អន្តរជាតិ
×![]()
ដោយ: តន ចាន់រិទ្ធារ៉ា
ភ្លាមៗបន្ទាប់ពីមហាក្សត្រថៃ ភូមិបុល អាឌុលយ៉ាដេត សោយទិវង្គតក្នុងមន្ទីរពេទ្យក្នុងទីក្រុងបាងកក រដ្ឋាភិបាលថៃក៏ប្រកាសកាន់ទុក្ខរយៈពេលវែងភ្លាមៗដែរ។ កន្លែងកម្សាន្តកម្មវិធីកម្សាន្តតាមទូរទស្សន៍ជាច្រើន ក៏ត្រូវប្រកាសឲ្យផ្អាកប្រតិបត្តិការជាបណ្ដោះអាសន្នក្នុងរយៈពេលកាន់ទុក្ខនេះ។ ចំណែកវិស័យទេសចរណ៍វិញ ក៏រងផលប៉ះពាល់ដែរ ដោយទេសចរណ៍ភាគច្រើន ត្អូញត្អែរយ៉ាងខ្លាំងជុំវិញបញ្ហានេះ។ 
«នេះជាសុបិន្តអាក្រក់។ ថ្ងៃសម្រាករបស់ខ្ញុំត្រូវបំផ្លាញអស់ហើយ។» នេះជាការត្អូញត្អែររបស់អ្នកទេសចរបស្ចឹមប្រទេស ដែលខកខានការលំហែកាយ ដោយសារតែការសោយទិវង្គតរបស់មហាក្សត្រថៃ ភូមិបុល អាឌុលយ៉ាដេត (Bhumibol Adulyadej) នោះ។ ខណៈដដែលប្រជាជនថៃកំពុងកាន់ទុក្ខ កន្លែងកម្សាន្តពេលរាត្រី ត្រូវបានផ្អាកដំណើរការ ហើយពិធីជប់លៀងពេលរាត្រីដ៏មានប្រជាប្រិយភាព ក៏ត្រូវបានលុបចោលទៀតនោះ។
ជាធម្មតាទៅហើយ ខែតុលា ជាពេលវេលាដែលសម្បូរទេសចរមួយនៅប្រទេសថៃ។ ទេសចរជាច្រើនលាននាក់ សម្រុកទៅទីកម្សាន្តផ្សេងៗ ជាពិសេសរង្គសាលរាត្រី និងសង្កាត់ភ្លើងពណ៌ក្រហម ដែលជាគោលដៅទេសចរណ៍ដ៏ទាក់ទាញ។ ប៉ុន្តែការកាន់ទុក្ខមហាក្សត្រថៃ ធ្វើឲ្យកម្មវិធីសប្បាយៗ និងកន្លែងទេចរណ៍មានប្រជាប្រិយភាពទាំងអស់ ផ្អាកសកម្មភាព។
សូមរម្លឹកថា ក្រោយការប្រកាសព័តមាននៃការសោយទិវង្គតមក រាជវាំងថៃប្រកាសថា មន្ត្រីរដ្ឋាភិបាល និងបុគ្គលិកក្រុមហ៊ុនរដ្ឋទាំងអស់ តម្រូវឲ្យស្លៀកសម្លៀកបំពាក់ពណ៌ខ្មៅរយៈពេល១០០ថ្ងៃ។ ហើយទង់ជាតិថៃ ក៏នឹងត្រូវបង្ហូតត្រឹមពាក់កណ្ដាលដងរយៈពេល៣០ថ្ងៃនៅទូទាំងប្រទេសដែរ។ ក្នុងរយៈពេលនេះ កម្មវិធីភាគច្រើន ជាពិសេសកម្មវិធីទូរទស្សន៍ នឹងចាក់ផ្សាយតែកម្មវិធីពាក់ព័ន្ធនឹងពិធីបុណ្យប៉ុណ្ណោះ។
ដោយឡែកកម្មវិធីបុណ្យព្រះសពមហាក្សត្រ ភូមិបុល អាឌុលយ៉ាដេត ក៏បានចាប់ផ្ដើមដែរ កាលពីថ្ងៃទី១៤ ខែតុលា បន្ទាប់ព្រះសពស្ដេចអង្គនេះ យាងដល់រាជវាំងរួចមក។ គេរំពឹងថា ពិធីបុណ្យព្រះសព នឹងប្រព្រឹត្តទៅរយៈពេលវែងទៅមុខទៀត ដែលអាចនឹងធ្វើឲ្យវិស័យទេសចរណ៍ធ្លាក់ចុះមិនខាន។
សារព័ត៌មាន Daily Mail ផ្សាយថា អាជ្ញាធរទេសចរណ៍ក៏បានប្រាប់ឲ្យភ្ញៀវទេសចរ អាចធ្វើដំណើរកម្សាន្តជាធម្មតា នៅអំឡុងពេលនេះ ដោយគ្រាន់តែបង្ហាញការគោរពចំពោះការសោយទិវង្គតប៉ុណ្ណោះ។ យ៉ាងណា ទេសចរទាំងអស់ ក៏ត្រូវបានណែនាំឲ្យបង្ហាញអាកប្បកិរិយាសមរម្យ ជាពិសេសការស្លៀកពាក់ នៅក្នុងពេលកាន់ទុក្ខនេះដែរ៕
Tag:
ថៃ
Bhumibol Adulyadej
© រក្សាសិទ្ធិដោយ thmeythmey.com
