ជាតិ
នយោបាយជាតិ
ភ្ជុំបិណ្ឌ៖សម្តេច ហ៊ុន សែន និងឯ.ឧ កឹម សុខា ជូនពរប្រជាជន និងមិនចង់ឃើញការវាយប្រហារគ្នា
×
សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា និងឯកឧត្តមកឹម សុខា ប្រធានស្តីទីគណបក្សសង្គ្រោះជាតិ សុទ្ធតែផ្ញើសារជូនពរប្រជាជនខ្មែរតាមរយៈបណ្តាញសង្គមហ្វេសប៊ុកនៅក្នុងឱកាសបុណ្យភ្ជុំបិណ្ឌនេះ។ លើសពីនេះ អ្នកទាំងពីរ ក៏ផ្ញើសារនយោបាយឲ្យមន្ត្រី និងសកម្មជនខ្លួនរក្សាភាពស្ងប់ស្ងាត់ មិនវាយប្រហារគ្នាក្នុងអំឡុងពិធីបុណ្យនេះផងដែរ។
ឯកឧត្តម កឹម សុខា បានជូនពរប្រជាជនខ្មែរក្នុងអំឡុងពិធីបុណ្យភ្ជុំបិណ្ឌបែបនេះថា៖« ខ្ញុំ កឹម សុខា ក្នុងនាមប្រធានស្តីទីគណបក្សសង្គ្រោះជាតិ និងក្នុងនាមខ្ញុំផ្ទាល់ សារជាថ្មីម្តងទៀត ខ្ញុំសូមបួងសួងឲ្យក្រុមគ្រួសារខ្មែរគ្រប់រូបបានជួបជុំគ្នាដោយសប្បាយរីករាយ និងក៏សូមឲ្យគ្រួសារនយោបាយខ្មែរ បានជួបជុំគ្នាដោះស្រាយបញ្ហាជាតិ និងប្រជាពលរដ្ឋខ្មែរជាមួយគ្នាផងដែរ»។
បន្ថែមពីលើនេះ តាមរយៈទំព័រហ្វេសប៊ុករបស់ខ្លួនកាលពីថ្ងៃទី ២៥ កញ្ញា ប្រធានស្តីទីគណបក្សសង្គ្រោះជាតិ ដែលកំពុងឃុំខ្លួនឯងនៅស្នាក់ការបក្ស សរសេរយ៉ាងនេះថា៖«ក្នុងឱកាសនេះដែរដើម្បីរក្សាភាពស្ងប់ស្ងាត់ជូនប្រជាពលរដ្ឋខ្មែរដែលកំពុងធ្វើបុណ្យទានជូនបុព្វការីជនផងនោះ ខ្ញុំសូមអំពាវ នាវជាថ្មីម្តងទៀត ជាពិសេសដល់ថ្នាក់ដឹកនាំគ្រប់លំដាប់ថ្នាក់និងសកម្មជនរបស់គណបក្សសង្គ្រោះជាតិ សូមចៀសវាង ការប្រើអំពើហិង្សា ឬពាក្យអសុរោះ ឬក៏ពាក្យវាយប្រហារគ្នា ដែលនាំឲ្យប៉ះពាល់ដល់បរិយាកាសនៃពិធីបុណ្យប្រពៃណីជាតិនេះ និងប៉ះពាល់ដល់បរិយាកាសនយោបាយយូរអង្វែងទៅមុខទៀតផង»។
រីឯសម្តេចនាយករដ្ឋមន្ត្រី ហ៊ុន សែន វិញ ក៏ជូនពរប្រជាជនខ្មែរក្នុងអំឡុងពិធីបុណ្យភ្ជុំបិណ្ឌនេះ ឲ្យជួបតែសេចក្តីសុខផងដែរ។ «សូមជូនពរជនរួមជាតិទាំងក្នុង និងក្រៅប្រទសជួបតែសេចក្តីសុខ និងសំណាងល្អ»។ នេះជាសារជូនពររបស់ប្រធានគណបក្សប្រជាជនកម្ពុជាតាមបណ្តាញសង្គមហ្វេសប៊ុកកាលពីថ្ងៃទី ២៨ ខែកញ្ញា ដោយមានផ្ទាំងរូបថតសម្តេច ហ៊ុន សែន និងភរិយាផងដែរ។
ទាក់ទងនឹងស្ថានភាពនយោបាយ សម្តេច ហ៊ុន សែន បានប្រកាសមិនឆ្លងឆ្លើយនយោបាយអ្វីឡើយនៅក្នុងអំឡុងពិធីបុណ្យភ្ជុំបិណ្ឌនេះ ដោយសម្ដេច បញ្ជាក់ថា «ខ្ញុំចង់ឲ្យសភាពការណ៍ស្ងប់ស្ងាត់» ។ ថ្លែងចំពោះមុខនិស្សិតជាង១ពាន់នាក់នៅសណ្ឋាគារសុខា កាលពីថ្ងៃទី ២២ កញ្ញា ប្រមុខរដ្ឋាភិបាល បានលើកឡើងថា ស្ថានការណ៍ស្ងប់ស្ងាត់ក្នុងឱកាសភ្ជុំបិណ្ឌនេះ គឺជារឿងល្អ ដែលគួរតែនាំគ្នាទៅវត្ត ធ្វើបុណ្យទាំងអស់គ្នា៕
Tag:
កឹម សុខា
ហ៊ុន សែន
ភ្ជុំបិណ្ឌ
© រក្សាសិទ្ធិដោយ thmeythmey.com