អន្តរជាតិ
នយោបាយអន្តរជាតិ
ម្ចាស់ក្សត្រីយ៍ Sirindhorn នឹងដឹកនាំការសាងសង់មេរុព្រះសពមហាក្សត្រ ភូមិបុល
×
រជ្ជទាយាទថៃ Maha Vajiralongkorn បានផ្ដល់ឲ្យសិទ្ធិម្ចាស់ក្សត្រីយ៍ Sirindhorn ក្នុងការសម្រេចចិត្តជាចុងក្រោយលើការសាងសង់មេរុសម្រាប់ពិធីបុណ្យមហាក្សត្រ ភូមិបុល អាប់ឌុលយ៉ាដេត (Bhumibol Adulyadej)។ ជាមួយគ្នានេះដែរ រដ្ឋាភិបាលថៃ ក៏កំពុងរៀបចំកម្មវិធីបុណ្យ និងការគ្រប់គ្រងប្រជាជនដែលចូលរួមពិធីបុណ្យនេះដែរ។
ឧបនាយករដ្ឋមន្ត្រីថៃ លោក Wissanu Krea-ngam នៅថ្ងៃទី១៧ ខែតុលា បានបង្ហើបថា ម្ចាស់ក្សត្រីយ៍ Sirindhorn នឹងទទួលបន្ទុកលើការងារមេរុសម្រាប់ពិធីបូជាព្រះសពបិតាព្រះចៅ ភូមិបុល អាឌុលយ៉ាដេត ដែលសោយទិវង្គតកាលពីថ្ងៃទី១៣ ខែតុលា។ ម្ចាស់ក្សត្រីយ៍ Sirindhorn នឹងទទួលខុសត្រូវលើការងារសំខាន់នេះ បន្ទាប់ពីរជ្ជទាយាទ Maha Vajiralongkorn ផ្ទេរសិទ្ធិរួចមក។
លោកឧបនាយករដ្ឋមន្ត្រីថៃរូបនេះ បន្តថា កិច្ចប្រជុំគណៈរដ្ឋមន្ត្រី ក៏នឹងពិភាក្សាលើការរៀបចំព្រះរាជពិធីបុណ្យសពព្រះចៅ ភូមិបុល ដែលគ្រងរាជ្យយូរជាងគេលើលោក។ មិនតែប៉ុណ្ណោះ គណៈរដ្ឋមន្ត្រី ក៏នឹងរៀបចំគោលការណ៍ណែនាំផ្សេងទៀត សម្រាប់ឲ្យប្រជាជនថៃលើសលប់ដែលរំពឹងថាមកកាន់រាជវាំង សម្រាប់អនុវត្តអំឡុងពេលចូលរួមពិធីគោរពវិញ្ញាណក្ខន្ធមហាក្សត្រអង្គនេះ។
បើតាមកាសែតបាងកកប៉ុស្តិ៍ លោក Wissanu Krea-ngam បញ្ជាក់ដែរថា រជ្ជទាយាទ Maha Vajiralongkorn បានលើកឡើងរឿងសាងសង់មេរុនេះ ពេលជួបជាមួយលោកនាយករដ្ឋមន្ត្រី ប្រាយុទ្ធ ចន្ទអូចា នាពេលថ្មីៗនេះ។ ហើយរជ្ជទាយាទអង្គនេះ ចង់ឲ្យព្រះអនុជ Sirindhorn ជាអ្នកសម្រេចចុងក្រោយលើការងារនេះ ដែលត្រូវការការសិក្សាប្លង់ ទីតាំង ក៏ដូចជាទំហំមេរុនោះ។
តាមការបញ្ជាក់របស់លោក Wissanu Krea-ngam ព្រះមេរុ នឹងសាងសង់នៅវាល Sanam Luang ដែលស្ថិតក្បែររាជវាំងស្រាប់ ហើយសំណង់មួយចំនួនទៀតនឹងត្រូវសាងសង់ដែរ សម្រាប់បម្រើពិធីបូជាព្រះសពមហាក្សត្រ ភូមិបុល អាឌុលយ៉ាដេត។ ចំណែកក្បូរក្បាច់សំណង់ទាំងឡាយ នឹងត្រូវទទួលបន្ទុកដោយនាយកដ្ឋានវិចិត្រសិល្បះថៃផ្ទាល់តែម្ដង។
ដោយសារតែការកាន់ទុក្ខនឹងមានរយៈពេលពេញមួយឆ្នាំនោះ មនុស្សរាប់ពាន់នាក់នឹងទៅគោរពវិញ្ញាណក្ខន្ធព្រះចៅ ភូមិបុល អាឌុល រាល់ថ្ងៃ បន្ទាប់ពីរាជវាំប្រកាសថា ពួកគេអាចចូលទៅគោរពព្រះសពនៅក្នុងវាំងក្រោយពិធីសូត្រមន្ត១៥ថ្ងៃនោះ។ គេរំពឹងថាក្នុងរយៈរយៈពេលកាន់ទុក្ខនេះប្រជាជនថៃរាប់សែននាក់ចេញពីតាមខេត្តដើម្បីមកកាន់រាជធានីបាងកក។ ខាងអាជ្ញាធរបានស្នើឲ្យស្ថាប័នពាក់ព័ន្ធ និងក្រុមហ៊ុនឯកជនមួយចំនួនផ្តល់ទីកន្លែងស្នាក់នៅឥតគិតថ្លៃដល់ប្រជាពលរដ្ឋថៃដែលអញ្ជើញមកកាន់ក្រុងបាងកកនោះ៕
Tag:
ថៃ
Bhumibol Adulyadej
© រក្សាសិទ្ធិដោយ thmeythmey.com