អន្តរជាតិ
×![]()
ដោយ: តន ចាន់រិទ្ធារ៉ា
ប្រទេសប៊ូតង់ នឹងកាន់ទុក្ខរយៈពេលមួយថ្ងៃ គឺនៅថ្ងៃទី ១៤ ខែតុលា ដើម្បីបង្ហាញការរម្លែកទុក្ខចំពោះមរណទុក្ខមហាក្សត្រថៃ ព្រះចៅភូមិបុល អាប់ឌុលយ៉ាដេត ដែលសោយទិវង្គត នៅថ្ងៃទី១៣ ខែតុលា។ នេះបើយោងតាមការប្រកាសរបស់មហាក្សត្រប៊ូតង់ Jigme Khesar Namgyel Wangchuck។
ភ្លាមៗបន្ទាប់ពីទទួលព័ត៌មានពីការចូលទិវង្គតនៃព្រះមហាក្សត្រថៃ ភូមិបុល អាប់ឌុលយ៉ាដេត ស្ដេចប៊ូតង់ Jigme Khesar Namgyel Wangchuck សមាជិករាជវង្សដទៃទៀត និងសមាជិករដ្ឋាភិបាលប៊ូតង់ បានដឹកនាំពិធីដុតទៀន ធូប និងបន់ស្រន់ចំពោះការចូលទិវង្គតរបស់មហាក្សត្រថៃ។
មហាក្សត្រប៊ូតង់ ក៏បញ្ជាឲ្យគេដុតធូបទៀននៅតាមវិហារ និងទីសក្ការៈផ្សេងទៀត នៅទូទាំងប្រទេសផងដែរ។ ជាមួយគ្នានោះ ស្ដេចប៊ូតង់ ក៏ប្រកាសកាន់ទុក្ខទូទាំងប្រទេសរយៈពេលមួយថ្ងៃ ពោលគឺថ្ងៃទី១៤ ខែតុលា ហើយទង់ជាតិប៊ូតង់ ក៏នឹងត្រូវគេបង្ហូតពាក់កណ្ដាលដងដែរដើម្បីបង្ហាញពីការសម្តែងមរណទុក្ខ។
សាលារៀន និងការិយាល័យនានា ក៏ត្រូវបិទដែរ ដើម្បីទុកឱកាសឲ្យប្រជាជនបានចូលរួមពិធីកាន់ទុក្ខនេះ។ កាដុតទៀននឹងបន្តរហូត ៧ថ្ងៃនៅតាមទីសក្ការៈទាំងអស់ទូទាំងប្រទេស។
បើតាមការប្រកាសដដែលនេះ ស្ដេចប៊ូតង់ចាត់ទុកមហាក្សត្រថ្មី ជាមេដឹកនាំអស្ចារ្យសម្រាប់ប្រជាជនថៃ។ ហើយប្រជាជនប៊ូតង់ ក៏សោកសង្រេងយ៉ាងខ្លាំងដែរចំពោះការសោយទិវង្គតរបស់ព្រះចៅ ភូមិបុល និងសូមរម្លែកទុក្ខនេះជាមួយប្រជាជនថៃដែរ៕
© រក្សាសិទ្ធិដោយ thmeythmey.com
