អន្តរជាតិ
ទីប្រឹក្សារដ្ឋ ស៊ូជី ឆ្លៀតនិយាយរឿងសិទ្ធិមនុស្សនៅអង់គ្លេសក្នុងដំណើរទៅអាមេរិក លោកស្រីនាយករដ្ឋមន្ត្រីអង់គ្លេស Theresa May ស្វាគមន៍ដំណើរទស្សនកិច្ចរបស់លោកស្រី Suu Kyi។ រូបថត Getty Images
× ក្នុងដំណើរទៅកាន់សហរដ្ឋអាមេរិក ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានឈប់សំចតនៅទឹកដីអង់គ្លេស ជាទីលោកស្រីធ្លាប់រៀនសូត្រ និងរស់នៅកាលពីអតីត។ នៅអង់គ្លេស ទីប្រឹក្សារដ្ឋមីយ៉ាន់ម៉ា ក៏ជួបជាមួយនាយករដ្ឋមន្ត្រីអង់គ្លេស Theresa May ក៏ដូចជាប្រមុខការទូតប្រទេសនេះ ខណៈដែលបញ្ហាសិទ្ធិមនុស្ស ជារបៀបវារៈសំខាន់នៃទស្សនកិច្ចរបស់លោកស្រី ស៊ូជី នៅអង់គ្លេស។
មេដឹកនាំដឹកនាំ de Facto (មេដឹកនាំមានអំណាចពិតប្រាកដ) មីយ៉ាន់ម៉ា លោកស្រី អ៊ុងសាន ស៊ូជី បានជួបជាមួយនាយករដ្ឋមន្ត្រីថ្មីអង់គ្លេស លោកស្រី Theresa May ក្នុងដំណើរលើកដំបូងទៅកាន់អង់គ្លេស ក្នុងនាមជាមេដឹកនាំមីយ៉ាន់ម៉ា។ លើទឹកដីអតីតអាណានិគមរបស់ខ្លួន មេដឹកនាំទាំងពីរ ក៏បានលើកឡើងបញ្ហាសិទ្ធិមនុស្ស និងការប្រឈមនានា ក្នុងពេលអន្តរកាលនៃការផ្លាស់ប្ដូរពីការដឹកនាំបែបយោធាទៅកាន់ប្រជាធិបតេយ្យ។
បន្ទាប់ពីជំនួបនៅថ្ងៃទី១៣ ខែកញ្ញា ការិយាល័យនាយករដ្ឋមន្ត្រីអង់គ្លេសបញ្ជាក់ថា លោកស្រី May និងលោកស្រី ស៊ូជី យល់ស្របគ្នាលើការបង្កើតសង្គមថ្មីមួយសម្រាប់ប្រជាជនទាំងអស់គ្នា តាមរយៈការបង្កើតការងារ ការទទួលបានប្រព័ន្ធសុខាភិបាលដែលមានគុណភាព ក៏ដូចជាការកែទម្រង់ប្រព័ន្ធអប់រំផងដែរ។ ជាមួយគ្នានេះ ក្រុងឡុងដ៍ ក៏ត្រៀមផ្ដល់ជំនួយបន្ថែមទៀតឲ្យមីយ៉ាន់ម៉ា ដើម្បីអភិវឌ្ឍប្រទេស រួមទាំងកញ្ចប់ទឹកប្រាក់១១៨លានផោនដែរ។
ការិយាល័លោកស្រី Theresa May បន្តទៀតថា នាយករដ្ឋមន្ត្រីអង់គ្លេស ក៏បានលើកឡើងពីបញ្ហារំលោភបំពានសិទ្ធិមនុស្សនៅក្នុងរបបយោធាដែលដឹកនាំមីយ៉ាន់ម៉ា អស់ពេលជាងកន្លះសតវត្សរ៍មកនោះ។ ប៉ុន្តែបន្ទាប់ពីការចាកចេញរបស់យោធា លោកស្រី ស៊ូជី ដែលបក្សលោកស្រីឈ្នះឆ្នោតនោះ មិនអាចធ្វើជាប្រធានាធិបតីបានទេ ដ្បិតមានការរារាំងពីរដ្ឋធម្មនុញ្ញឆ្នាំ២០០៨។
ទីភ្នាក់ងារព័ត៌មាន Reuters ផ្សាយថា នៅមុនចាកចេញទៅកាន់អាមេរិក លោកស្រី ស៊ូជី ដែលជារដ្ឋមន្ត្រីការបរទេសដែរនោះ ក៏ ជួបជាមួយរដ្ឋមន្ត្រីការបរទេសអង់គ្លេស លោក Boris Johnson ដើម្បីពិភាក្សាទំនាក់ទំនង ប្រទេសទាំងពីរ ដែលក្នុងនោះបញ្ហានៅរដ្ឋ Rakhine ក៏ត្រូវលើកឡើងមកដែរ។ ប្រមុខការទូតអង់គ្លេស បានស្វាគមន៍ការបង្កើតគណៈកម្មការផ្ដល់ប្រឹក្សាសម្រាប់ដោះស្រាយជម្លោះនៅរដ្ឋ Rakhine ដែលដឹកនាំដោយអតីតប្រមុខអង្គការសហប្រជាជាតិ Kofi Annan។
យ៉ាងណាក្ដី គណៈកម្មការផ្ដល់ប្រឹក្សានេះ មិនបានទទូលការគាំទ្រពីសំណាក់ប្រជាជនរបស់ Rakhine ឡើយ ដោយសារមានវត្តមានជនបរទេសនោះ។ ជាក់ស្ដែងនោះ ក្នុងដំណើរទៅកាន់រដ្ឋដែលហែកហួរដោយជម្លោះនេះ លោក Kofi Annan ត្រូវទទួលការស្វាគមន៍ដោយបាតុកម្មតវ៉ា ដែលប្រឆាំងវត្តមានជនបរទេសនៅក្នុងការដោះស្រាយជម្លោះរវាងជនមូស្លីមភាគតិច និងសហគមន៍ពុទ្ធសាសនិកភាគច្រើន៕
Tag:
មីយ៉ាន់ម៉ា
អង់គ្លេស
សិទ្ធិមនុស្ស
© រក្សាសិទ្ធិដោយ thmeythmey.com