អន្តរជាតិ
អង់គ្លេសត្រូវជ្រើសរវាង«ចេញឲ្យផុត» និង «មិនចាកចេញតែម្ដង»ពីសហភាពអឺរ៉ុប
× នាយករដ្ឋមន្ត្រីអង់គ្លេស លោកស្រី Theresa May បានប្រកាសហើយថា រដ្ឋាភិបាលលោកស្រី នឹងចាប់ផ្ដើមអនុវត្តតាមមាត្រា៥០ នៃសន្ធិសញ្ញា Lisbon នៅដើមឆ្នាំ២០១៧ ដែលនោះជាការចាប់ផ្ដើមនៃរយៈពេលពីរឆ្នាំ ក្នុងដំណើរការចរចាចាកចេញរបស់ចក្រភពអង់គ្លេស។ ប៉ុន្តែអ្វីដែលជាបញ្ហានោះ គឺទំនាក់ទំនងរវាងសហភាពអឺរ៉ុប និងចក្រភពអង់គ្លេស ក្រោយការចាកចេញជាផ្លូវការនោះ។ លោកស្រី May ចង់ឲ្យអង់គ្លេសនៅបន្តចូលរួមក្នុងទីផ្សារតែមួយរបស់អឺរ៉ុប តែមេដឹកនាំអឺរ៉ុបចង់ឲ្យអង់គ្លេស ចាកចេញឲ្យដាច់ស្រេច។
សូមស្ដាប់ព័ត៌មានលម្អិត៖
ជិតបួនខែមកហើយ អង់គ្លេសបានសម្រេចចិត្តចាកចេញពីអឺរ៉ុប តាមរយៈប្រជាមតិដែលមានលទ្ធផល៥២ភាគរយ ទល់នឹង៤៨ភាគរយនោះ។ ក្នុងរយៈពេលនេះ និងរយៈពេលទៅមុខទៀត ចក្រភពអង់គ្លេស នឹងនៅតែបន្តទទួលបានសិទ្ធិ និងសេរីភាពជាសមាជិកសហភាពអឺរ៉ុបដដែល ដូចជាការប្រើប្រាស់ទីផ្សាររួមជាដើមដរាបណាអង់គ្លេសមិនទាន់ចាកចេញក្នុងពេលពីរឆ្នាំទេនោះ។
នាយករដ្ឋមន្ត្រីអង់គ្លេស លោកស្រី Theresa May ហាក់នៅរារែកក្នុងការចរចាជាមួយអឺរ៉ុប ជុំវិញការចាកចេញនេះ ដ្បិតលោកស្រី ទំនងជាចង់រៀបចំលក្ខខណ្ឌមួយចំនួនសិន សម្រាប់តទល់ជាមួយអឺរ៉ុប។ ជាការពិត នាយករដ្ឋមន្ត្រីអង់គ្លេសរូបនេះ គាំទ្រការចាកចេញ តែលោកស្រី ចង់បានការចាកចេញទន់ភ្លន់ (Soft Brexit) ដែលអង់គ្លេសនៅតែអាចបន្តប្រើប្រាស់ទីផ្សារអឺរ៉ុប ព្រមគ្នានោះអង់គ្លេសក៏ទទួលបានស្វ័យភាពលើការងារអន្តោប្រវេសន៍វិញដែរ។
បន្ថែមពីលើនោះ ការចាកចេញទន់ភ្លន់ដែលក្រុមចង់ឲ្យអង់គ្លេសបន្តជាសមាជិកអឺរ៉ុបចង់បាននោះ ក៏នឹងផ្ដល់ឱកាសឲ្យមានលំហូរទំនិញចេញចូលដោយសេរី និងមិនត្រូវបានត្រួតពិនិត្យអ្វីឡើយ។ ប៉ុន្តែការចាកចេញរបៀបនេះ មិនមែនជាអ្វីដែលមេដឹកនាំអឺរ៉ុបភាគច្រើនចង់បានឡើយ។ ក្រៅពីចង់ឲ្យអង់គ្លេសចាកចេញឲ្យបានឆាប់ អឺរ៉ុបក៏មិនចង់ឲ្យអង់គ្លេស បន្តពាក់ព័ន្ធលើការប្រើប្រាស់ទីផ្សាររួមរបស់ខ្លួនដែរ។
សម្រាប់មេដឹកនាំអឺរ៉ុប និងអ្នកគាំទ្រការចាកចេញ គឺចង់ឲ្យអង់គ្លេសចាកចេញឲ្យដាច់ស្រេច (Hard Brexit) មិនត្រូវជាប់ទាក់ទង ឬក៏បន្តជាប់ខ្លួននឹងកិច្ចព្រមព្រៀងណាមួយរបស់អឺរ៉ុបទៀតឡើយ។ នេះក៏ដោយសារតែសហភាពអឺរ៉ុប ដែលប្រឈមមុខនឹងស្ថានភាពមិនច្បាស់លាស់ដោយសារការចាកចេញរបស់អងគ្លេស កំពុងរិះរកច្រកចេញ ក៏ដូចជាចំណាត់ការបន្ទាប់ទៀតរបស់ខ្លួន ក្រោយការចាកចេញដ៏ភ្ញាក់ផ្អើលរបស់អង់គ្លេស។
១. ប្រធានក្រុមប្រឹក្សាអឺរ៉ុប៖ អង់គ្លេសមានជម្រើសពីរគឺ មិនចាកចេញ ឬចាកចេញឲ្យផុត
ខណៈដែលនាយករដ្ឋមន្ត្រីអង់គ្លេស Theresa May ចង់បានការចាកចេញទន់ភ្លន់នោះ (Soft Brexit) ប្រធានក្រុមប្រឹក្សាអឺរ៉ុប លោក Donald Tusk បានទាត់ចោលលទ្ធភាពដែលអង់គ្លេសចង់បន្តជាសមាជិកនៃទីផ្សារតែមួយរបស់អឺរ៉ុប និងមិនព្រមបើកចំហព្រំដែននោះ។ លោកប្រកាសដាច់ខាតថា អឺរ៉ុប មិនចុះញ៉មរឿងលំហូរប្រជាជនដោយសេរីជាមួយអង់គ្លេសឡើយ នៅពេលអង់គ្លេសចាកចេញនោះ។
ថ្លែងពីក្រុងព្រុចសែល នៅថ្ងៃទី១៣ ខែតុលា ប្រធានក្រុមប្រឹក្សាអឺរ៉ុបរូបនេះ និយាយថា ក្នុងករណីដែលអង់គ្លេសចង់បានការចាកចេញតែបន្តនៅក្នុងទីផ្សារអឺរ៉ុបនោះ អង់គ្លេសមិនចាំបាច់ចាកចេញឡើយ។ នេះជាលើកដំបូង ដែលមេដឹកនាំអឺរ៉ុបបង្ហាញជំហររឹងត្អឹងទៅកាន់អង់គ្លេស ខណៈដែលការចរចារវាងអឺរ៉ុប និងចក្រភពអង់គ្លេស នៅមិនទាន់ចាប់ផ្ដើមផងនោះ ដ្បិតគេត្រូវរង់ចាំក្រុងឡុងដ៍អនុវត្តតាមមាត្រា៥០ សន្ធិសញ្ញា Lisbon សិន។
បើតាមកាសែត The Guardian លោក Donald Tusk បានប្រាប់សមាជិកសភាអឺរ៉ុបថា វាជារឿងឥតប្រយោជន៍ដែលត្រូវនិយាយរឿងចាកចេញ តែចង់បន្តប្រើប្រាស់ទីផ្សាររួមនោះ។ វាអាចជារឿងដែលពិបាកឲ្យជឿថា អង់គ្លេសអាចមិនចាកចេញវិញនោះ តែវាជាជម្រើសតែមួយគត់។ ពោលគឺអង់គ្លេស មិនអាចសោយសុខនៅក្នុងអឺរ៉ុបដូចពេលកន្លងមក នៅពេលដែលខ្លួនមិនចង់បោះបង់សិទ្ធិគ្រប់គ្រងលើគោលនយោបាយអន្តោរប្រវេសន៍ និងគោលការណ៍ផ្សេងទៀតឡើយ។
២. ស្កុតលែន ចាកចេញពីចក្រភពអង់គ្លេស បើអង់គ្លេសចាកចេញតាម Hard Brexit
រដ្ឋមន្ត្រីទីមួយស្កុតលែន លោកស្រី Nicola Sturgeon បានព្រមានថា ស្កុតលែន នឹងចាកចេញពីចក្រភពអង់គ្លេស មុនចក្រភពអង់គ្លេសចាកចេញពីសហភាពអឺរ៉ុប ប្រសិនបើអង់គ្លេស មិនអាចបន្តប្រើប្រាស់ទីផ្សាររួមរបស់អឺរ៉ុបទេនោះ។ មិនតែប៉ុណ្ណោះ លោកស្រី ក៏ប្រកាសពីសេចក្ដីព្រាងច្បាប់ប្រជាមតិឯករាជ្យថ្មីមួយទៀតដែរ ហើយនេះពិតជាការគំរាមខ្លាំងដល់រដ្ឋាភិបាលលោកស្រី Theresa May។
ថ្លែងក្នុងសន្និបាតបក្សនៅក្នុងទីក្រុង Glasgow លោកស្រី Sturgeon បញ្ជាក់ថា ប្រជាមតិថ្មីនេះ នឹងដូចប្រជាមតិចាស់ឡើយ ដ្បិតស្កុតលែន មិនអាចបោះបង់ប្រយោជន៍របស់ខ្លួននៅក្នុងអឺរ៉ុបបានឡើយ។ លោកស្រីបន្តថា ស្កុតលែន អាចមានសមត្ថភាពគ្រប់គ្រាន់ដើម្បីពិចារណារឿងឯករាជ្យរបស់ខ្លួន ជាជាងផ្ញើវាសនាលើអង់គ្លេសនោះ។
ជាការពិត ប្រសិនបើអង់គ្លេសចាកចេញពីអឺរ៉ុប ហើយបាត់បង់សិទ្ធិក្នុងទីផ្សាររួមមែននោះ ស្កុតលែនក៏រងគ្រោះដែរ។ នេះក៏ដោយសារតែស្កុតលែនជារដ្ឋចំណុះចក្រភពអង់គ្លេស ហើយការសម្រេចណាមួយលើចក្រភពអង់គ្លេស ក៏មានឥទ្ធិពលខ្លាំងដល់ស្កុតលែនដែរ។ ហើយតាំងពីដើមមកនោះ ប្រជាជនស្កុតលែនភាគច្រើនមិនគាំទ្រការចាកចេញរបស់ចក្រភពអង់គ្លេសពីអឺរ៉ុបឡើយ។
ចុងក្រោយនោះ ជាមួយនឹងការប្រកាសដាច់ណាត់របស់ប្រធានក្រុមប្រឹក្សាអឺរ៉ុប នាយករដ្ឋមន្ត្រីអង់គ្លេស ប្រហែលជារងសម្ពាធខ្លាំងក្នុងការចរចាជាមួយអឺរ៉ុប ដែលត្រូវចាប់ផ្ដើមនៅពេលខ្លួនអនុវត្តតាមមាត្រា៥០នោះ។ អង់គ្លេស អាចនឹងបាត់បង់សិទ្ធិប្រើប្រាស់ទីផ្សារតែមួយរបស់អឺរ៉ុប ដូចដែលខ្លួនកំពុងប្រើបច្ចុប្បន្ន ក៏ដូចជាអត្ថប្រយោជន៍ផ្សេងទៀតរួមទាំងការយកពន្ធ និងលំហូរពលករជាដើម៕
© រក្សាសិទ្ធិដោយ thmeythmey.com