីហនុ។

គយកំពង់ផែអន្តរជាតិខេត្តព្រះសីហនុបានសម្រេចឆែកឆេរកុងតឺន័រដែលឈ្មួញលួចដាក់បង្កប់ភ្លុកដំរីក្នុងបាវពោតចំនួន ៦១៣គីឡូក្រាម នៅថ្ងៃទី៥ ខែសីហានេះ។

ប្រធានសាខាគយ និងរដ្ឋាករប្រចាំកំពង់ផែអន្តរជាតិ ក្រុងព្រះសីហនុ លោក គិន លី បានប្រាប់សារព័ត៌មានថ្មីថា ឈ្មួយបានបន្លំបង្កប់ភ្លុកដំរីក្នុងបាវពោតក្នុងកុងតឺន័រចំនួនពីរដែលនាំពីទ្វីបអាហ្វ្រិក ចូលមកកម្ពុជា តាមច្រកកំពង់ផែខេត្តព្រះសីហនុ កាលពីឆ្នាំ២០១៤ ហើយម្ចាស់ទុកចោលពុំចូលខ្លួនមកបំពេញបែបបទនាំចេញអស់រយៈពេល ២ឆ្នាំកន្លងទៅ។

ប្រធានសាខាគយរូបនេះ បន្តប្រាប់ពីមូលហេតុនាំឲ្យគយ និងតំណាងអយ្យការអមសាលាដំបូងខេត្តព្រះសីហនុសម្រេចឆែកទូរកុងតឺន័រទាំងពីរខាងលើពេលនេះ ព្រោះពួកគេទន្ទឹងរង់ចាំជួបម្ចាស់កុងតឺន័រដឹកពោត រយៈពេល ២ឆ្នាំ តែពួកគេពុំឃើញម្ចាស់ទំនិញចូលខ្លួនបំពេញបែបបទយកអីវ៉ាន់ចេញឡើយ។ ហើយថា មន្ត្រីសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ បានថតឃើញ ឬស្កែនឃើញតាំងពីឆ្នាំ២០១៤ មកម្ល៉េះ។

«យើងបានរង់ចាំម្ចាស់ ទំនិញមកបំពេញបែបបទនាំយកទំនិញចេញពីកំពង់ផែអន្តរជាតិ ក្រុងព្រះសីហនុ អស់រយៈពេល ២ឆ្នាំ នៅតែមិនឃើញគេមកយក ទើបស្ថាប័ននេះអនុវត្តការងារឲ្យស្របតាមច្បាប់ស្ដីពីគយ។ យើងនឹងបញ្ជូនសំណុំរឿងនេះ ទៅតុលាការ នៅដើមសប្តាហ៍»។ នេះជាការបញ្ជាក់របស់លោក គិន លី តាមរយៈខ្សែទូរសព្ទ អំពីទូរកុងតឺន័រផ្ទុកភ្លុកដំរីចំនួន ៦១៣គីឡូក្រាម។

បើតាមលោក គិន លី ភ្លុកដំរីទាំងនេះ ត្រូវឈ្មួយបន្លំបង្កប់ក្នុងបាវពោតនាំចូលពីទ្វីបអាហ្វ្រិក (Africa) ឆ្លងកាត់កម្ពុជារួច បន្តនាំចេញទៅកាន់ប្រទេសផ្សេងទៀត។ តែលោកដឹងច្បាស់ ពីប្រទេសគោលដៅចុងក្រោយឡើយ។

តាមពិតទៅ អាហ្វ្រិកជាជម្រកនៃសត្វដំរីព្រៃចម្លោះពី៤៥ម៉ឺនក្បាល ទៅ៥០ម៉ឺនក្បាលឯណោះ ប៉ុន្តែរឿងគួរឲ្យសង្វេក គឺសត្វដំរីច្រើនជាង ៣ម៉ឺនក្បាល ត្រូវបានគេសម្លាប់យកភ្លុករាល់ឆ្នាំ ដើម្បីបំពេញតម្រូវទីផ្សារនៅអាស៊ី ដែលកំពុងត្រូវការភ្លុកសត្វព្រៃ។ បើតាមទីភ្នាក់ងារព័ត៌មាន AFP ភ្លុកសត្វនេះ ត្រូវបានគេលក់ចេញទៅទីផ្សារអាស៊ី ក្នុងតម្លៃ ១០០០ ដុល្លារក្នុងមួយគីឡូក្រាម ហើយទីផ្សារធំសម្រាប់ភ្លុកសត្វពីអាហ្វ្រិក គឺប្រទេសចិន៕