មេធាវីឯ.ឧ កឹម សុខា ត្រៀមខ្លួនតតាំងក្តី បើចៅក្រមស៊ើបសួរបញ្ជូនសំណុំរឿងទៅជំនុំជម្រះ

ជាតិ

នយោបាយជាតិ

មេធាវីឯ.ឧ កឹម សុខា ត្រៀមខ្លួនតតាំងក្តី បើចៅក្រមស៊ើបសួរបញ្ជូនសំណុំរឿងទៅជំនុំជម្រះ

12, Aug 2016 , 2:19 pm

រូបភាព

លោក ហែម សុជាតិ មេធាវីការពារក្តីឯកឧត្តម កឹម សុខា ផ្តល់បទសម្ភាសន៍ដល់អ្នកកាសែត កាលពីពេលកន្លងទៅ

ដោយ: ថ្មីៗ

ភ្នំពេញ៖ មកដល់ពេលនះ មេធាវីការពារក្តីឲ្យឯកឧត្តម កឹម សុខា ពុំទាន់ទទួលបានដីកាសម្រេចពីសាលាដំបូងរាជធានីភ្នំពេញនៅឡើយ ក្រោយពីចៅក្រមស៊ើបសួរនៃសាលាដំបូងរាជធានីភ្នំពេញ បានបញ្ចប់នីតិវិធីស៊ើបសួរ ហើយបញ្ជូនសំណុំរឿងរបស់ឯកឧត្តម កឹម សុខា មកស្ថានប័នអយ្យការ ដើម្បីធ្វើសេចក្តីសន្និដ្ឋានស្ថាពរ។ មេធាវី ឯកឧត្តម កឹម សុខា មិនមានសង្ឃឹមថា តុលាការនឹងតម្កល់រឿងនេះទុកអត់ចាត់ការឡើយ ដោយលោកត្រៀមចិត្ត ដើម្បីតតាំងក្តីនៅពេលបញ្ជូនទៅជំនុំជម្រះ។

មេធាវីលោក ហែម សុជាតិ ពុំទាន់ទទួលបានដីកាថ្មីពីតុលាការនោះទេ ក្រោយពីអយ្យការអមសាលា ដំបូងរាជធានីភ្នំពេញច្រានចោលសំណើរបស់លោកឲ្យអយ្យការអមសាលាដំបូង តម្កល់សំណុំរឿងរបស់ឯកឧត្តម កឹម សុខា ទុកឥតចាត់ការ កន្លងទៅ។ មេធាវីការពារឯកឧត្តម កឹម សុខា ដែលរងបទចោទប្រកាន់ពីការបដិសេធមិនចូលខ្លួន រូបនេះ មិនសង្ឃឹមថា តុលាការនឹងលើកលែងការចោទប្រកាន់លើសំណុំរឿងរបស់ឯកឧត្តម កឹម សុខា ឡើយ។ លោកនិយាយថា លោកត្រៀមខ្លួនការពារតតាំងរឿងក្តីក្តាំងនៅតុលាការ ប្រសិនបើចៅក្រមសម្រេចបញ្ជូនទៅជំនុំជម្រះ នាពេលខាងមុខ។ «យើងបានទទួលដំណឹងចៅក្រមបិទការស៊ើបអង្កេត តែយើងពុំទាន់ទទួលដីកាសម្រេច ពីតុលាការថា ឥតចាត់ការ ឬជំនុំជម្រះនៅឡើយទេ។ តែយើងមិនសង្ឃឹមថា តុលាការឥតចាត់ការទេ ព្រោះដូចយើងដឹងហើយថា តុលាការស្ថិតក្រោមឥទ្ធិពលណាមួយ»។ នេះបើតាមការអះអាងរបស់លោក ហែម សុជាតិ មេធាវី១រូប ក្នុងចំណោមមេធាវីទាំង៥រូបរបស់ឯកឧត្តម កឹម សុខា។

ជាមួយគ្នា លោក ហែម សុជាតិ បានពន្យល់ពីនីតិវីធីតុលាការប្រាប់សារព័ត៌មានថ្មីៗ ថា នៅពេលដែលអយ្យការទទួលបានសំណុំរឿងពីចៅក្រមស៊ើបសួរ ព្រះរាជអាជ្ញានឹងធ្វើសេចក្តីសន្និដ្ឋានស្ថាពរលើសំណុំរឿងឯកឧត្តម កឹម សុខា ហើយបញ្ជូនទៅកាន់ចៅក្រមស៊ើបសួរសាជាថ្មី។ លោក បន្ថែមទៀតថា សេចក្តីសន្និដ្ឋានស្ថាពររបស់ព្រះរាជអាជ្ញា មាន២ប្រភេទ គឺទី១. សេចក្តីសន្និដ្ឋានជំនុំជម្រះ និងទី២ សេចក្តីសន្និដ្ឋានទុកឥតចាត់ការ។

ពាក់ព័ន្ធនឹងករណីនេះ អ្នកនាំពាក្យអយ្យការអមសាលាដំបូងរាជធានី លោក លី សុផាន់ណា បានឲ្យដឹងថា ចៅក្រមស៊ើបសួរបានបញ្ជូនដីកាបន្តទៅអង្គការអយ្យការរួចហើយ។ តែពួកគេ ពុំទាន់សម្រេចចេញដីកានៅឡើយទេ។«ចៅក្រមបានជូនដំណឹងអំពីការបិទការស៊ើបសួរហើយនឹងបន្តនីតិវិធីនៃការបិទការស៊ើបសួរ ដោយបញ្ជូនសំណុំរឿងមកឲ្យព្រះរាជអាជ្ញា ដើម្បីធ្វើដីកាសន្និដ្ឋានស្ថាពរ និងបន្ទាប់មកចៅក្រមត្រូវចេញដីកាដំណោះស្រាយ»។ នេះបើតាមលោកព្រះរាជអាជ្ញារង លី សុផាន់ណា។

ឯកឧត្តម កឹម សុខា កំពុងជាប់ចោទពីបទ «ការបដិសេធមិនចូលខ្លួន»របស់តុលាការកាលពីចុងខែឧសភា ឆ្នាំ២០១៦កន្លងទៅនេះ ដោយសារលោកប្រធានស្តីទីគណបក្សប្រឆាំងរូបនេះ បដិសេធចូលខ្លួនបំភ្លឺក្នុងនាមជាសាក្សីជុំវិញសំណុំរឿងកញ្ញា ខុម ចាន់តារាទី ហៅស្រីមុំ តាមការកោះហៅរបស់តុលាការចំនួន ២ដង។ មកដល់ពេលនេះ អស់រយៈជាង ២ ខែហើយ ដែលឯកឧត្តម កឹម សុខា ឃុំខ្លួនឯងនៅក្នុងទីស្នាក់ការកណ្តាលបក្ស។

តែយ៉ាងណា គណបក្សសង្គ្រោះជាតិ បានចេញសេចក្តីថ្លែងការណ៍មួយ កាលពីថ្ងៃទី៧ ខែកក្កដានេះ ជុំវិញការចោទប្រកាន់របស់តុលាការ ទៅលើតំណាងរាស្ត្របក្សប្រឆាំង ហើយគ្រោងនឹងបញ្ជូនទៅជំនុំជម្រះនៅពេលខាងមុខ។ គណបក្សប្រឆាំង អះអាងថា តុលាការ អាចធ្វើសេចក្តីសន្និដ្ឋានស្ថាពរលើរឿងក្តីរបស់តំណាងរាស្ត្រ ដើម្បីបញ្ជូនទៅជំនុំជម្រះបាន លុះត្រាតែរដ្ឋសភាដកអភ័យឯកសិទ្ធិជាមុនសិន ដោយសំអាងលើមាត្រា ៧ នៃច្បាប់ស្តីពីលក្ខន្តិកៈតំណាងរាស្ត្រ និងមាត្រា៨០ នៃរដ្ឋធម្មនុញ្ញ៕