ជាតិ
នយោបាយជាតិ
CNRP បន្តយុទ្ធនាការស្លៀកពាក់ខ្មៅនៅសប្ដាហ៍ទី៣ ដោយឯកឧត្តម កឹម សុខា ស្លៀកពាក់ខ្មៅដែរ
រូបលោក កឹម សុខា ជួបជាមួយលោក Jonathan Darby ជាប្រធានក្រុមកិច្ចការអាសុីអាគ្នេយ៍(អាស៊ាន) របស់ក្រសួងការបរទេសចក្រភពអង់គ្លេស
×![]()
ដោយ: ថ្មីៗ
ភ្នំពេញ៖ នៅព្រឹកថ្ងៃទី២៩ សីហានេះ គណបក្សសង្គ្រោះជាតិ បានបន្តយុទ្ធនាការស្លៀកពាក់ខ្មៅ (Black Monday) នៅទីស្នាក់ការបក្សអស់រយៈពេល៣សប្ដាហ៍ហើយ ដើម្បីសម្ដែងមតិ ទាមទាររកយុត្តិធម៌ជូនលោក កែម ឡី មន្ត្រី គជប អង្គការសង្គមស៊ីវិល ដែលកំពុងឃុំខ្លួននៅពន្ធនាគារ។
ក្រោយពីគណបក្សសង្គ្រោះជាតិ ប្រកាសចូលរួមយុទ្ធនាការស្លៀកពាក់ខ្មៅនោះ គេសង្កេតឃើញថា ក្រុមតំណាងរាស្ត្រ និងមន្ត្រីបក្សមួយចំនួន បាននាំគ្នាស្លៀកពាក់ខ្មៅ ស្ទើគ្រប់គ្នានៅរៀងរាល់ថ្ងៃចន្ទ។ ប៉ុន្តែអ្វីដែលជាការកត់សម្គាល់នោះ ឃើញថា នៅព្រឹកថ្ងៃចន្ទនេះ ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ ក៏បានស្លៀកពាក់ឈុតខ្មៅជាលើកដំបូងរបស់ខ្លួនដែរ នៅក្នុងជំនួបជាមួយភ្ញៀវបរទេស។
កន្លងមកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ធ្លាប់ប្រាប់សារព័ត៌មានថ្មីៗថា តំណាងរាស្ត្រគណបក្សលោក បាននាំគ្នាស្លៀកពាក់ខ្មៅ (Black Moday) ដើម្បីចូលរួមតស៊ូមតិរកយុត្តិធម៌ជូនពលរដ្ឋ ដែលរងគ្រោះដោយសារការចូលរួមបញ្ចេញមតិប្រឆាំងរដ្ឋាភិបាល ហើយត្រូវរងការបាញ់សម្លាប់ និងចាប់ឃុំខ្លួនកន្លងមកនេះ។
ត្រង់ចំណុចនេះអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ធ្លាប់បានចោទគណបក្សសង្គ្រោះជាតិថា ជាអ្នកនៅពីក្រោយនៃយុទ្ធនាការស្លៀកពាក់ខ្មៅ ដែលមានចេតនាញុះញង់ឲ្យមានបដិវត្តពណ៌ ក្នុងការប្រឆាំងច្បាប់កម្ពុជា។
តែយ៉ាងណាអ្នកនាំពាក្យគណបក្សសង្គ្រោះជាតិលោក យឹម សុវណ្ណ ចាត់ទុកជាការចោទប្រកាន់របស់រដ្ឋាភិបាលនេះ ជាការចោទដោយគ្មានភស្តុតាងច្បាស់លាស់ ។ លោក អះអាងថា ការចូលរួមយុទ្ធនាការស្លៀកពាក់ខ្មៅរបស់គណបក្សលោកនេះ មិនជាការចូលរួមដើម្បីញុះញង់ឲ្យមានបដិវត្តពណ៌ទេ ពោលគឺការចូលរួមនេះធ្វើតាមចលនាតស៊ូមតិរបស់ក្រុមអង្គការសង្គមស៊ីវិលប៉ុណ្ណោះ។បើតាមអ្នកនាំពាក្យរូបនេះ គណបក្សនឹងចាប់ផ្ដើមចូលរួមយុទ្ធនាការស្លៀកពាក់ខ្មៅនេះ ដើម្បីតស៊ូមតិរហូតដល់មានការដោះលែងមន្ត្រី គជប និងអង្គការសង្គមស៊ីវិល និងរកយុត្តិធម៌ជូនសពលោក កែម ឡី ៕
Tag:
CNRP
កឹម សុខា
© រក្សាសិទ្ធិដោយ thmeythmey.com
