អន្តរជាតិ
រដ្ឋាភិបាលប៉ាគីស្ថានមិនឲ្យបក្សប្រឆាំងធ្វើបាតុកម្មបិទទីក្រុង
× គណបក្ស Pakistan Tehreek-e-Insaf (PTI) ជាបក្សប្រឆាំងប្រកាសរៀបចំធ្វើបាតុកម្មបិទទីក្រុង អ៊ីស្លាម៉ាបាដ នៅថ្ងៃទី២ ខែវិច្ឆិកា ដើម្បីប្រឆាំងនាយករដ្ឋមន្ត្រីប៉ាគីស្ថាន Nawaz Sharif ដែលទាក់ទងនឹងរឿងអាស្រូវពុករលួយ Panama Paper។ ប៉ុន្តែរដ្ឋាភិបាលប៉ាគីស្ថានក៏បានប្រកាសវិញថា អាជ្ញាធរនឹងមិនឲ្យមានការធ្វើបាតុកម្មតាមការគ្រោងទុកនោះឡើយ។
រដ្ឋាភិបាលប៉ាគីស្ថាននៅថ្ងៃទី២៤ ខែតុលា បានបញ្ជាក់ថា ខ្លួននឹងរារាំងការតវ៉ារបស់គណបក្សប្រឆាំង ប្រសិនបើមេដឹកនាំប្រឆាំង លោក Imran Khan បន្តអនុវត្តផែនការបិទអាគាររដ្ឋាភិបាល និងប្រព័ន្ធដឹកជញ្ជូននៅក្នុងរដ្ឋធានី អ៊ីស្លាម៉ាបាដ (Islamabad) មិនឲ្យដំណើរការបាននោះ។ គណបក្សប្រឆាំងប្រមូលប្រជាជនធ្វើបាតុកម្ម ដើម្បីដាក់សម្ពាធឲ្យនាយករដ្ឋមន្ត្រី Nawaz Sharif ចុះចេញពីតំណែង ក្រោយលោកមានឈ្មោះជាប់ពាក់ព័ន្ធអាស្រូវ Panama Paper ដែលលេចធ្លាយរួចមក។
ដោយសារតែបញ្ហានេះ ប្រមុខបក្សប្រឆាំង Imran Khan បានទាមទារឲ្យនាយករដ្ឋមន្ត្រី Sharif ចុះចេញពីតំណែង ដ្បិតឯកសារដែលលេចធ្លាយបង្ហាញពីការកើនឡើងនៃទ្រព្យសម្បត្តិរបស់គ្រួសាររបស់លោក។ ប៉ុន្តែគ្រូសាររបស់លោក Sharif បានទាត់ចោលការពាក់ព័ន្ធនឹងរឿងអាស្រូវនេះ។ ចំណែកបក្សប្រឆាំងក៏ឆ្លៀតឱកាសនេះ ដើម្បីធ្វើការទាមទារទម្លាក់លោក Sharif តែម្ដង។
យ៉ាងណាក្ដី អ្នកនាំពាក្យរដ្ឋាភិបាល Pervaiz Rashid ប្រកាសថា រដ្ឋាភិបាលនឹងមិនអនុញ្ញាតឲ្យមានការបិទផ្លូវ ឬអាគាររដ្ឋឡើយ។ លោកបញ្ជាក់ថា នេះជាការទទួលខុសត្រូវរបស់រដ្ឋាភិបាលដើម្បីធានាពីប្រក្រតីភាពរបស់ជីវិតប្រជាជននៅក្នុងទីក្រុង។ ហើយច្បាប់នឹងត្រូវអនុវត្តប្រឆាំងនឹងការប៉ុនប៉ងបិទទីក្រុង។ ប៉ុន្តែអ្នកនាំពាក្យរូបនេះ មិនបានបញ្ជាក់ពីវិធានការដែលរដ្ឋាភិបាលត្រូវប្រើសម្រាប់ឆ្លើយតបបាតុកម្មឡើយ។
យោងតាមទីភ្នាក់ងារព័ត៌មាន Reuters មេបក្សប្រឆាំងនិយាយថា បាតុកម្មរបស់បក្សប្រឆាំងនឹងបិទសាលារៀន ការិយាល័យសាធារណៈ ផ្លូវក្នុងទីក្រុង និងព្រលានយន្តហោះដែរ។ ពោលគឺបិទរហូតដល់នាយករដ្ឋមន្ត្រី Sharif លាលែងពីតំណែង ឬក៏ព្រមឲ្យបើកការស៊ើបអង្កេតលើករណីពុករលួយ Panama Paper ដែលរូបលោកមានឈ្មោះដែរនោះ។ លោក Imran ប្រកាសថា គ្មានប៉ូលិសណាអាចទប់ស្កាត់ប្រជាជនមួយលាននាក់បានឡើយ។
ឯកសារដែលលេចធ្លាយបង្ហាញថា កូនស្រី និងកូនប្រុសពីរនាក់របស់លោក Sharif ជាម្ចាស់ក្រុមហ៊ុនមួយដែលមានទីតាំងនៅបរទេស ហើយលោក Imran បានចោទថា ចំណូលទាំងនោះបានមកដោយសាររឿងពុករលួយ។ មេបក្សប្រឆាំងបានប្រាប់ទៅកាន់អ្នកគាំទ្ររបស់លោកនៅថ្ងៃទី២៤ ខែតុលា ថា នាយករដ្ឋមន្ត្រី Sharif មិនអាចរត់រួចពីការបិទទីក្រុងនៅថ្ងៃទី២ ខែវិច្ឆិកាឡើយ៕
© រក្សាសិទ្ធិដោយ thmeythmey.com