ជាតិ
សេដ្ឋកិច្ច
CEDAC ជំរុញកសិករដាំស្លឹកគ្រៃ ខណៈដែលកម្ពុជានាំចូលបន្លែនេះប្រមាណ៥០តោនក្នុង១ថ្ងៃ
× ភ្នំពេញ៖ ខណៈដែលកម្ពុជាបាននាំចូលបន្លែគល់ស្លឹកគ្រៃពីប្រទេសវៀតណាមក្នុងបរិមាណដ៏ច្រើន លោក សម វិទូ ប្រធានមជ្ឈមណ្ឌលសិក្សានិងអភិវឌ្ឍន៍កសិកម្ម(CEDAC) ជំរុញឲ្យកសិករដាំបន្លែប្រភេទនេះ ដើម្បីកាត់បន្ថយការផ្គត់ផ្គង់ពីខាងក្រៅ។
ប្រធាន CEDAC លោក សម វិទូ អះអាងថា ការផ្គត់ផ្គង់គល់ស្លឹកគ្រៃក្នុងស្រុក ផ្ដល់បរិមាណមិនដល់ ៥០ភាគរយផងនៃទំហំតម្រូវការទីផ្សារ ដោយកម្ពុជាត្រូវនាំចូលគល់ស្លឹកគ្រៃប្រហែល ៥០តោន ក្នុងមួយថ្ងៃៗពីប្រទេសវៀតណាម ហើយចំនួននេះគិតតែការនាំចូលក្នុងរាជធានីភ្នំពេញប៉ុណ្ណោះ។«តាមការស្រាវជ្រាវ ក្នុងមួយថ្ងៃ យើងបាននាំចូលគល់ស្លឹកគ្រៃប្រហែល ៥០តោន មកផ្សារដើមគរ និងផ្សារនាគមាស ដែលជាកន្លែងចែកចាយធំ ទៅខេត្តជុំវិញភ្នំពេញ និងខេត្តឆ្ងាយៗមួយចំនួន។ តែនេះយើងអត់គិតផ្សារដែលមានខេត្តជាប់ព្រំដែនផង»។នេះបើតាមលោក សម វិទូ ដែលថ្លែងប្រាប់សារព័ត៌មានថ្មីៗ នៅថ្ងៃទី១២ខែកញ្ញា។
បើតាម លោក សម វិទូ គល់ស្លឹកគ្រៃ ដែលនាំចូលពីក្រៅប្រទេស មានលក្ខណៈធំ និងសជាងគល់ស្លឹកគ្រៃក្នុងស្រុក។ លោកមានប្រសាសន៍ថា គល់ស្លឹកគ្រៃទាំងនេះ ត្រូវបានគេដាំដោយប្រើជីគីមី ហើយគេអាចប្រើថ្នាំ ដើម្បីឲ្យវាមានពណ៌ស។
CEDAC កំពុងតែចងក្រងកសិករឲ្យដាំគល់ស្លឹកគ្រៃនិងជួយស្វែងរកទីផ្សារជូនពួកគាត់។ លោក សម វិទូ ឲ្យដឹងថា ជាជំហ៊ានដំបូង CEDAC បានចាប់ផ្ដើមគម្រោងនេះក្នុងខេត្តចំនួន៥ ។ បើតាមប្រធាន CEDAC រូបនេះ ដាំណាំគល់ស្លឹកគ្រៃនេះ ងាយថែទាំ និងចំណាយទុនតិច ដោយគេអាចប្រមូលផលវាក្នុងរយៈពេល៣ខែ ឫ៤ខែ អាស្រ័យប្រភេទដី និងការស្រោចទឹក។ លោកបញ្ជាក់ថា ដំណាំនេះ ត្រូវការទឹកតិច ហើយធន់នឹងភាពរាំងស្ងួត ដោយរយៈពេលពីរបីថ្ងៃ គេអាចស្រោចស្រពវាម្ដងក៏បាន។
អ្នកជំនាញកសិកម្មរូបនេះ ណែនាំឲ្យកសិករត្រូវចងក្រងគ្នា ដើម្បីកុំឲ្យជួបបញ្ហាទីផ្សារ។«អ្វីដែលគាត់និយាយថា ពិបាករកទីផ្សារនោះ ព្រោះថាបើគាត់ដាំតែម្នាក់ឯង ហើយយូរៗយកលក់ឲ្យគេម្ដងអ៊ីចឹង ខាងឈ្មួញពិបាកដើរប្រមូលដែរ។ បើសិនមានជាក្រុម ផ្គត់ផ្គង់គេឲ្យទៀងទាត់ គឺទីផ្សារអត់ខ្វះទេ។ដំណាំនេះ គេត្រូវការរាល់ថ្ងៃ»។ លោក បន្តទៀតថា៖«គល់ស្លឹកគ្រៃនេះ ងាយស្រួលណាស់ ពេលត្រូវការយើងអាចគាស់រំលែកគល់របស់វាបានបីដង ហើយបើអត់ទាន់ចង់លក់ទេ យើងទុកលើដីណឹងក៏វាអត់ខូចដែរ»។ លោក សម វិទូ ណែនាំទៀតថា ដើម្បីឲ្យដំណាំគល់ស្លឹកគ្រៃ មានលក្ខណៈធំធាត់ល្អ កសិករគួរប្រើជីសរីរាង្គ និងថែទាំវាឲ្យបានល្អ ចៀសវាងការដាំទុកចោល។ ហើយការដាំគល់ស្លឹកគ្រៃនេះ ត្រូវទុកចន្លោះប្រហែល ០,៥ម៉ែត្រពីគុម្ពនីមួយៗ។
ក្នុងមួយគុម្ព មានទំងន់ប្រមាណ ១គីឡូក្រាម ដោយគេអាចលក់ចេញក្នុងតម្លៃប្រហាក់ប្រហែល ៤០០០ រៀល។ នេះបើតាមលោក សម វិទូ ៕
© រក្សាសិទ្ធិដោយ thmeythmey.com