អន្តរជាតិ
រដ្ឋមន្ត្រីការពារជាតិហ្វីលីពីនថា «អាមេរិកនិងចិន មិនវាយគ្នាឡើយ»
× ការប្រឈមមុខដាក់គ្នារវាងមហាអំណាចពីរ គឺចិន និងអាមេរិក ធ្វើឲ្យគេឯងបារម្ភថា សង្គ្រាមរវាងមហាអំណាចទាំងពីរនឹងផ្ទុះឡើងនៅថ្ងៃណាមួយមិនខានឡើយ។ ប៉ុន្តែប្រមុខការពារជាតិហ្វីលីពីនអះអាងថា ចិន និងអាមេរិក នឹងមិនធ្វើសង្គ្រាមជាមួយគ្នាឡើយ ដ្បិតទាំងចិន និងអាមេរិក នឹងគិតផលប្រយោជន៍សេដ្ឋកិច្ចរៀងៗខ្លួន និងការវិនាសកម្មបណ្ដាលមកពីសង្គ្រាមដែលផ្ទុះឡើងនោះ។
រដ្ឋមន្ត្រីការពារជាតិហ្វីលីពីន លោក Delfin Lorenzana បានប្រាប់ប្រជាជនហ្វីលីពីន មិនត្រូវមានការភ័យខ្លាចចំពោះស្ថានភាពដែលហ្វីលីពីននឹងធ្លាក់ចូលចំណុចកណ្ដាលនៃសង្គ្រាមរវាងចិន និងអាមេរិកឡើយ។ រដ្ឋមន្ត្រីការពារជាតិហ្វីលីពីន បញ្ជាក់ដូចនេះខណៈដែលហ្វីលីពីនកំពុងងាកចេញពីសម្ព័ន្ធមិត្តអាមេរិក និងឈោងដៃទៅចាប់ចិន ដែលជាគូប្រជែងគ្នានោះ។
លោក Delfin Lorenzana បន្តថា ជម្លោះសមុទ្រហ្វីលីពីនខាងលិច (ចិនហៅសមុទ្រចិនខាងត្បូង) មិនអាចក្លាយជាសង្គ្រាមរវាងចិន និងអាមេរិកឡើយ។ នេះក៏ព្រោះតែភាគីទាំងពីរនឹងការពារសេដ្ឋកិច្ចរបស់ខ្លួន ដែលអាស្រ័យលើទំនាក់ទំនងល្អទៅវិញទៅមកនោះ។ លោកបន្តថា ជម្លោះរវាងចិន និងអាមេរិក អាចឈានដល់ការប្រើប្រាស់អាវុធនុយក្លេអ៊ែរ ដែលជាជាអាវុធប្រល័យដ៏សាហាវទៀតផង។
«ទាំងអាមេរិក និងចិន សុទ្ធតែដឹងច្បាស់ពីរឿងនេះ ដូច្នេះទើបពួកគេប្រុងប្រយ័ត្នមិនឲ្យមានការគណនាលើគូប្រជែងដោយខុសឆ្គងឡើយ»។ នេះជាការបញ្ជាក់បន្ថែមរបស់រដ្ឋមន្ត្រីការពារជាតិរូបនេះទៅកាន់សិស្សយោធានៅឯសាលាយោធាហ្វីលីពីន (PMA) កាលពីថ្ងៃទី២៩ ខែតុលា ដែលចេញផ្សាយដោយសារព័ត៌មាន Inquirer.Net។
សូមបញ្ជាក់ថា ហ្វីលីពីន គឺជាសម្ព័ន្ធមិត្តដ៏សំខាន់របស់អាមេរិក។ ដោយមិនរាប់បញ្ចូលផលប្រយោជន៍សេដ្ឋកិច្ច ហ្វីលីពីន ទទួលបានផលប្រយោជន៍ជាច្រើនតាមរយៈកិច្ចសហប្រតិបត្តិការយោធារួម ដែលរួមមានទាំងការហ្វឹកហ្វឺនជំនាញកងទ័ពដែលប្រទេសទាំងពីរតែងតែមានសមយុទ្ធយោធារួមប្រចាំឆ្នាំជាមួយនឹងគ្នា ជំនាញសង្គ្រោះមនុស្សធម៌ និងប្រតិបត្តិការបង្ក្រាបក្រុមភេរវករនៅក្នុងប្រទេសហ្វីលីពីនដោយមានការចូលរួមពីកងទ័ពអាមេរិកជាច្រើន។
អ្វីគួរកត់សម្គាល់នោះ ក្នុងរដ្ឋបាលរបស់អតីតប្រធានាធិបតីហ្វីលីពីនលោក ប៊ែរនីណូ អាហ្គីណូ ដែលជាអ្នកកាត់ចង្កូតនាវាហ្វីលីពីនពីឆ្នាំ២០១០ដល់ឆ្នាំ២០១៦កន្លងទៅថ្មីៗនោះ ទំនាក់ទំនងហ្វីលីពីន-អាមេរិក បានមានស្អិតល្មួតនឹងគ្នាយ៉ាងខ្លាំង ដែលគេតែងហៅថា «សម្ព័ន្ធមិត្តចាក់ទឹកមិនលិច»នោះឯង។ ប៉ុន្តែទំនាក់ទំនងនេះធ្លាក់ចុះ ក្រោយការឡើងកាន់អំណាចរបស់លោក Rodrigo Duterte។ ហ្វីលីពីន ស្រវាចាប់មហាយក្សចិន ដែលជាគូប្រជែងអាមេរិក និងងាកចេញកាន់តែឆ្ងាយពីសម្ព័ន្ធមិត្តរបស់ខ្លួន៕
Tag:
ហ្វីលីពីន
ចិន
អាមេរិក
© រក្សាសិទ្ធិដោយ thmeythmey.com