អន្តរជាតិ
នយោបាយអន្តរជាតិ
នាយករដ្ឋមន្ត្រីចិន លី ឃឺឈាំង ចាប់ដៃជាមួយប្រធានាធិបតីហ្វីលីពីន ឌើទើតេ នាកិច្ចប្រជុំអាស៊ាន (រូបភាព GMA Network)
×![]()
ដោយ: តន ចាន់រិទ្ធារ៉ា
បន្ទាប់ពីបញ្ចប់ទស្សនកិច្ចនៅព្រុយណេ ប្រធានាធិបតីហ្វីលីពីន លោក Rodrigo Duterte នឹងធ្វើដំណើរឆ្ពោះទៅកាន់ទឹកដីចិន ដើម្បីបំពេញទស្សនកិច្ចផ្លូវការលើកទីមួយរបស់លោកនៅទីនោះ។ នៅមុនចាកចេញ លោក Duterte បានលើកសរសើរចិន ដែលបានជួយហ្វីលីពីន ហើយលោករំពឹងខ្ពស់ថាទស្សនកិច្ចនេះនឹងនាំផលប្រយោជន៍កាន់តែច្រើនឲ្យហ្វីលីពីន។
ប្រធានាធិបតីហ្វីលីពីន Rodrigo Duterte ចាប់ផ្ដើមទស្សនកិច្ចបួនថ្ងៃនៅទឹកដីចិន តាមការអញ្ជើញរបស់សមភាគីចិន លោក ស៊ី ជិនពីង (Xi Jinping)។ នៅមុនដំណើរទស្សនកិច្ចនៅចិន លោក Duterte និយាយថា លោកនឹងកាន់តែយល់ថែមទៀតអំពីចិនក្នុងទស្សនកិច្ចលើកទីមួយនេះ ហើយលោករំពឹងថា ទំនាក់ទំនងប្រពៃណីរវាងចិន និងហ្វីលីពីន នឹងកាន់តែស៊ីជម្រៅទាំងសេដ្ឋកិច្ចនិងពាណិជ្ជកម្ម។
នៅក្នុងកិច្ចសម្ភាសន៍ជាមួយទីភ្នាក់ងារព័ត៌មាន Xinhua ដែលចេញផ្សាយនៅថ្ងៃទី១៧ ខែតុលា ប្រធានាធិបតីហ្វីលីពីន បានលើកសរសើរចិន ដែលបានជួយប្រទេសដទៃទៀតក្នុងនាមជាតួអង្គដ៏សំខាន់របស់ពិភពលោក។ លោកបញ្ជាក់ថា ក្រៅពីការអភិវឌ្ឍខ្លួនឯង ចិនមិនភ្លេចប្រទេសក្រីក្រផ្សេងទៀតឡើយ ជាពិសេសប្រទេសអាហ្វ្រិក និងអាស៊ី ក្នុងការជំរុញការអភិវឌ្ឍប្រទេសនីមួយៗ។
ក្នុងបទសម្ភាសន៍ដដែលនោះ លោកប្រធានាធិបតី Duterte ក៏បានលើកពីគុណសម្បត្តិរបស់ចិន ដែលគាំទ្រយុទ្ធនាការបង្ក្រាបគ្រឿងញៀនរបស់ហ្វីលីពីន តាមរយៈការជួយសាងសង់មជ្ឈមណ្ឌលស្ដារនីតិសម្បទា ខណៈអាមេរិក សហភាពអឺរ៉ុប និងអង្គការសហប្រជាជាតិ រិះគន់ហ្វីលីពីនខ្លាំងៗនោះ។ លោកបន្តថា៖ «ប្រទេសខ្លះដឹងថាយើងខ្វះលុយ តែពួកគេមិនជួយយើងឡើយ ហើយបែរជារិះគន់ទៅវិញ។ ចិនមិនដែលរិះគន់ទេ តែថែមទាំងជួយយើងស្ងាត់ៗទៀត»។
មិនតែប៉ុណ្ណោះ ប្រមុខរដ្ឋហ្វីលីពីនរូបនេះ ក៏ចង់ចូលរួមជាមួយគំនិតផ្ដួចផ្ដើម «ខ្សែក្រវ៉ាត់ និងផ្លូវ» របស់ចិនដែរ ដ្បិតហ្វីលីពីនខ្វះខាតហិរញ្ញវត្ថុដើម្បីកសាងហេដ្ឋារចនាសម្ព័ន្ធបន្ថែមទៀត។ ចំណែកក្នុងដំណើរទស្សនកិច្ចទៅកាន់ចិនវិញ លោក Duterte និយាយដែរថា លោកនឹងបង្កើតកិច្ចសន្ទនាជាមួយចិន សំដៅពង្រឹងការទុកចិត្តគ្នាទៅវិញទៅមក ក៏ដូចជាភាពជាដៃគូចិន-ហ្វីលីពីនផងដែរ។
«អ្វីដែលយើងចាំបាច់ធ្វើនោះ គឺការពិភាក្សាគ្នា និងទទួលបានការចាប់ដៃកក់ក្ដៅពីមន្ត្រីចិន។ យើងជាជនជាតិហ្វីលីពីន ហើយយើងត្រៀមខ្លួនរួចរាល់ដើម្បីសហប្រតិបត្តិការជាមួយចិន សម្រាប់ជួយហ្វីលីពីន ក្នុងការកសាងសេដ្ឋកិច្ច ក៏ដូចជាប្រទេសហ្វីលីពីនដែរ»។ នេះជាការបញ្ជាក់បន្ថែមរបស់លោក Duterte នៅមុនទស្សនកិច្ចផ្លូវការទៅចិន ដែលចាប់ផ្ដើមពីថ្ងៃទី១៨ ខែតុលា៕
Tag:
ចិន
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com
