ពីនេះ ពីនោះ
កសាងសមភាពបុគ្គល ដើម្បីអភិវឌ្ឍជាតិ ជារឿងចាំបាច់
× ភ្នំពេញ៖ សមភាពបុគ្គលគឺជាតម្លៃមួយដែលបង្ហាញពីភាពស្មើភាពគ្នារវាងបុគ្គលម្នាក់ៗ។ តែទោះជាយ៉ាងណា នៅក្នុងសង្គមមិនទាមទារឲ្យបុគ្គលគ្រប់រូបត្រូវតែស្មើគ្នាគ្រប់កាលៈទេសៈនោះដែរ។ ប៉ុន្តែសមភាពគឺមាននាទីសំខាន់ដើម្បីឲ្យបុគ្គលគ្រប់រូបចេះគោរព និងឲ្យតម្លៃគ្នា។
ជាការពិតណាស់ សមភាពបុគ្គលបានចូលរួមយ៉ាងសំខាន់ក្នុងការអភិវឌ្ឍជាតិ ដោយមូលហេតុមួយចំនួនដូចជា លុបបំបាត់ការរើសអើង តាមរយៈការទទួលបាននូវផលប្រយោជន៍ ការចូលរួមការគាំទ្រដូចគ្នា។ បន្ថែមពីនោះ គឺទទួលបានការសិក្សារៀនសូត្រ ពីសហការសេវិករួមការងារក្នុងស្ថាប័ន ទទួលបានការទទួលស្គាល់តម្លៃនិងការគោរពស្របច្បាប់ ទទូលបានឱកាសក្នុងការអភិវឌ្ឍសមត្ថភាពវិជ្ជាជីវៈ និងទទួលព័ត៌មានគ្រប់គ្រាន់ និងទាន់ពេលវេលា។
បន្ថែមពីនេះ សមភាពបុគ្គល និងធ្វើឲ្យបុគ្គលគ្រប់គ្នាទទួលបានសិទ្ធិបញ្ចេញមតិយោបល់ និងទទួលយក/ស្តាប់យោបល់អ្នកដទៃ។ មានអារម្មណ៍កក់ក្ដៅ ស្និទស្នាល ស្មោះត្រង់ និងទទួលបានការរិះគន់ក្នុងន័យស្ថាបនាផងដែរ។ សមភាពបុគ្គលនឹងបណ្ដុះឲ្យមានឆន្ទៈចូលរួមក្នុងសកម្មភាពការងាររបស់អង្គភាព ឬស្ថាប័នរបស់ខ្លួន។ បង្កើតបាននូវវប្បធម៌ចែករំលែកចំណេះដឹងយ៉ាងទូលំទូលាយ បង្កើនសាមគ្គីភាព ភក្ដីភាព និងចំណងមិត្តភាពជាកម្លាំងស្នូល ដែលអាចនាំមកនូវភាពជោគជ័យរបស់ស្ថាប័ន និងសង្គមជាតិមានការអភវឌ្ឍ។
ទាំងនេះគឺជាហេតុផលតូចៗមួយចំនួនដែលជាចំណែកមួយក្នុងការរៀបចំ និងអភិវឌ្ឍសង្គម តាមដោយផ្ដើមចេញពីភាពស្មើគ្នាក្នុងនាមជាពលរដ្ឋនៅក្នុងសង្គមនោះ។ ដ្បិតថា ពាក្យសមភាពមិនអាចធ្វើឲ្យមនុស្សស្មើភាពគ្នាទាំងស្រុងនៅក្នុងសង្គម ប៉ុន្តែឲ្យតែបុគ្គលគ្រប់រូបអាចយល់បានពី តម្លៃស្មើគ្នាក្នុងនាមជាមនុស្សបាននោះភាពប្រសើឡើងនៃសង្គមនឹងកើតមាន៕
© រក្សាសិទ្ធិដោយ thmeythmey.com