អន្តរជាតិ
ដឹងខ្លួនមិនអាចធ្វើបាន លោក Duterte សុំពេល៦ខែទៀតដើម្បីបោសសម្អាតបទល្មើសឲ្យអស់ពីសង្គមហ្វីលីពីន
× លោកប្រធានាធិបតីហ្វីលីពីន រ៉ូឌ្រីហ្គូ ឌើទើតេ (Rodrigo Duterte ) បានសុំចិត្ត និងការយោគយល់ពីប្រជាជនហ្វីលីពីនចំពោះការសន្យាបង្ក្រាបគ្រឿងញៀនឲ្យអស់ពីសង្គម ដោយលោក ទទួលស្គាល់ថា លោក មិនអាចបញ្ឈប់បទល្មើស និងការជួញដូរគ្រឿងញៀនក្នុងរយៈពេលបីខែបានឡើយ ដ្បិត បញ្ហាទាំងនេះ បានចាក់ឬស និងមានច្រើនពេកនៅក្នុងសង្គមហ្វីលីពីន។ ជំនួសដោយការមិនប្រកាសចុះចាញ់ទៅនឹងស្ថានភាព លោកប្រធានាធិបតី ដែលមានរហ័សនាមថា «អ្នកដាក់ទណ្ឌកម្ម» បានសុំពេល៦ខែដើម្បីបន្តយុទ្ធនាការបោសសម្អាតរបស់លោក។
ដោយសារតែមើលឃើញពីស្ថានភាពសង្គមហ្វីលីពីនពាក់ព័ន្ធនឹងបទល្មើសអាក្រក់ជាងការរំពឹងទុក លោកប្រធានាធិបតី រ៉ូឌ្រីហ្គូ ឌើទើតេ នៅថ្ងៃទី១៨ ខែកញ្ញា ដែលត្រូវជាថ្ងៃទី៨១នៃការឡើងកាន់អំណាចរបស់លោកនោះ បានប្រកាសសុំពេលបន្ថែម៦ខែទៀតក្នុងប្រតិបត្តិការបោសសម្អាតបទល្មើស និងគ្រឿងញៀន។
សេចក្តីថ្លែងការណ៍ របស់លោកប្រធានាធិបតី ដែលត្រូវបានធ្វើឡើងក្នុងសន្និសីទសាព័ត៌មានពាក់ព័ន្ធនឹងការដោះលែងចំណាប់ខ្មាំងជនជាតិន័រវែសពីក្រុមឧទ្ទាមនោះ មិនមានការបង្ខំ ឬសម្ពាធពីសាធារណជនឡើយ តែ វា គឺជាការប្រកាសទទួលស្គាល់ពីភាពពិតនៃសង្គមហ្វីលីពីននោះទេ។
លោកប្រធានាធិបតី បានថ្លែងសារភាពនៅចំពោះមុខអ្នកសារព័ត៌មាន ថា លោក មិនដែលដឹងសោះថា បញ្ហាគ្រឿងញៀននៅសង្គមហ្វីលីពីន ពិតជាអាក្រក់ខ្លាំង រហូតទាល់តែលោក បានក្លាយជាប្រធានាធិបតីបច្ចុប្បន្ន។ អ្នកដាក់ទណ្ឌកម្មរូបនោះ ក៏បានសង្កត់ធ្ងន់ដែរថា បើទោះបីជា លោក ចង់សម្លាប់ក្រុមឈ្មួញគ្រឿងញៀនទាំងអស់ក៏ដោយ លោក មិនអាចធ្វើបាននោះទេ ព្រោះមន្ត្រីសាធារណៈ ក៏មានជាប់ពាក់ព័ន្ធនឹងការជួញដូរគ្រឿងញៀនច្រើនណាស់ដែរ។
«ផ្តល់ពេលឲ្យខ្ញុំបន្តិច ! ប្រហែលជាប្រាំមួយខែទៀត។ ពីព្រោះខ្ញុំ មិនដែលដឹងថា មានមនុស្សរាប់ម៉ឺននាក់ កំពុងតែធ្វើអាជីវកម្មគ្រឿងញៀនឡើយ។ ហើយអ្វីដែលអាក្រក់នោះគឺ ជំនួញទាំងនោះ កំពុងតែប្រតិបត្តិការដោយមនុស្សនៅក្នុងជួររដ្ឋាភិបាល ជាពិសេសេនោះ មន្ត្រីដែលត្រូវបានជ្រើសរើសតាមការបោះឆ្នោតទៀត»។ នេះ គឺជាបញ្ហាប្រឈមខ្លាំងមួយ ហើយ ក៏ជាសារត្អូញត្អែរបស់លោកប្រធានាធិបតីលើយុទ្ធនាការបោសសម្អាតគ្រឿងញៀន ដែលបានដកស្រង់ដោយសារព័ត៌មាន inquirer.net។
លោក ឌើទើតេ បានសន្យាអ្វីខ្លះលើបញ្ហាគ្រឿងញៀន មុនពេលកាន់អំណាច?
លោក រ៉ូឌ្រីហ្គូ ឌើទើតេ ដែលធា្លប់កាន់តំណែងជាអភិបាលក្រុងដាវ៉ាវជាងម្ភៃឆ្នាំហើយនោះ បានសន្យានាឱកាសឃោសនារកសន្លឹកឆ្នោតនៅខែឧសភាកន្លងទៅ ថា ពេលលោកឡើងកាន់តំណែងជាប្រធានាធិបតីហ្វីលីពីន លោក នឹងលុបបំបាត់បទល្មើស ជាពិសេសបញ្ហាគ្រឿងញៀនឲ្យអស់ពីសង្គមហ្វីលីពីនត្រឹមតែ៣ខែប៉ុណ្ណោះ។ ក្នុងពេលនោះដែរ លោក ឌើទើតេ ថែមទាំងបានប្រកាសមុនដែរថា លោក នឹងសម្លាប់មនុស្សមួយម៉ឺននាក់ដែលជាប់ព័ន្ធពាក់នឹងគ្រឿងញៀន ដែលលោក ចាត់ទុកថាជា «សង្គ្រាមប្រឆាំងគ្រឿងញៀន»នោះឯង។
បើយោងតាមសារព័ត៌មានហ្វីលីពីន Inquirer.net គិតចាប់ពីថ្ងៃទី៣០ ខែមិថុនា ដែលជាថ្ងៃលោក ឌើទើតេ ចូលកាន់តំណែងជាផ្លូវការជាប្រធានាធិបតីមកដល់ពេលនេះ មានអ្នកជាប់ពាក់ព័ន្ធគ្រឿងញៀន ៧០ម៉ឺននាក់ បានប្រកាសចូលខ្លួនសារភាព និងជិតបីពាន់នាក់ផ្សេងទៀត ត្រូវបានសម្លាប់ក្នុងប្រតិបត្តិការប៉ូលិស និងការសហការក្រៅប្រព័ន្ធតុលាការ។ ទោះបីសមិទ្ធផលក្រោមប្រតិបត្តិការបោសសម្អាតរបស់លោក ប្រធានាធិបតីស្ថិតក្នុងចំនួនច្រើនលើសលប់យ៉ាងនេះក្តី បទល្មើស និងឈ្មួញគ្រឿងញៀន ត្រូវបានជឿជាក់ថា នៅមានជាច្រើនទៀត រហូតដល់បុរសខ្លាំងហ្វីលីពីនរូបនេះ ប្រកាសសុំពេលបន្ថែម ដែលបានផ្ទុយទៅនឹងសេចក្តីថ្លែងការណ៍អត្តនោម័តរបស់លោកដែលបានសន្យាកន្លងមក។
សូមជម្រាបផងដែរថា ក្នុងប្រតិបត្តិការបោសសម្អាតគ្រឿងនេះ លោកប្រធានាធិបតីហ្វីលីពីនទី១៦រូបនេះ ក៏បានប្រកាសដាក់ជីវិត កិត្តិយសរួចទៅហើយ ដោយលោក ប្រកាសថា មិនឲ្យក្រុមទាំងនោះ បំផ្លាញក្មេងជំនាន់ និងប្រទេសដែលលោក ត្រូវដឹកនាំក្នុងរយៈពេល៦ឆ្នាំជាប្រធានាធិបតីបានឡើយ។
អ្នកអនុវត្ត ត្រៀមចេញរៀនសូត្រពីភាពជោគជ័យនៃការបោសសម្អាតគ្រឿងញៀនបន្ថែម
ដូចបានបញ្ជាក់ ជនសង្ស័យ និងជនល្មើសជាច្រើន ត្រូវបានបង្ក្រាបក្នុងប្រតិបត្តិការ«សង្គ្រាមគ្រឿងញៀន» ដែលរូបភាពនេះ ត្រូវបានបង្ហាញរួចទៅហើយពីភាពជោគជ័យនៃប្រតិបត្តិការទ្រង់ទ្រាយធំមួយនេះ។ តែចំនួននេះ មិនទាន់អាចធ្វើឲ្យលោកប្រធានាធិបតី ស្ងប់ចិត្ត ក៏ដូចជា សង្គមហ្វីលីពីន ទទួលបានសន្តិសុខ និងសុវត្ថិភាពទាំងស្រុងនៅឡើយនោះទេ ដ្បិតមានចំនួនជាច្រើនទៀត នៅសេសសល់។ ហើយវា ទាមទារឲ្យហ្វីលីពីន ត្រូវរៀនសូត្របន្ថែមពីប្រទេសខាងក្រៅ។
យោងតាមសារព័ត៌មាន Rappler លោកឧត្តមសេនីយ៍ Ronald dela Rosa មេប៉ូលិសហ្វីលីពីន និងក៏ជាតួអង្គជួរមុខក្នុងការអនុវត្តបទបញ្ជាលោកប្រធានាធិបតី គ្រោងនឹងបំពេញទស្សនកិច្ចនៅខែក្រោយនេះទៅកាន់ប្រទេសកូឡុំបៀដើម្បីសិក្សាពីយុទ្ធសាស្ត្រជោគជ័យក្នុងការលុបបំបាត់បញ្ហាគ្រឿងញៀន។ នេះ គឺជាជំហានមួយថ្មីបន្ថែមក្នុងការធានាឲ្យបានប្រសិទ្ធភាព និងជោគជ័យនៃការក្នុងការបង្ក្រាបនិងបោសសម្អាសគ្រឿងញៀនឲ្យអស់ពីសង្គមហ្វីលីពីនដែលជាកិច្ចការអាទិភាពក្នុងរដ្ឋបាលថ្មីរបស់លោក រ៉ូឌ្រីហ្គូ ឌើទើតេ៕
© រក្សាសិទ្ធិដោយ thmeythmey.com