អន្តរជាតិ
លោក George H.W. Bush នឹងបោះឆ្នោតឲ្យលោកស្រី ហ៊ីឡារី គ្លីនតុន
× អតីតប្រធានាធិបតីអាមេរិកបក្សសាធារណរដ្ឋលោក George H.W. Bush បានថ្លែងថា លោកគ្រោងនឹងបោះឆ្នោតឲ្យលោកស្រី ហ៊ីឡារី គ្លីនតុន នៅក្នុងបោះឆ្នោតខែវិច្ឆិកាខាងមុខ។ កន្លងមកលោកប្រកាសចូលនិវត្តន៍ពីនយោបាយដោយរក្សាភាពស្ងៀមស្ងាត់និងមិនចេញមុខគាំទ្រលោក ដូណាល់ ត្រាំ ឡើយ។
ប្រធានាធិបតីអាមេរិកទី ៤១ លោក George H.W. Bush ដែលមានវ័យ៩៣ឆ្នាំនោះ គ្រោងនឹងបោះឆ្នោតជូនលោកស្រី ហ៊ីឡារី គ្លីនតុន នៅថ្ងៃ ៨វិច្ឆិកាខាងមុខនេះ។ ដែលនេះបញ្ជាក់ថាលោកប្រឆាំងបេក្ខជនតំណាងបក្សសាធារណរដ្ឋលោក ដូណាល់ ត្រាំ។
យោងតាមសារព័ត៌មាន Politico ព័ត៌មាននេះត្រូវបានផ្សព្វផ្សាយដោយលោកស្រី Kathleen Kennedy Townsend ដែលជាអតីតអភិបាលរងរដ្ឋ Maryland ។ នៅថ្ងៃចន្ទ ទី ១៩ កញ្ញា លោកស្រី Kennedy Townsend បានបង្ហោះរូបភាពលោកស្រី ជាមួយលោក George H.W. Bush តាមប្រព័ន្ធទំនាក់ទំនងសង្គម Facebook របស់ខ្លួន ដោយសរសេរថា៖«លោក Bush ប្រាប់ខ្ញុំថា លោកនឹងបោះឆ្នោតឲ្យលោកស្រី ហ៊ីឡារី គ្លីនតុន»។
បន្ទាប់ពីបង្ហោះរូបភាពនេះ លោកស្រីបាន ផ្តល់បទសម្ភាសន៍ឲ្យសារព័ត៌មាន Politico ដើម្បីបកស្រាយរឿងសម្តីរបស់លោក George H.W. Bush។ លោកស្រីបញ្ជាក់ថា លោក George H.W. Bush បានប្រាប់លោកស្រីដោយផ្ទាល់ក្នុងពេលជួបគ្នានៅរដ្ឋ Maine ថា លោកនឹងបោះឆ្នោតឲ្យអ្នកប្រជាធិបតេយ្យ (លោកមិនបានបញ្ជាក់ចំៗថាលោកស្រី ហ៊ីឡារី គ្លីនតុនឡើយ)។
យ៉ាងណាមិញ អ្នកនាំពាក្យលោក George H.W. Bush លោក Jim McGrath មិនបានផ្តល់យោបល់អ្វីឡើយពាក់ព័ន្ធសំណួរថាតើអតីតប្រធានាធិបតីបក្សសាធារណរដ្ឋនេះនឹងបោះឆ្នោតឲ្យលោកស្រី ហ៊ីឡារី គ្លីនតុនមែនឬអត់។ អ្នកនាំពាក្យខាងលើគ្រាន់តែបញ្ជាក់ថា លោក George H.W. Bush នឹងអញ្ជើញទៅបោះឆ្នោតដូចប្រជាជនដទៃទៀតជាលក្ខណៈឯកជន។ លោកបោះឆ្នោតឲ្យអ្នកណានោះមិនមែនជាអ្វីកាតព្វកិច្ចដែលលោកត្រូវធ្វើដើម្បីឲ្យអ្នកដទៃបានដឹងឡើយ។
តាមពិតទៅ អតីតប្រធានាធិបតីអាមេរិក ទាំងឪពុកនិងកូនត្រកូល ប៊ុស បានរក្សាភាពស្ងៀមស្ងាត់ដោយមិនចេញមុខប្រកាសគាំទ្រ ឬសរសើរលោក ដូណាល់ ត្រាំ ឡើយចាប់តាំងពីសមាជបក្សខែកក្កដាមកម្ល៉េះ។ នេះក៏ដោយសារលោក George H.W. Bush ក៏បានប្រកាសចូលនិវត្តន៍និងដកខ្លួនមិនពាក់ព័ន្ធបញ្ហានយោបាយទៀតដែរ។ កន្លងមក បេក្ខជនប្រធានាធិបតីបក្សសាធារណរដ្ឋ លោក ដូណាល់ ត្រាំ ធ្លាប់រិះគន់លោក George W Bush ដែលជាកូនប្រុសរបស់លោក ជារឿយៗ រឿងអាមេរិកឈ្លានពានអ៊ីរ៉ាក់ និង រដ្ឋបាលអាមេរិកចោទប្រកាន់លោក សាដាម ហ៊ូសេន ថាផលិតអាវុធប្រល័យលោកដោយគ្មានភ័ស្តុតាងត្រឹមត្រូវ៕
Tag:
George H.W. Bush
ហ៊ីឡារី គ្លីនតុន
Kathleen Kennedy Townsend
© រក្សាសិទ្ធិដោយ thmeythmey.com