អន្តរជាតិ
នាវាចិនបន្តល្បាតនៅប្រជុំកោះ Scarborough Shoal ផ្ទុយពីការអះអាងរបស់ហ្វីលីពីន
× នាវាល្បាតរបស់ចិន នៅតែបន្តវត្តមានរបស់ខ្លួននៅប្រជុំកោះ Scarborough Shoal ដែលនេះផ្ទុយពីការលើកឡើងរបស់រដ្ឋាភិបាលហ្វីលីពីន ដែលអះអាងថា នាវាចិនបានចាកចេញពីតំបន់នេះអស់ហើយនោះ។ ប៉ុន្តែមន្ត្រីហ្វីលីពីនបញ្ជាក់ថា ចិនបានកាត់បន្ថយចំនួននាវាល្បាតរបស់ខ្លួន ហើយក៏បានអនុញ្ញាតឲ្យអ្នកនេសាទហ្វីលីពីន នេសាទត្រីដោយសេរីក្នុងតំបន់នោះដែរ។
អ្នកនាំពាក្យក្រសួងការពារជាតិហ្វីលីពីន នៅថ្ងៃទី៣០ ខែតុលា បាននិយាយថា កប៉ាល់កងឆ្មាំការពារឆ្នេររបស់ចិន នៅតែបន្តសកម្មភាពល្បាតរបស់ខ្លួននៅប្រជុំកោះ Scarborough Shoal នៅក្នុងសមុទ្រចិនខាងត្បូងដដែល ប៉ុន្តែពួកគេមិនបានរារាំងអ្នកនេសាទហ្វីលីពីន ដូចលើកមុនៗឡើយ។ ការបន្តវត្តមានរបស់នាវាចិននៅតំបន់នោះ ហាក់ខុសគ្នាទាំងស្រុងនឹងការលើកឡើងរបស់ហ្វីលីពីននាពេលកន្លងមក។
បើតាមសារព័ត៌មាន Rappler អ្នកនាំពាក្យប្រធានាធិបតីហ្វីលីពីនបានបញ្ជាក់ថា នៅថ្ងៃទី២៩ ខែតុលា គ្មានសញ្ញាកប៉ាល់ចិនឡើយ ហើយការនេសាទអាចធ្វើបានជាធម្មតាឡើងវិញ។ ក្រោយទស្សនកិច្ចនៅចិន ប្រធានាធិបតីហ្វីលីពីន Rodrigo Duterte និយាយថា កប៉ាល់ចិន នឹងចាកចេញពីតំបន់នោះ ហើយប្រជាជនហ្វីលីពីន អាចចូលទៅនេសាទនៅទីតាំងនោះបាន។
យ៉ាងណាមិញ ក្រុមអ្នកនេសាទហ្វីលីពីន បានអះអាងពីវត្តមានរបស់កប៉ាល់ល្បាតចិននៅប្រជុំកោះ Scarborough Shoal ក្រោយពីពួកគេត្រឡប់ពីការនេសាទវិញ។ អ្នកនាំពាក្យក្រសួងការពារជាតិ លោក Arsenio Andolong និយាយដែរថា អ្នកនេសាទហ្វីលីពីន ឃើញមានទូកពណ៌សរបស់ចិន ប៉ុន្តែពួកគេមិនបានហាមឃាត់សកម្មភាពនេសាទរបស់ប្រជាជនហ្វីលីពីននោះឡើយ។
ចិន បានហាមឃាត់អ្នកនេសាទហ្វីលីពីនចូលទៅកាន់តំបន់ប្រជុំកោះខាងលើ ក្រោយខ្លួនដណ្ដើមកាន់កាប់កាលពីឆ្នាំ២០១២។ ការកាន់កាប់ប្រជុំកោះនេះ ក៏ជាមូលហេតុនៃបណ្ដឹងរបស់រដ្ឋាភិបាលលោកអតីតប្រធានាធិបតីហ្វីលីពីន Aquino ទៅកាន់តុលាការអន្តរជាតិដែរ។ ករណីនេះប្ដឹងនេះ ធ្វើឲ្យទំនាក់ទំនងរវាងហ្វីលីពីន និងចិន រង្គោះរង្គើយ៉ាងខ្លាំង រហូតដល់ការកាន់អំណាចរបស់លោកDuterte ដែលបានងាកទៅរកចិនវិញនោះ។
ដោយឡែក ការសម្រេចរបស់តុលាការអន្តរជាតិ ក៏បានទាត់ចោលការទាមទាររបស់ចិនលើការគ្រប់គ្រងតំបន់សមុទ្រចិនខាងត្បូង ដែលចិនទាមទារសិទ្ធិគ្រប់គ្រងស្ទើរទាំងស្រុងទៅហើយនោះ។ មួយទៀត សាលក្រមតុលាការអន្តរជាតិ ដែលចិនប្រកាសមិនទទួលស្គាល់នោះ ក៏ចាត់ទុកប្រជុំកោះ Scarborough Shoal ជាកន្លែងនេសាទប្រពៃណី ដែលប្រទេសទាំងអស់ សុទ្ធតែអាចធ្វើសកម្មភាពនេសាទបាន៕
Tag:
ចិន
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com