អន្តរជាតិ
របបស៊ីរីចោទលោក បាន គីមូន ថា បំផ្លាញមុខមាត់របស់ UN អគ្គលេខាធិការអង្គការសហប្រជាជាតិ បាន គីមូន (រូបភាព Xinhua)
× របបស៊ីរីរបស់ប្រធានាធិបតី បាសសា អាល់អាសាដ បានរិះគន់ខ្លាំងៗដាក់ប្រមុខអង្គការសហប្រជាជាតិ បាន គីមូន ដែលបានបំផ្លាញមុខមាត់របស់អង្គការសហប្រជាជាតិ។ របបស៊ីរី ថែមទាំងចោទប្រមុខអង្គការសហប្រជាជាតិដែលត្រូវផុតអាណត្តិ ជុំវិញការពារក្រុមភេរវជន និងក្លាយជាឧបករណ៍ប្រើសម្រាប់ប្រឆាំងរដ្ឋាភិបាលស៊ីរីទៀតផង។
ក្រុងដាម៉ាស់ នៅថ្ងៃទី១១ ខែតុលា បានចោទប្រកាន់អគ្គលេខាធិការអង្គការសហប្រជាជាតិចប់អាណត្តិ បាន គីមូន ថា បានបំផ្លាញកិត្តិយសរបស់អង្គការពិភពលោក ដោយបានលម្អៀងទៅរកក្រុមម្ខាងៗក្នុងជម្លោះនៅជុំវិញពិភពលោក ជាពិសេសជម្លោះនៅស៊ីរី និងយេម៉ែន។ របបស៊ីរី ក៏បន្ទោសលោក បាន គីមូន ដែលបរាជ័យក្នុងការការពារសុច្ចរិត ឯករាជ្យ និង ភាពស្មោះត្រង់របស់អង្គការសហប្រជាជាតិ ក្នុងអាណត្តិរបស់លោក។
ប្រភពពីក្រសួងការបរទេសស៊ីរី និយាយថា លោក បាន គីមូន បានបំផ្លាញមុខមាត់របស់អង្គការសហប្រជាជាតិ ដោយគាំទ្រភាគីម្ខាងៗនៅក្នុងជម្លោះ និងមិនបានប្ដេជ្ញាចិត្តដើម្បីដោះស្រាយជម្លោះ ស្របតាមគោលការណ៍របស់ធម្មនុញ្ញអង្គការសហប្រជាជាតិឡើយ។ ប្រភពដដែលបន្តថា លោក បាន គីមូន គួរទទួលខុសត្រូវទាំងផ្នែកច្បាប់ និងសីលធ៌ ចំពោះស្ថានការណ៍បច្ចុប្បន្ននៅស៊ីរី ដ្បិតលោកអនុវត្តតាមគោលនយោបាយប្រទេសខ្លះ ប្រឆាំងក្រុងដាម៉ាស។
បើតាមសារព័ត៌មាន RT មន្ត្រីក្រសួងការបរទេសស៊ីរីដែលមិនបញ្ចេញអត្តសញ្ញាណ បន្តចោទអគ្គលេខាធិការជនជាតិកូរ៉េខាងត្បូងទៀតថា បានផ្ដល់ការការពារផ្នែកនយោបាយឲ្យភេរវករ និងជួយធ្វើសកម្មភាពប្រឆាំងស៊ីរី ដោយបានថ្លែងការណ៍គ្មានមូលដ្ឋានទៀតផង។ លើសពីនោះ មុខមាត់របស់អង្គការសហប្រជាជាតិ ក៏ត្រូវបំផ្លាញ ក្រោយដកអារ៉ាប៊ីសាអូឌីត និងសម្ព័ន្ធមិត្តចេញពីបញ្ជីរដ្ឋរំលោភសិទ្ធិកុមារនោះ។
ដោយឡែក ប្រមុខអង្គការសហប្រជាជាតិ បាន គីមូន ក៏ចោទប្រកាន់របបលោក អាសាដ ចំពោះការស្លាប់របស់ប្រជាជនស៊ីរីរាប់ម៉ឺននាក់នោះ។ ក្នុងកិច្ចសម្ភាសជាមួយសារព័ត៌មានអាល្លឺម៉ង់ Deutsche Welle នៅថ្ងៃទី១១ ខែតុលា លោក បាន គីមូន និយាយថា វាជាការពិតដែលបរាជ័យក្នុងការដឹកនាំរបស់លោក អាសាដ នាំឲ្យមនុស្សជាងបីសែននាក់បាត់បង់ជីវិតក្នងជម្លោះដែលផ្ទុះចេញពីឆ្នាំ២០១១មកនោះ។
ជម្លោះនៅស៊ីរី ដែលបន្តមកដល់សព្វថ្ងៃ នៅតែរកច្រកចេញមិនឃើញ ស្របពេលមហាអំណាចសមាជិកក្រុមប្រឹក្សាសន្តិសុខកំពុងហែកហួរគ្នាទៅវិញទៅមកដោយសារជម្លោះស៊ីរី ហើយគ្មានដំណោះស្រាយណាមួយត្រូវបានស្ថាប័នដ៏មានឥទ្ធិពល នេះដាក់ចេញដើម្បីឆ្លើយគ្រោះមហន្តរាយមនុស្សជាតិដែលកើតឡើងនៅស៊ីរីឡើយ។ រុស្ស៊ីប្រើប្រាស់សិទ្ធិជំទាស់ ទាត់ចោលដំណោះស្រាយព្រាងឡើងដោយបារាំង ហើយលោកខាងលិចក៏ទាត់ចោលដំណោះស្រាយរបស់រុស្ស៊ីដូចគ្នា។
ក្តីសង្ឃឹមរបស់ប្រជាជនស៊ីរីដែលរងគ្រោះនិងទន្ទឹងរង់ចាំការសង្គ្រោះនោះ ប្រហែលរលាយរលត់អស់ ដោយសារតែភាពអាត្មានិយម និងគ្មានការទទួលខុសត្រូវរបស់មហាអំណាចទាំងអស់នេះឯង។ ប្រជាជនស៊ីរីដែលជាជនរងគ្រោះពិតប្រាកដឯណោះបានត្រឹមផ្ញើក្តីសង្ឃឹមលើមេឃលើផ្កាយ ទាំងដែលខ្លួនគ្មានសិទ្ធិសម្រេចជោគវាសនាខ្លួនឯងសូម្បីបន្តិច។ ប្រជាជន២៥០០០០នាក់រស់នៅក្រុង Aleppo ដែលរងគ្រោះខ្លាំងជាងគេនោះប្រហែលជាបានត្រឹមសង្ឃឹមប៉ុណ្ណោះ៕
Tag:
ស៊ីរី
UN
Ban Ki Moon
© រក្សាសិទ្ធិដោយ thmeythmey.com