អន្តរជាតិ
នាយករដ្ឋមន្ត្រីន័រវ៉េសលេង Pokémon Go ពេលប្រជុំសភា នាយករដ្ឋមន្ត្រីន័រវ៉េស Erna Solberg កំពុងលេង Pokemon Go ក្នុងសភា (រូបភាព The Guardian)
×
នាយករដ្ឋមន្ត្រីន័រវ៉េស លោកស្រី Erna Solberg ត្រូវបានគេថតបានសកម្មភាពលេងហ្គេមកំសាន្ត Pokémon Go អំឡុងពេលកិច្ចប្រជុំសភា កាលពីថ្ងៃទី៤ ខែតុលា។ យ៉ាងណាក្ដី នេះមិនមែនជាលើកទីមួយទេ ដែលនាយករដ្ឋមន្ត្រីរូបនេះ លួចលេងហ្គេមកំសាន្តបែបនេះក្នុងពេលកិច្ចប្រជុំនៅក្នុងសភានោះ។ ហ្គេម Pokémon Go ដែលមានប្រជាប្រិយភាពនាពេលកន្លងមកនោះ ហាក់ធ្លាក់ចុះចំនួនអ្នកលេងនៅសព្វថ្ងៃនេះ។
ជាថ្មីម្ដងទៀត ប្រមុខរដ្ឋាភិបាលន័រវ៉េស លោកស្រី Erna Solberg បានលួចលេងហ្គេមក្នុងពេលកិច្ចប្រជុំសភា ដោយលើកនេះលោកស្រីលួចលេងហ្គេម Pokémon Go ដែលកំពុងល្បីពេញពិភពលោកវិញម្ដង។ នេះក៏ដោយសារតែលោកស្រី ជាអ្នកងប់ងល់នឹងហ្គេមនេះយ៉ាងខ្លាំង ហើយលោកស្រីតែងឆ្លៀតពេលលេងហ្គេមនេះ ជាក់ស្ដែងក្នុងទស្សនកិច្ចទៅកាន់ស្លូវ៉ាគី លោកស្រី ក៏បានលេងហ្គេមនេះដែរ។
សារព័ត៌មាន The Independent ផ្សាយថា នាយករដ្ឋមន្ត្រីរូបនេះលេងហ្គេម Pokémon Go ខណៈដែលប្រធានបក្សសេរីនិយម លោកស្រី Trine Skei Grande កំពុងថ្លែងទៅកាន់អង្គប្រជុំសភានៅថ្ងៃទី៤ ខែតុលា។ យ៉ាងណាក្ដី អ្វីគួរឲ្យចាប់អារម្មណ៍នោះ លោកស្រី Grande ផ្ទាល់ ក៏ធា្លប់លួចលេងហ្គេមនេះ ក្នុងពេលកិច្ចប្រជុំក្រុមប្រឹក្សាសន្តិសុខជាតិដែរ។
លោកស្រី Grande ត្រូវគេលួចថតសកម្មភាពលេងហ្គេម Pokémon Go កាលពីខែសីហា គឺចំពេលដែលល្បែងកំសាន្តប្រភេទថ្មីនេះ កំពុងតែល្បីល្បាញខ្លាំងនៅទូទាំងពិភពលោក។ យ៉ាងណាក្ដី ប្រជាប្រិយភាពរបស់ Pokemon Go ហាក់ថមថយខ្លាំងនាពេលបច្ចុប្បន្ននេះ ដោយសារចំនួនអ្នកលេង បានថយចុះខ្លាំងផងដែរ។
ទាក់ទិននឹងរឿងនេះ លោកស្រីនាយករដ្ឋមន្ត្រី Solberg និយាយថា ប្រធានបក្សសេរីនិយម នឹងមិនប្រកាន់លោកស្រីឡើយ។ លោកស្រី Solberg បន្តថា៖ «ខ្ញុំគិតថា លោកស្រី Grande នឹងចូលចិត្ត ពេលខ្ញុំលេងហ្គេម Pokémon Go ខណៈដែលរូបគាត់កំពុងថ្លែងទៅកាន់កិច្ចប្រជុំសភានោះ។»
ហ្គេម Pokémon Go គឺជាប្រភេតល្បែងកំសាន្តថ្មី ដែលតម្រូវឲ្យអ្នកលេងទាំងអស់ ស្វែងរក និងចាប់តួអង្គ Pokémon នៅទិដ្ឋភាពជាក់ស្ដែងពិតៗ។ យ៉ាងណាមិញ ការកើនឡើងយ៉ាងឆាប់រហ័ស ជាមួយនឹងរបៀបលេងពិតៗនោះ ផលវិបាកក៏បានកើតឡើងជាបន្តបន្ទាប់ដែរ។ គ្រោះថ្នាក់ដែលបង្កដោយការលេងហ្គេមនេះ បានកើនឡើងយ៉ាងខ្លាំងដែលរួមទាំងគ្រោះថ្នាក់ចរាចរណ៍ និងករណីឃាតកម្មជាដើម។
ប្រទេសមួយចំនួន ក៏បានចេញការណែនាំប្រជាជនខ្លួន ឲ្យមានការប្រុងប្រយ័ត្ននៅពេលលេងហ្គេមមួយនេះ។ ជាក់ស្ដែងនោះ អាជ្ញាធរបូស្នី បានប្រាប់ឲ្យប្រជាជនខ្លួន ត្រូវចៀសឆ្ងាយពីតំបន់ដែលមានមីន ព្រោះអាចនាំឲ្យមានគ្រោះថ្នាក់ដល់ជីវិតមិនខាន ស្របពេលដែលគ្រាប់មិនទាន់ផ្ទុះទាំងនោះ នៅមិនទាន់ដោះនោះឡើយ៕
Tag:
ន័រវ៉េស
Pokémon Go
© រក្សាសិទ្ធិដោយ thmeythmey.com