អន្តរជាតិ
ប្រធានាធិបតីវ៉េណេស៊ុយអេឡា ជួបបក្សប្រឆាំងក្រោមការសម្របសម្រួលរបស់បុរីវ៉ាទីកង់ ប្រធានាធិបតីវ៉េណេស៊ុយអេឡា Nicolas Maduro (រូបភាព Xinhua)
× ប្រធានាធិបតីវ៉េណេស៊ុយអេឡា លោក Nicolas Maduro បានបន្ទន់ឥរិយាបថរបស់លោក ងាកមកជួបចរចាជាមួយក្រុមបក្សប្រឆាំង ក្នុងការពិភាក្សាដែលផ្ដួចផ្ដើមដោយបុរីវ៉ាទីកង់ នៅក្នុងរដ្ឋធានីការ៉ាកាស់។ ក្រុមបក្សប្រឆាំង ក៏បានលក្ខខណ្ឌមួយចំនួនក្នុងជំនួបលើកនេះ ហើយគំរាមធ្វើពហិការជំនួបលើកក្រោយទៀត ប្រសិនបើលក្ខខណ្ឌរបស់ខ្លួន មិនត្រូវបានដោះស្រាយដោយរដ្ឋាភិបាលទេនោះ។
ប្រធានាធិបតីអស់ប្រជាប្រិយភាពវ៉េណេស៊ុយអេឡា Nicolas Maduro បានចាប់ដៃជាមួយបណ្ដាមេដឹកនាំប្រឆាំងនៅជំនួបថ្ងៃទី៣០ ខែតុលា ដែលរៀបចំដោយបុរីវ៉ាទីកង់។ ជំនួបដែលចូលរួមបណ្ដាមេដឹកនាំបរទេសដែរនោះ លេចជារូបរាងស្របពេលដែលសម្ព័ន្ធភាពប្រជាធិបតេយ្យរួបរួម ដែលជាក្រុមប្រឆាំងនាំគ្នាធ្វើបាតុកម្មប្រឆាំងរដ្ឋាភិបាលដែលរារាំងការធ្វើប្រជាមតិទម្លាក់លោក Maduro ចេញពីតំណែង។
ក្នុងជំនួបនៅឯសារមន្ទីរ Caracas លោក Maduro បានចាប់ស្វាគមន៍មេដឹកនាំប្រឆាំងចំនួន៥នាក់ រួមទាំងលោក Jesus Torrealba និងអភិបាលរដ្ឋមកពីបក្សប្រឆាំងលោក Henri Falcon ផងដែរ។ ទីភ្នាក់ងារព័ត៌មាន Reuters ផ្សាយថា ឥស្សរជនបរទេសដែលចូលជំនួបនេះមានមកពីអេស្ប៉ាញ ប៉ាណាម៉ា និងសាធារណរដ្ឋដូមីនីក ព្រមទាំងតំណាងបុរីវ៉ាទីកង់ និងតំណាងអង្គការ Unasur ដែលជាអង្គការតំបន់ឡាទីនដែរ។
ក្រុមអ្នកប្រឆាំងបានរិះគន់របបដឹកនាំសង្គមរបស់លោក Maduro ដែលបន្តអំណាចពីអតីតប្រធានាធិបតី Hugo Chavez ក្នុងឆ្នាំ២០១៣។ ក្រុមប្រឆាំងអះអាងថា រយៈពេល១៧ឆ្នាំនៃការដឹកនាំរបស់រដ្ឋាភិបាលសង្គមនិយម ធ្វើឲ្យសេដ្ឋកិច្ចប្រទេសធ្លាក់ចុះយ៉ាងខ្លាំង។ មិនតែប៉ុណ្ណោះ ប្រជាធិបតេយ្យរបស់ប្រទេសនាំចេញប្រេងដ៏ធំរបស់អាមេរិកឡាទីន ក៏កាន់តែយ៉ាប់យ៉ឺនទៅទៀត។
ជាការឆ្លើយតប ប្រធានាធិបតី Maduro បានចាត់ទុកសកម្មភាពរបស់ក្រុមប្រឆាំង ជាការប៉ុនប៉ងបង្កចលាចលនៅក្នុងប្រទេស ដោយមានកម្លាំងបរទេសនៅពីក្រោយ។ កម្លាំងបរទេសនោះ គឺលោកចង់សំដៅដល់អាមេរិក ដែលមិនត្រូវគ្នាជាមួយរបបដឹកនាំសង្គមនិយមវ៉េណេស៊ុយអេឡាតែម្ដង។ លោក Maduro ចោទអាមេរិកថា ជួយបក្សប្រឆាំងដើម្បីផ្ដួលរំលំលោក និងរបបសង្គមនិយមដែលជាមរតករបស់លោក Chavez។
យ៉ាងណាក្ដី ជំនួបនៅថ្ងៃទី៣០ ខែតុលា មិនទទួលបានលទ្ធផលអ្វីជាដុំកំភួនឡើយ ខណៈក្រុមប្រឆាំងមួយចំនួន មិនមានវត្តមាននោះទេ។ ក្រុមប្រឆាំងទាមទារឲ្យលោក Maduro បើកទូលាយសេរីភាពរបស់អ្នកនយោបាយ និងការដឹកជញ្ជូនជំនួយមនុស្សធម៌។ ហើយក្រុមប្រឆាំងក៏ទាមទារឲ្យរដ្ឋាភិបាលលោក Maduro គោរពសភាដែលគ្របដណ្ដប់ដោយក្រុមប្រឆាំងផងដែរ៕
Tag:
វ៉េណេស៊ុយអេឡា
វ៉ាទីកង់
© រក្សាសិទ្ធិដោយ thmeythmey.com