អន្តរជាតិ
អតីតនាយករដ្ឋមន្ត្រីព័រទុយហ្កាល់ Antonio Guterres ក្លាយជាអគ្គលេខាធិការ UN ផ្លូវការ
× អតីតនាយករដ្ឋមន្ត្រីព័រទុយហ្កាល់ លោក Antonio Guterres ត្រូវបានតែងតាំងជាប្រមុខអង្គការសហប្រជាជាតិថ្មីជាផ្លូវការហើយ។ លោក Guterres នឹងបន្តតំណែងពីលោក បាន គីមូន ដែលត្រូវចប់អាណត្តិនៅចុងឆ្នាំ២០១៦ ហើយលោក នឹងចាប់ផ្ដើមការងារជាប្រមុខអង្គការពិភពលោកនេះ ចាប់ពីថ្ងៃទី១ ខែមករា ឆ្នាំ២០១៧។
មហាសន្និបាតអង្គការសហប្រជាជាតិ នៅថ្ងៃទី១៣ ខែតុលា បានសម្រេចជាឯកច្ឆន្ទជ្រើសរើសលោក Antonio Guterres ជាអគ្គលេខាធិការអង្គការសហប្រជាជាតិថ្មី ទៅតាមសំណើរបស់ក្រុមប្រឹក្សាសន្តិសុខ។ អតីតប្រមុខស្ថាប័នទទួលបន្ទុកជនភៀសខ្លួនរូបនេះ នឹងជំនួសតំណែងលោក បាន គីមូន ហើយលោក គឺជាអគ្គលេខាធិការទី៩ របស់អង្គការសហប្រជាជាតិ ចាប់តាំងពីឆ្នាំ១៩៤៥មក។
លោក Antonio Guterres ជាអតីតនាយករដ្ឋមន្ត្រីព័រទុយហ្កាល់ពីឆ្នាំ១៩៩៥ ដល់ឆ្នាំ២០០២ បន្ទាប់មកក្លាយជាឧត្តមស្នងការទទួលបន្ទុកជនភៀសខ្លួនពីឆ្នាំ២០០៥ ដល់ឆ្នាំ២០១៥។ បុរសវ័យ៦៧ឆ្នាំនេះ នឹងចូលកាន់តំណែងដែលអាណត្តិ៥ឆ្នាំ ពោលពីថ្ងៃទី១ ខែមករា ឆ្នាំ២០១៧។ លោកអាចបន្តតំណែងនេះមួយអាណត្តិទៀត ប្រសិនបើមានការគាំទ្រ ដ្បិតធម្មនុញ្ញអង្គការសហប្រជាជាតិ មិនបានកំណត់អាណត្តិអគ្គលេខាធិការឡើយ។
ថ្លែងបន្ទាប់ពីត្រូវបានតែងតាំងជាអគ្គលេខាធិការថ្មី លោក Guterres បានបង្ហាញការអរគុណចំពោះមហាសន្និបាត ដែលផ្ដល់ទុកចិត្តដល់លោក ហើយសន្យាបំពេញតួនាទីឲ្យល្អបំផុត។ លោក Guterres បញ្ជាក់ថា៖ «លោកនឹងធ្វើជាអ្នកសង្កេតការណ៍ ជាអ្នកសម្រុះសម្រួល ធ្វើជាស្ពាន និងធ្វើជាអ្នកចរចា ដើម្បីរកដំណោះស្រាយជម្លោះ ដែលគ្រប់គ្នាអាចទទួលយកបាន។»
អតីតប្រមុខស្ថាប័នជនភៀសខ្លួនខាងលើ បញ្ជាក់ដែរថា វិបត្តិស៊ីរី គឺជាអាទិភាពទីមួយរបស់លោក នៅពេលលោកចូលកាន់តំណែងផ្លូវការ។ លោកបន្តថា ការជួយជនភៀសខ្លួន ជាពិសេសជនរងគ្រោះនៅតំបន់ជម្លោះទាំងឡាយ ក៏ដូចជាការលើកកម្ពស់យេនឌ័រ ក៏ជាអាទិភាពសំខាន់របស់លោកដែរ។ គេរំពឹងថា លោក Guterres ដែលមានបទពិសោធន៍១០ឆ្នាំលើផ្នែកជនភៀសខ្លួននោះ ប្រហែលជាអាចដោះស្រាយបញ្ហាជនភៀសខ្លួនដ៏អាក្រក់នេះបាន។
សូមរម្លឹកថា លោក Antonio Guterres ត្រូវបានសមាជិកទាំង១៥ប្រទេស នៃក្រុមប្រឹក្សាសន្តិសុខ សម្រេចជាឯកច្ឆន្ទជ្រើសរើសជាបេក្ខភាពអគ្គលេខាធិការថ្មី។ បេក្ខភាពរបស់លោក ក៏ត្រូវបញ្ជូនទៅកាន់មហាសន្និបាតដែលមានសមាជិក១៩៣ប្រទេស សម្រេចជាចុងក្រោយ។ ដំណើរការទាំងពីរដំណាក់កាលនេះ ជាបទបញ្ញត្តិរបស់អង្គការសហប្រជាជាតិ ក្នុងការជ្រើសរើសប្រមុខដឹកនាំថ្មី៕
© រក្សាសិទ្ធិដោយ thmeythmey.com