អន្តរជាតិ
ប្រជាជនថៃនាំគ្នាស្លៀកពាក់ពណ៌ផ្កាឈូក បួងសួងឲ្យស្ដេចមានសុខភាពល្អ
× ប្រជាជជនទូទាំងប្រទេស បានបង្ហាញក្ដីបារម្ភរបស់ខ្លួន ជុំវិញស្ថានភាពសុខភាពមិនប្រសើររបស់មហាក្សត្រ ភូមិបុល អាប់ឌុលយ៉ាដេត (Bhumibol Abdulyadej) បន្ទាប់ពីរាជវាំងថៃប្រកាសថា ព្រះអង្គកំពុងស្ថិតក្នុងស្ថានភាពមិននឹងនរ ក្រោយទទួលការព្យាបាលព្រះរោគរួចមក។ ប្រជាជនថៃជាច្រើន រួមទាំងនាយករដ្ឋមន្ត្រី និងកងទ័ពផងនោះ បានប្រមូលផ្ដុំគ្នានៅរាជវាំង ដើម្បីបន់ស្រន់ឲ្យសុខភាពមហាក្សត្រអង្គនេះប្រសើរឡើងវិញ។
សូមស្ដាប់ព័ត៌មានលម្អិត៖
ខណៈដែលសុខភាពស្ដេច ភូមិបុល អាប់ឌុលយ៉ាដេត មិនល្អនោះ ប្រជាជនថៃនាំគ្នាស្លៀកសម្លៀកបំពាក់ពណ៌ផ្កាឈូក ដើម្បីបន់ស្រន់ឲ្យមហាក្សត្រដែលគ្រងរាជ្យយូរជាងគេអង្គនេះ ត្រឡប់ទៅស្ថានភាពប្រក្រតីវិញ។ ជាមួយគ្នានេះ ប្រជាជនថៃជាច្រើន ក៏នាំគ្នាសម្រុកទៅកាន់រាជវាំង ដើម្បីថ្វាយព្រះពរដល់មហាក្សត្ររបស់គេ តាមរយៈការសរសេរពាក្យបន់ស្រន់លើសៀវភៅថ្វាយព្រះពរ ដែលរៀបចំដោយរាជវាំងដែរ។
នៅថ្ងៃទី១១ ខែតុលា នាយករដ្ឋមន្ត្រីថៃ លោក ប្រាយុទ្ធ ចន្ទអូចា ក្រុមយោធា និងសមាជិករដ្ឋាភិបាលដទៃទៀត ក៏បានទៅកាន់រាជវាំង ដើម្បីបន់ស្រន់ ជាមួយប្រជាជនដទៃទៀត។ មិនត្រឹមតែរាជធានីបាងកកឡើយ នៅតាមបណ្ដាខេត្តផ្សេងៗ ក៏មានពិធីបន់ស្រន់ដូចគ្នានេះដែរ ក្នុងគោលដៅបង្ហាញការបារម្ភ និងការស្រឡាញ់ចំពោះមហាក្សត្រអង្គនេះ។
ប្រជាជនថៃមានជំនឿថា ពណ៌ផ្កាឈូក គឺជាពណ៌ល្អសម្រាប់ស្ដេចអង្គនេះ ហើយការស្លៀកពាក់ពណ៌ផ្កាឈូក នឹងជួយឲ្យសុខភាពមហាក្សត្រថៃកាន់តែរឹងមាំថែមទៀត។ តាមពិតទៅ ជំនឿបែបនេះ លេចឡើងកាលពីប៉ុន្មានឆ្នាំមុន បន្ទាប់ពីក្រុមហោរារាជវាំងថៃ ចាត់ទុកជាពណ៌ផ្កាឈូក ជាពណ៌មង្គលមួយ ហើយចាប់ពីពេលនោះមក មហាក្សត្រ ភូមិបុល ក៏បានប្រើសម្លៀកបំពាក់ពណ៌ផ្កាឈូកជាញឹកញយដែរ។
ក្រោយការប្រកាសព័ត៌មានពីសុខភាពស្ដេច ភូមិបុល មកនោះ ប្រជាជនថៃជាច្រើន ក៏នាំគ្នាទៅកាន់មន្ទីរពេទ្យ Siriraj ជាទីដែលមហាក្សត្រដែលត្រូវបានប្រជាជនថៃគោរពដូចអាទិទេព ចំណាយពេលភាគច្រើនដើម្បីព្យាបាលព្រះរោគជាច្រើនមុខនោះ។ កាសែតបាងកកប៉ុស្តិ៍ផ្សាយថា ពួកគេទាំងនោះ បានស្លៀកសម្លៀកបំពាក់ពណ៌ផ្កាឈូក សម្រាប់បន់ស្រន់ដែរ។
អស់ពេលជាយូរមកហើយ បញ្ហាសុខភាពរបស់មហាក្សត្រ ភូមិបុល គឺជារឿងនេះធ្វើឲ្យប្រជាជនថៃព្រួយបារម្ភយ៉ាងខ្លាំង ជាពិសេសលើបញ្ហាការស្នងរាជ្យតែម្ដង។ រាជទាយាទ Maha Vajiralongkorn ក៏មិនសូវមានប្រជាប្រិយភាពខ្លាំង ហើយថែមទាំងសម្បូររឿង អាស្រូវទៀតផង។ លើសពីនោះ បញ្ហាសុខភាពនេះ ថែមទាំងប៉ះពាល់ដល់វិបត្តិនយោបាយទៀតផង ដ្បិតយោធា ដែលស្មោះត្រង់ចំពោះស្ដេចនោះ នៅតែបន្តកាន់អំណាច និងរឹតត្បិតសិទ្ធិសេរីភាពប្រជាជនដដែល៕
Tag:
ថៃ
Bhumibol Abdulyadej
© រក្សាសិទ្ធិដោយ thmeythmey.com