អន្តរជាតិ
លោក Duterte បបួលមន្ត្រី UN តទល់គ្នារឿងសម្លាប់ឧក្រិដ្ឋជនគ្រឿងញៀន
× បន្ទាប់ពីហៅការរិះគន់របស់អង្គការសហប្រជាជាតិលើវិធានការរបស់លោកក្នុងការបោសសម្អាតឈ្មួញ និងអ្នកសេពគ្រឿងញៀនពីសង្គមហ្វីលីពីនជា «ការរិះគន់បែបឆ្កួតលីលា» បុរសខ្លាំងរបស់ហ្វីលីពីន លោក Rodrigo Duterte បានបង្ហាញបំណងចង់ជជែកដេញដោលជាមួយអ្នកជំនាញរបស់អង្គការសហប្រជាជាតិ ជុំវិញការសម្លាប់មនុស្សយ៉ាងច្រើនក្នុងយុទ្ធនាការបោសសម្អាតគ្រឿងញៀននេះ។
ប្រធានាធិបតីហ្វីលីពីន លោក Rodrigo Duterte បានទាមទារឲ្យការពិភាក្សាតទល់គ្នាលើករណីបាញ់សម្លាប់ឧក្រិដ្ឋជនគ្រឿងញៀននៅទូទាំងប្រទេស ជាមួយនឹងមន្ត្រីជំនាញផ្នែកការសម្លាប់ក្រៅប្រព័ន្ធតុលាការរបស់អង្គការសហប្រជាជាតិ។ បុរសខ្លាំងរបស់ហ្វីលីពីន បានស្នើដូចនេះ នៅក្នុងសន្និសីទកាសែតដែលធ្វើឡើងនៅកណ្ដាលអាធ្រាត្រឈានចូលថ្ងៃទី២១ ខែសីហា ហើយការជជែកដេញដោលនោះ អាចធ្វើនៅប្រទេសទីបីក៏បានដែរ។
ថ្លែងក្នុងសន្និសីទកាសែតរយៈពេលពីរម៉ោង ប្រធានាធិបតីហ្វីលីពីននិយាយថា៖« ខ្ញុំចង់និយាយជាមួយមន្ត្រីជំនាញអង្គការសហប្រជាជាតិ ហើយខ្ញុំទាមទារឲ្យរូបគាត់មកទីនេះ ឬក៏ប្រសិនបើគាត់ចង់ យើងអាចទៅប្រទេសទីបីក៏បានដែរ។» លោកបន្តទៀតថា៖« មកនិយាយជាមួយខ្ញុំ និងមកជួបខ្ញុំផ្ទាល់មក។ យើងត្រូវនិយាយគ្នាម្ដង។»
ការទាមទារជួបជាមួយមន្ត្រីជំនាញអង្គការសហប្រជាជាតិ ធ្វើឡើងបន្ទាប់ពីមានការឆ្លើយឆ្លងគ្នារវាងមន្ត្រីរដ្ឋាភិបាលហ្វីលីពីន និងមន្ត្រី UN។ នៅមុននេះ ប្រធានក្រុមប្រឹក្សាច្បាប់របស់ហ្វីលីពីន លោក Salvador Panelo បានហៅមន្ត្រីសិទ្ធិមនុស្សរបស់ UN មកកាន់ហ្វីលីពីនដោយផ្ទាល់ ដើម្បីមើលឲ្យច្បាស់ថា រដ្ឋាភិបាលហ្វីលីពីន មិនបានពាក់ព័ន្ធសម្លាប់មនុស្សក្រៅប្រព័ន្ធតុលាការឡើយ។
យោងតាមសារព័ត៌មាន Rappler អ្នករាយការណ៍ពិសេសរបស់ UN លើបញ្ហាសម្លាប់ក្រៅប្រព័ន្ធតុលាការ លោកស្រី Agnes Callamard ក៏បានឆ្លើយតបនឹងការស្នើនេះវិញផងដែរ។ លោកស្រី Callamard បានសរសេរលើបណ្ដាញ Twitter ថា លោកស្រីស្វាគមន៍ការអញ្ជើញរបស់រដ្ឋាភិបាលហ្វីលីពីន ហើយនេះនឹងអនុញ្ញាតឲ្យមានការសហការដោយគ្មានដែនកំណត់ជាមួយអាជ្ញាធរ និងភាគីពាក់ព័ន្ធដទៃទៀត លើការស៊ើបអង្កេតការសម្លាប់មនុស្សក្រៅប្រព័ន្ធតុលាការ។
យ៉ាងណាក្ដី បន្តិចក្រោយមក វិមានប្រធានាធិបតីហ្វីលីពីន បានចេញមកបដិសេធរឿងនេះ ដោយអះអាងថា លោកស្រី Callamard យល់ច្រលំសំដីរបស់លោក Panelo ហើយថា ការស៊ើបអង្កេតណាមួយ គឺជាការរំលោភកិច្ចការផ្ទៃក្នុងរបស់ខ្លួន។ ចំណែកលោកប្រធានាធិបតី Duterte ដែលបានដាក់កិត្តិយស អាយុជីវិត និងតំណែងរបស់លោក ក៏និយាយដែរថា ការស៊ើបអង្កេតបែបនេះ ជារឿងល្មើសនឹងការងារផ្ទៃក្នុងហ្វីលីពីន។
សូមជម្រាបផងដែរថា កាលពីពេលថ្មីៗនេះ អគ្គលេខាធិការអង្គការសហប្រជាជាតិ លោក Ban Ki-Moon និងមន្ត្រីអង្គការសហប្រជាជាតិទទួលបន្ទុកបញ្ហាគ្រឿងញៀន និងបទល្មើស បានថ្កោលទោសខ្លាំងលើការសម្លាប់ក្រៅប្រព័ន្ធតុលាការក្នុងប្រតិបត្តិការបោសសម្អាតគ្រឿងញៀន និងបទល្មើសពីសង្គមហ្វីលីពីន។ តាមរបាយការណ៍ប៉ូលិសហ្វីលីពីន អ្នកសេព និងជួញដូរគ្រឿងញៀន ជាងប្រាំមួយរយនាក់ ត្រូវបានសម្លាប់គិតចាប់តាំងពីថ្ងៃទី០១ ខែកក្កដា ខណៈ សារព័ត៌មានក្នុងស្រុកមួយចំនួន ចុះផ្សាយថា ចំនួនអ្នកស្លាប់ក្នុងប្រតិបត្តិការនេះ កើនឡើងលើសពីមួយពាន់នាក់ហើយនោះ៕
© រក្សាសិទ្ធិដោយ thmeythmey.com