រាជទាយាទ Maha Vajiralongkorn ប្រាប់ប្រជាជនថៃកុំបារម្ភរឿងពន្យារពេលគ្រងរាជ្យ

អន្តរជាតិ

រាជទាយាទ Maha Vajiralongkorn ប្រាប់ប្រជាជនថៃកុំបារម្ភរឿងពន្យារពេលគ្រងរាជ្យ

16, Oct 2016 , 1:12 pm

រូបភាព

ដោយ: តន ចាន់រិទ្ធារ៉ា

បន្ទាប់ពីការសោយទិវង្គតមហាក្សត្រថៃ ភូមិបុល អាឌុលយ៉ាដេត គេរំពឹងថា រាជទាយាទ Maha Vajiralongkorn នឹងឡើងគ្រងរាជ្យភ្លាមៗ ទៅតាមរដ្ឋធម្មនុញ្ញថៃ។ ប៉ុន្តែរាជទាយាទអង្គនេះ បានបង្កការភ្ញាក់ផ្អើលទៅវិញ បន្ទាប់ពីទ្រង់ពន្យារពេលគ្រងរាជ្យនេះ ព្រោះចង់កាន់ទុក្ខបិតាសិន។ យ៉ាងណាចុងក្រោយនេះ រាជទាយាទ Maha Vajiralongkorn បានទទូចឲ្យប្រជាជនថៃ មិនចាំបាច់បារម្ភអ្វីលើបញ្ហានេះឡើយ។

នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចន្ទអូចា នៅថ្ងៃទី១៥ ខែតុលា និយាយថា ខ្លួនលោក និងប្រធានឧត្តមប្រឹក្សាមហាក្សត្រ Prem Tinsulanonda ត្រូវបានរាជទាយាទ Maha Vajiralongkorn ហៅចូលគាល់ ដើម្បីពិភាក្សារឿងពន្យារពេលឡើងគ្រងរាជ្យសម្បត្តិនេះ។ លោក ប្រាយុទ្ធ និយាយទៀតថា រាជទាយាទ បានស្នើឲ្យប្រជាជនថៃ បន្តស្ថិតក្នុងស្ថានភាពស្ងប់ស្ងៀម និងកុំព្រួយបារម្ភអ្វីទាំងអស់។

ការប្រកាសពន្យារពេលឡើងគ្រងរាជ្យសម្បត្តិ ដែលឈានទៅដល់ការតែងតាំងស្ដេចរាជានុសិទ្ធិ បានបង្កការព្រួយបារម្ភជុំវិញស្ថានភាពមិនច្បាស់លាស់របស់ប្រទេស ក្រោយការចូលទិវង្គតរបស់មហាក្សត្រ ភូមិបុល។ តាមពិត រាជទាយាទ Maha Vajiralongkorn ត្រូវបានតែងតាំងជាអ្នកស្នងរាជ្យជាយូរមកហើយ តែរាជទាយាទអង្គនេះ បានប្រកាសពន្យារពេល ដើម្បីកាន់ទុក្ខសិន មុននឹងឡើងគ្រងរាជ្យនោះ។

បើតាមទីភ្នាក់ងារព័ត៌មាន AFP ជាមួយនឹងការពន្យារពេលនេះ ប្រធានឧត្តមប្រឹក្សាមហាក្សត្រថៃ Prem Tinsulanonda ក៏ត្រូវបានប្រកាសជាស្ដចរាជានុសិទ្ធិតែម្ដង ដើម្បីមើលការខុសត្រូវប្រទេសជាតិ មុននឹងស្ដេចថ្មីគ្រងរាជ្យសម្បត្តិ។ លោក Prem គឺជាអ្នកតួនាទីយ៉ាងសំខាន់ក្នុងនយោបាយថៃ ដ្បិតលោកមានទំនាក់ទំនងស្អិតល្មួតជាមួយយោធា ដែលធ្វើរដ្ឋប្រហារជាញឹកញយមកនោះ។

ថ្លែងតាមទូរទស្សន៍ក្រោយជំនួបជាមួយរាជទាយាទ និងស្ដេចរាជានុសិទ្ធិ លោកនាយករដ្ឋមន្ត្រី ប្រាយុទ្ធ បញ្ជាក់ថា រាជទាយាទ Maha Vajiralongkorn ប្រាប់ឲ្យប្រជាជន កុំច្រឡំ ឬបារម្ភអ្វីលើបញ្ហាស្នងរាជ្យ និងដំណើរការនៅក្នុងប្រទេសឡើយ។ លោកបន្តថា រាជទាយាទ និងគ្រប់ភាគីទាំងអស់គួរតែរង់ចាំសិន មុននឹងមានការផ្លាស់ប្ដូរភា្លមៗនោះ។ ដោយស្រង់បន្ទូលរាជទាយាទ លោកប្រាយុទ្ធ បញ្ជាក់ថា ពេលវេលាសមរម្យសម្រាប់គ្រងរាជ្យសម្បត្តិ គឺបន្ទាប់ពីបញ្ចប់ពិធីបុណ្យសពមហាក្សត្រ។

ការសោយទិវង្គតរបស់ព្រះចៅភូមិបុល អាឌុលយ៉ាដេត បានធ្វើឲ្យប្រជាជនសោកសង្រេងខ្លាំង ក៏ដូចជាបារម្ភពីអនាគតរបបរាជានិយមដែលតែងមានឥទ្ធិពលខ្លាំងក្នុងសង្គមថៃផងដែរ។ ស្ថាប័នព្រះមហាក្សត្រដែលធ្លាប់មានឥទ្ធិពលលើសលុបគ្របដណ្តប់សង្គមថៃនោះនឹងធ្លាក់ចុះតាមព្រះរាជ្យអវត្តមានរបស់ព្រះមហាក្សត្រភូមិបុល អាឌុលយ៉ាដេត ដែរ។ រាជទាយាទ Maha Vajiralongkorn ដែលនឹងឡើងគ្រងរាជ្យជំនួសព្រះបិតាទ្រង់ មិនសូវជាមានប្រជាប្រិយភាពនិងឥទ្ធិពលខ្លាំង ដែលរឿងនេះធ្វើឲ្យគេបារម្ភខ្លាំង៕