ជាតិ
នយោបាយជាតិ
×![]()
ដោយ: ធឿន បញ្ញាឬទិ្ធ
ភ្នំពេញ៖ សង្គមស៊ីវិល យល់ឃើញថា ការសម្រេចរបស់តុលាការលើករណីឯកឧត្តម កឹម សុខា គឺជាការសម្រេចដែលមិនមានភាពឯករាជ្យឡើយ ដែលតុលាការកំពុងរំលោភនិងបំភិតបំភ័យ លើអភ័យឯកសិទ្ធិតំណាងរាស្ត្រឯកឧត្តម កឹម សុខា។ សាលាដំបូងរាជធានីភ្នំពេញ បានចេញសេចក្តីសម្រេចឲ្យឯកឧត្តម កឹម សុខា ប្រធានស្តីទីគណបក្សសង្គ្រោះជាតិឲ្យជាប់ពន្ធនាគារចំនួន៥ ខែ និងពិន័យជាប្រាក់ចំនួន៨សែនរៀល តាមមាត្រា៥៣៨ នៃក្រមព្រហ្មទណ្ឌ។
អ្នកគ្រប់គ្រងបច្ចេកទេសការិយាល័យស៊ើបអង្កត នៃអង្គការលីកាដូ (LICADHO)លោក អំ សំអាត យល់ថា ករណីឯកឧត្តម កឹម សុខា ហាក់គ្រាន់តែជាបទល្មើសតូចតាចមួយ ដែលតុលាការមិនគូរសម្រេចទោស ទាំងប្រធានស្តីទីរូបនេះ មានអភ័យឯកសិទ្ធិនោះឡើយ។ លោកថា ការកាត់ទោសឯកឧត្តម កឹម សុខា ទាំងមានអភ័យសិទ្ធិបែបនេះ គឺជាការបង្ហាញយ៉ាងច្បាស់ថា តុលាការមិនមានភាពឯករាជ្យនេះទេ។ លោក អំ សំអាត មានការព្រួយថា ការសម្រេចរបស់តុលាការនេះ អាចធ្វើឲ្យប៉ះពាល់ដល់សមាជិកភាពតំណាងរាស្ត្ររបស់ឧត្តម កឹម សុខា (ត្រង់មាត្រា១២០ថ្មីនៃច្បាប់បោះឆ្នោត) នៅពេលខាងមុខផងដែរ ។ ថ្លែងប្រាប់សារព័ត៌មានថ្មីៗ លោក អំ សំអាត បានបញ្ជាក់ថា៖«ខ្ញុំសោកស្ដាយលើការសម្រេចរបស់តុលាការ ព្រោះឯកឧត្តម កឹម សុខា គាត់មានអភ័យឯកសិទ្ធិតំណាងរាស្ត្រ តែត្រូវបានតុលាការកាត់ទោសទាំងមិនទាន់បានដកអភ័យឯកសិទ្ធិ។ ហើយការសម្រេចបែបនេះនឹងបង្កឲ្យកាន់តែមានភាពតានតឹងនយោបាយ …ហើយបើសិនជាបទល្មើសតូចតាចងាកទៅតុលាការ ហើយតុលាការសម្រេចកាត់ទោសលើអ្នកតំណាងរាស្ត្រលើករណីតូចតាច ទាំងមានអភ័យឯកសិទ្ធិបែបនេះ បង្ហាញថាតុលាការមិនទាន់មានឯករាជ្យទេ»។
លោក សួន ប៊ុនសក្ដិ ក៏យល់ឃើញដូចលោក អំ សំអាតដែរ។ អគ្គលេខាធិការនៃអង្គការCHRACរូបនេះ យល់ថា ការសម្រេចរបស់តុលាការបែបនេះ គឺរឹតតែបង្កឲ្យមានភាពតានតឹងនយោបាយ ដែលអាចឲ្យនាំមានការប្រឈមមុខដាក់គ្នារវាងប្រជាពលរដ្ឋគាំទ្រគណបក្សប្រឆាំង និងអាជ្ញាធរនៅពេលខាងមុខទៅវិញទេ។ ទាំងលោក សួន ប៊ុនសក្ដិ ទាំងលោក អំ សំអាត ស្នើឲ្យអ្នកនយោបាយនាំគ្នាចូលតុចរចារកដំណោះស្រាយរួមគ្នា ក្រោយពីតុលាការសម្រេចលើករណីឯកឧត្តម កឹម សុខា នេះ ដើម្បីបញ្ចប់ភាពតានតឹងនយោបាយ និងបញ្ឈប់ការលាភពណ៌គ្នា ដោយងាកមកគិតដោះស្រាយរួមគ្នា ពីផលប្រយោជន៍ប្រទេសជាតិវិញ។
សាលាដំបូងរាជធានីភ្នំពេញ បានចេញសេចក្តីសម្រេចឲ្យឯកឧត្តម កឹម សុខា ប្រធានស្តីទីគណបក្សសង្គ្រោះជាតិឲ្យជាប់ពន្ធនាគារចំនួន៥ ខែ និងពិន័យជាប្រាក់ចំនួន៨សែនរៀល តាមមាត្រា៥៣៨ នៃក្រមព្រហ្មទណ្ឌ។ ប្រធានស្តីទីគណបក្សសង្គ្រោះជាតិ ត្រូវបានចោទប្រកាន់ពីបទ«បដិសេធក្នុងការចូលខ្លួន» ដែលតុលាការចាត់ទុកថាជាបទល្មើសជាក់ស្តែង៕
Tag:
សង្គមស៊ីវិល
កឹម សុខា
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
